ТекIоныгъэм и Ма­фэ ипэгъокIэу Хэ­гъэгу зэошхом иве­теранхэм шъолъыр ахъщэ тынхэр афа­тIупщыщтых.

Непэ республикэм заом иветеран 81-рэ щэпсэу. Хаб­зэ зэрэхъугъэу, ахэм зэкIэми мэфэкIым ипэгъокIэу сомэ мини 100 зырыз аIу­кIэщт. Зэтыгъо мылъкур къэ­­кIопIитIукIэ гъэпсыгъэ мэ­хъу — республикэм ибюджетрэ Шъэумэн Хьазрэт ыцIэ зы­хьырэ Адыгэ республикэ общественнэ шIушIэ фондрэ зэфэдизэу къахэхыгъэу.
ЗэокIыбым щылэжьагъэ­хэм, Хэгъэгу зэошхом сэ­къатныгъэ хэзыхыгъэхэм ыкIи хэлэжьагъэхэм яшъузабэхэм джащ фэдэу сомэ мини 5 зырыз афатIупщыщт. Ахэм япчъагъэу республикэм щыпсэурэр — нэбгырэ 823-рэ.
ПэшIорыгъэшъэу, ТекIоныгъэм и Мафэ ипэгъокIэу, социальнэ IэпыIэгъур зытефэхэрэм аIэкIагъэхьанэу КъумпIыл Мурат унашъо афишIыгъ.
«Къэралыгъом имэфэкI шъхьаIэ — ТекIоныгъэм и Мафэ — ипэгъокIэу Адыгеим культурэ ыкIи социальнэ Iоф­тхьэбзабэ щырекIокIы. Хэ­гъэгу зэошхом иветеранхэмрэ зэокIыбым щылэжьагъэхэмрэ тынаIэ атедгъэтыныр, тафэсакъыныр тэ ти­пшъэрылъ. ЛIыхъужъ лIэужэу анахь зэо лъыгъачъэм ихьазаб зыщэчи щытхъу хэлъэу къызэзынэкIыгъэм сыдигъо­кIи тырыгушхощт. ТекIоныгъэу зэуапIэм ыкIи зэокIыбым къыщыдихыгъэр тикъэралыгъо зэрэзэщымыгъэкъо­шъущтымкIэ егъашIэм итамы­гъэу щытыщт!» — къащи­т­хыгъ Адыгеим и ЛIышъхьэ исоциальнэ нэкIубгъохэм.