ЩыIэныгъэм епхыгъэ ушэтын
Транспорт амалхэр агъэIорышIэнхэм ифитыныгъэ икъыдэхын зэрэзэхэщагъэм бэкIэ елъытыгъ гъогухэм хъугъэ-шIагъэу атехъухьэхэрэр. ЕджапIэм зэрэщагъасэхэрэм, нэужым ушэтынхэр зэрарагъэтыхэрэм мэхьанэу яIэр нахь лъэшы мэхъу зэпыт.
Уахътэм къыгъэлъэгъорэ зэфэхьысыжьхэм къапкъырыкIхэзэ унашъоу мы лъэныкъомкIэ щыIэхэм зэхъокIыныгъэхэр афашIых. Мэлылъфэгъум и 1-м ушэтынхэр зэратыщтхэм фэгъэхьыгъэ хэбзэгъэуцугъэм кIуачIэ иIэ хъугъэ.
Нахь къызэрыкIоу къэпIон зыхъукIэ, водительскэ удостоверениер къыдэхыгъэнымкIэ ушэтынхэу автоинспекцием щатыхэрэм апылъ шапхъэхэр ары зэхъокIыныгъэхэр зылъыIэсыгъэхэр. Мыщ дэжьым упчIэ къэуцу: езыгъэжьэгъэкIэ водительхэм ялажьэкIэ хъурэ авариехэм япчъагъэ къыщыкIэным ахэр фэIорышIэщтха, ахэм ятынкIэ сыда нахь псынкIэ
е хьылъэ хъугъэр? УпчIэхэм яджэуап къыритыжьыгъ АР-м гъогурыкIоныр щынэгъончъэнымкIэ и Къэралыгъо автоинспекцие регистрационнэ-ушэтын IофшIэнымкIэ икуп лъыплъэрэ отделым истаршэ инспекторэу Натхъо Рустам.
— ГъогурыкIоным ишапхъэхэм афэгъэхьыгъэ хэбзэгъэуцугъэхэм зэпымыоу зэхъокIыныгъэхэр афашIых, а зэпстэур гъогурыкIоныр щынэгъончъэным тегъэпсыхьагъэх. Ау икIыгъэ илъэсым изэфэхьысыжьхэм къызэрагъэлъагъорэмкIэ, езыгъэжьэгъэкIэ водительхэм (транспортыр зэрэзэрифэрэр илъэситIу мыхъугъэр) ялажьэкIэ хъугъэ-шIагъэу тигъогухэм атехъухьэхэрэм япчъагъэ зыкъиIэтыгъ. ЗэхъокIыныгъэу зигугъу къэтшIырэм къыфэдгъэзэжьымэ, зефэнымкIэ ушэтыныр нахь псынкIэ ашIыгъ, ау ар птыным ифитыныгъэ къыдэпхыныр нахь хьылъэ хъугъэ. Ащ къикIырэр — дэгъоу еджагъэхэм къафэпсынкIэщт, ау икъоу шIэныгъэхэр автоеджапIэм щызэзымыгъэгъотыгъэм практикэм щигъэфедэжьын ыгъотыщтэп, — хигъэунэфыкIыгъ Натхъо Рустам.
Сыда нахь псынкIэ хъугъэр?
Водитель хъунэу фаехэм тазыр баллэу къатыралъхьэщтыгъэхэм ахагъэхъуагъ. ЫпэкIэ зэрэщытыгъэр: хэукъоныгъэу пшIырэм елъытыгъэу тазырэу балли 5 зибгъэкъукIэ, къэкIощт ушэтын тыгъом нэс лъэсэу укъекIокIыщтыгъ. Джы а пчъагъэр 7-м нагъэсыгъ. Ащ къикIырэр — 5-м нэмыкIэу джыри хэукъоныгъэ цIыкIуитIу е гурытэу зы пшIын амал щыIэ хъугъэ.
Хэукъоныгъэхэр яхьылъагъэкIэ зэтеутыгъэх: хьылъэхэр — цIыфым ищыIэныгъэкIэ щынагъо къэзытырэ зекIуакIэхэр (щынэгъончъэ бгырыпхыр зытемылъхьагъэмэ, зикIогъу лъэсрыкIор е автомобилыр блэмыгъэкIыгъэмэ, уимылъэныкъо утехьагъэмэ, нэфрыгъуазэм ышъо димыштэу уежьагъэмэ, уапэ ит автомобилым тэрэзэу уемыбгъукIуагъэмэ, телефоныр бгъэфедагъэмэ, нэмыкIхэри) ыкIи гурытхэр — гъогу зэхэкIыпIэм ыкIи къэуцупIэхэм тэрэзэу уакъыщымыуцугъэмэ, лъэныкъоу зыдэбгъазэрэр къэзыгъэлъагъорэр хэмыгъэнагъэмэ, укъызэкIакIозэ къэуцупIэхэм уазэрэдэхьащтым ишапхъэ уукъуагъэмэ, нэмыкIхэри.
ТигущыIэгъу къызэриIуагъэмкIэ, мыщ фэдэ фэгъэкIотэн тIэкIур машинэр зэрифэнымкIэ ушэтыныр апэрэу зытыхэрэмкIэ дэеп. Сыда пIомэ водитель ныбжьыкIэхэр зефэным зэрэтещыныхьэхэрэм фэшI къызэрыкIо хэукъоныгъэхэр ашIыхэ хабзэ. Джы ахэм яамал, мыбэми, хагъэхъуагъ.
— Автодромым щатыщтыгъэ ушэтыныр джы хэтыжьэп. Водитель хъунэу фаехэм ащ къыщагъэлъэгъон фэе шIэныгъэхэр езбырэу зэрэзэрагъашIэрэр мытэрэзэу алъытагъ. Джы ахэр къалэм зэрэщызекIохэрэ едзыгъом къыдыхэлъытагъэу, транспорт амалхэр ыкIи цIыфхэр зыщыбэ чIыпIэхэм ащатын фаеу ашIыгъ. Зы ушэтыным практикитIур хэт хъугъэ. ЫпэкIэ лъэгапIэм дэкIоенхэшъ, ехыпIэм къыщыуцунхэу щытыгъ. Джы ехыпIэр ауплъэкIужьырэп. Гъунэпкъэ гъэнэфагъэу метри 5-м автомобилымкIэ зыкъыщыбгъэзэнэу зэрэщытыгъэм хагъэхъуагъ ыкIи метри 7-м нэсыгъ. Ар нахь псынкIэ зэрашIыгъэм щэч хэлъэп, сыда пIомэ анахь машинэ къызэрыкIохэмкIи метри 5-м зыкъыщыбгъэзэныр IэшIэхыгъэп, — къыхигъэщыгъ Натхъо Рустам.
Мотоциклэхэр зезыфэщтхэм фитыныгъэр къыдахынымкIэ атырэ ушэтыным бэп зэхъокIыгъэр. Ушэтыныр зытырэр къызэкIакIозэ къэуцупIэм итранспорт дигъэуцонэу зэрэщытыгъэр хагъэкIи, ащ ычIыпIэ джы «колейная доска» зыфиIорэм рыкIон фаеу ашIыгъ.
ПIалъэр зэкIахьагъ
Водитель хъущтхэм икIэрыкIэу атыжьыщт ушэтынхэм апылъ пIалъэм зэрахагъэхъуагъэм Iофыр къафигъэхьылъагъ. Ар анахьэу зыфэгъэхьыгъэр уцугъуищырэ мэфи 7 къадафэу, ушэтынхэр зытын зымылъэкIыгъэхэр ары. ЯплIэнэрэ ыкIи ащ къыкIэлъыкIорэ къэкIогъухэр мэзи 6-м нахь мыпасэу ыкIи мэзи 9-м нахь мыкIасэу ушэтынхэм ахагъэлэжьэщтхэп (зэрэщытыгъэр зы мазэ зытешIэкIэ ыкIи мэзищым нахь мыкIасэу).
— Джы водитель хъу зышIоигъохэм нахь куоу зефэнымкIэ шIэныгъэхэр зэрэзэрагъэгъотыщтым пылъынхэ фае. Сыда пIомэ мэзихым къыкIоцI практикэр зимытышъукIэ, теориеу ытыгъагъэм кIуачIэ иIэжьырэп. Джащ фэдэу зефэным ифитыныгъэ къыдэзыхы зышIоигъохэр зычIэхьащтхэ еджапIэхэм ятхылъхэр тэрэзхэмэ ыпэрапшIэу зэрагъэшIэн фае. ГущыIэм пае, ушъхьагъу зэфэшъхьафхэм апкъ къикIыкIэ егъэджэнымкIэ фитыныгъэу автоеджапIэм иIэм ипIалъэ икIыгъэу еджакIор къычIагъэкIыгъэ зыхъукIэ, къыратыгъэ свидетельствэм кIуачIэ иIэщтэп ыкIи ушэтыным ар рагъэкIолIэщтэп, — къыхигъэщыгъ тигущыIэгъу.
КIуачIэ ямыIэжь хъущт
ЫпшъэкIэ зигугъу къэтшIыгъэ зэхъокIыныгъэхэм адакIоу, транспорт амалхэр зефэгъэнхэм ифитыныгъэ яIэным фэгъэхьыгъэ хэбзэгъэуцугъэм гъэтэрэзыжьынэу фашIыгъэхэм ащыщхэми кIуачIэ яIэ хъугъэ. Ар анахьэу зыфэгъэхьыгъэр IэкIыб къэралыгъохэм къарыкIыгъэ водительхэр ары. ЦIыфым «вид на жительство» зыфиIорэр къыратыфэ е Урысыем игражданин мэхъуфэ нэмыкI къэралыгъом къыщыратыгъэ водительскэ лъэпкъ удостоверениемкIэ мыщ щызекIон фит. Нэужым зефэнымкIэ фитыныгъэу иIагъэр Урысыем щаштагъэмкIэ зэблихъунэу щыт. Ащ пае илъэс пIалъэ къыраты. А уахътэр зытешIэкIэ, яудостоверение кIуачIэ имыIэжь мэхъу.
— 2025-рэ илъэсым мэлылъфэгъум и 1-м нэс IэкIыб къэралыгъо лъэпкъ ыкIи дунэе водительскэ удостоверениехэр зиIэхэм ушэтынхэр амытхэу тикъэралыгъо иемкIэ зэблахъунхэ алъэкIыщт. Ащ къыхиубытэхэрэр IэкIыб къэралыгъом ицIыфхэу е гражданствэ зимыIэхэу 2024-рэ илъэсым мэлылъфэгъум и 1-м ыпэкIэ урысые «вид на жительство» зыфиIорэр къызэратыгъэхэр ары. Джащ фэдэу Урысые Федерацием ицIыфхэу, ау IэкIыб къэралыгъом щеджэхи, ащ фитыныгъэр къащаратыгъэу 2024-рэ илъэсым мэлылъфэгъум и 1-м ыпэкIэ мыщ къэкIожьыгъэхэми ар афэгъэхьыгъ, — къыIуагъ инспекторым.
ГущыIэм пае, Урысыем щыщ автомобилистыр Тыркуем, Грузием, Таиланд е Испанием (нэмыкI къэралыгъоми) машинэр зэрифэным ифитыныгъэ къыщыратыгъэмэ, 2024-рэ илъэсым мэлылъфэгъум и 1-м ыпэкIэ Урысыем къэкIожьыгъэмэ, илъэсым къыкIоцI ушэтынхэр ымытыхэу ащ иудостоверение зэблихъун ылъэкIыщт. Ау ар а пIалъэм ыуж къэкIожьыгъэ зыхъукIэ, теориемкIэ ушэтыныр рагъэтыщт. Автомобиль псынкIэр зэрифэным ифитыныгъэмэ иIэр, ау автобус е хьылъэзещэ транспортым арысынэу фае зыхъукIэ, икIэрыкIэу еджэжьынэу хъущт.
Документхэм язытет
Водительскэ удостоверение къыдэхыгъэнымкIэ тхылъэу ищыкIагъэхэр агъэнэфагъэх. Ушэтыныр птыгъахэу паспортым е медицинэ справкэм япIалъэ икIыгъэ зыхъукIэ, ахэр кIэу къыдэохыжьыфэ зефэным ифитыныгъэ къыуатырэп. Мэлылъфэгъум и 1-м ыпэкIэ ушэтыныр зыщатыщтыгъэ пIалъэм ахэм язытет тэрэзыгъэмэ, удостоверениер къаратыжьыщтыгъ. Джащ фэдэу джы шIокI имыIэу СНИЛС-м иномер яптынэу щыт. Ар хэмылъэу ушэтыным урагъэкIолIэщтэп. Ушэтыныр зэритыщтымкIэ лъэIу тхылъыр къэралыгъо фэIо-фашIэхэм я ПорталкIэ автоинспекцием ыгъэхьыгъэ зыхъукIэ, СНИЛС-м иномер ежь-ежьырэу аIэкIэхьэ.
Транспорт амалхэр зефэгъэнхэм ифитыныгъэ къыдэхыгъэным фэгъэхьыгъэ хэбзэгъэуцугъэм зэхъокIыныгъэу фашIыгъэхэм шIуагъэу къатыщтыр уахътэм къыгъэлъэгъощт.
Iэшъынэ Сусан.