Къуаджэу Нэтыхъуае илъэсишъэ зэрэхъурэм ипэгъокIэу цIыф пэрытхэу зикъуаджэ шIу зылъэгъурэмэ ащыщхэм непэ сакъытегущыIэщт.

Цушъхьэ Хъарет Нэтыхъуае къыщы­хъугъ, 1947-рэ илъэсым Мыекъопэ медицинэ техникумыр къыухыгъ. Мые­къуапэ икъэлэ сымэджэщ ащ Iоф щи­шIагъ, нэужым Тэхъутэмыкъое сымэджэщым, Щынджые фельдшерэу ащылэ­жьагъ. 1958-рэ илъэсым фельдшер-мамыку пункт къуаджэм къыщызэIуахыгъ. А лъэхъаныр къиныгъ, сымаджэхэр сымэ­джэщым пщэнхэм пае транспорт ищыкIэгъагъ. Зы ку закъу чылэм дэтыгъыр, ащ бэрэ ущыгугъынэу щытыгъэп, ари хъызмэт IофшIэнхэм ащагъэфедэщтыгъ. Исэнэхьат зыгу етыгъэгъэ Хъарет сымаджэхэм унэм ащеIазэщтыгъ, бзылъфыгъэхэм ясабыйхэр яунэмэ къащафэхъу­щтыгъэх. Джащ фэдэу сабыи 156-рэ ыIэгу ащ къихъухьагъ, джащ фэдиз шIушIагъэ Хъарет иI.
Хъупхъэ дэдэу, гукIэгъу ин хэлъэу ар щытыгъ, къэсымаджэрэм дэжь мафэми, чэщыми кIощтыгъэ. Ащ ыгъэуцурэ диагнозым уехъырэхъышэжьынэу зэрэщымытыр анахь врач IэпэIасэхэми къыхагъэщыщтыгъ. Анахь фельдшер дэгъоу районым, хэкум къащагъэлъагъорэмэ апэ итэу илъэс 52-рэ ащ Iоф ышIагъ. Сабыеу ыIэгу къихъухьагъэхэм янахьыбэр пенсием кIуагъэх, ау непэ къызнэ­сыгъэм ар шIукIэ агу илъ. Бирам, Къур­мэн мафэхэм цIыфхэм Хъарет ащыгъуп­шэрэп, икъэ Iохьэх. IофшIэгъэшхоу иIэм уасэ фашIэу 2013-рэ илъэсым фельдшер-мамыку пунктэу чылэм дашIыхьагъэм ащ ыцIэ фаусыгъ.
Джы Хъарет ычIыпIэ итэу, фельдшерэу Iоф ешIэ Болэт Сэидэ. Хъарет иIофшIэкIагъэм ащ щысэ тырехы, апэрэ мафэхэм къащегъэжьагъэу ишIэныгъэхэм ахегъахъо. БэмышIэу район зэнэкъо­къоу зэхащагъэм апэрэ чIыпIэр къыщихьыгъ, анахь фельдшер дэгъоу районымкIэ хахыгъ. Прививкэхэр игъом ышIынхэр, нэжъ-Iужъхэм япсауныгъэ зыуплъэкIурэ врачхэр игъом алъигъэIэсынхэр, кIэлэцIыкIу къэхъугъакIэмэ япсауныгъэ лъыплъэныр, сымаджэу чылэм дэсмэ яIэзэныр Саидэ ипшъэрылъ.

Сымэджэ хьылъэхэм Саидэ лъэшэу ынаIэ атет, гущыIэ дэхахэр ариIозэ врачмэ къызэрагъэнэфагъэу яIазэ. Участковэ врачэу тиIэр чылэм щыщ, Хьахъуратэ Сим ары. Сымаджэхэр охъужьыфэхэ ахэм ар алъэплъэ, япсауныгъэ къызэраухъумэщтымкIэ гущыIэгъухэр адешIы.
Ковидым илъэхъан шIэныгъэ дэгъу зиIэ фельдшерыр Тэхъутэмыкъое район поликлиникэм иврачхэм ягъусэу яунэхэм арыс сымаджэхэм яIэзагъ. Сымэджэ хьылъэхэр къуаджэм бэ зыщыхъухэкIэ, медицинэ сестрахэр IэпыIэгъу афэхъух. Ахэм ащыщ Хьахъуратэ Саидэ. Краснодар край сымэджэщым илъэс тIокIым къехъугъэу Iоф щешIэ, Щытхъу пхъэмбгъум исурэт ит. Хьагъур Оксанэрэ Цушъхьэ Замирэрэ Краснодар краим икIэлэцIыкIу сымэджэщ анахь дэгъоу щылажьэу щагъэнэфагъэхэм ащыщых. Медицинэ сестра ныбжьыкIэхэу Бек Бэллэ, Чэлэбый Риммэ, Хъунэ Даринэ, Хьахъуратэ Даринэ ахэмэ акIырэплъых, ягъогу рэкIох. ГуфэкIо-фармацевтхэу Хьахъуратэ Нэфсэтрэ Риммэрэ сыма­джэмэ Iэзэгъу уцэу ящыкIэгъэщтхэр игъом алъагъэIэсы.
Джащ тетэу медицинэм иIофышIэу къуаджэм дэсхэм яшIогъэшхо къэкIо. АIэ зэкIэдзагъэу, гуфэбэныгъэ зэфыряIэу IофшIэныр агъэцакIэ, ядахэ чылэм щаIуатэ. Ны-тыхэу мыхэр зыпIугъэхэм, адыгэ шэн-хабзэхэр ахэзылъхьагъэхэм лъэшэу тафэраз. Болэт Сэидэ илъэс шъэныкъо зыщыхъущтым чылэм июбилей тефэ. Мыщ илъэс щэкI IофшIагъэ иI. Щытхъу тхылъхэу, дипломэу УФ-м псауныгъэр къэухъумэгъэнымкIэ и Министерствэ, Адыгэ Республикэм и ЛIышъхьэ ыкIи район пащэхэм къыфагъэшъо­шагъэр макIэп. Саидэрэ ащ ишъхьэгъусэу Аскэррэ унэгъо дахэ зэдашIэн алъэ­кIыгъ, кIэлабэ зиIэмэ ащыщых. Апшъэрэ гъэсэныгъэ ясабыймэ зэ­кIэмэ арагъэгъотыгъ, унагъохэр яIэхэ хъу­жьыгъэ. Ежьхэри якIа­лэхэм, япхъорэлъф­хэм арэгушхох.
Болэт Саидэ янэ-ятэхэу Кобл Хьисэрэ Дэхэнагъорэ мыщ фэдэу пшъэшъэжъыер зэрапIугъэм фэшI нэтыхъуаехэмкIэ лъэшэу тафэраз. Сэидэ Тэхъу­тэмыкъуае къыщыхъугъ нахь мышIэми, ежь ичылэ фигъадэу Нэтыхъуае дэсхэм шъхьэ­кIэфэ ин афишIыгъ, ежьыри лъытэныгъэшхо къылэжьыгъ. Илъэс шъэныкъо ар зэрэхъу­рэмкIэ тыгу къыддеIэу тыфэгушIо, шIоу щыIэ пстэури къыдэхъунэу тыфэлъаIо!
Хьахъуратэ Светлан.
Нэтыхъуай.