ТекIоныгъэм и Мафэ ипэгъокIэу Хэгъэгу ­зэошхом иветеранхэу Иван Дзюбэ, Дмитрий Кузьминыр ыкIи Ни­колай Бурдун тыгъуасэ агъэшIуагъэх. Ащ фэ­гъэ­хьыгъэ Iоф­тхьабзэм Мые­къуапэ идзэ комиссариат кIэща­кIо фэ­хъугъ.

— Илъэс къэс Хэгъэгу зэошхом иветеранхэм тафэгушIо. ГухэкI нахь мышIэми, ахэм ащыщэу псаоу къэнагъэр макIэ. Мыхэм лIыхъужъныгъэу зэра­хьагъэр тщыгъупшэ хъущтэп. ЛIыгъэ зекIуакIэу къахэфагъэм тырэгушхо, ахэм шъхьащэ афэтэшIы. КъыткIэхъухьэрэ лIэужхэр патриотхэу пIугъэнхэмкIэ, заом тарихъ шъыпкъэу пылъыр ахэм агурыгъэIогъэнымкIэ ыкIи зэхашIэнымкIэ IофшIэнышхо зэрагъэцакIэрэмкIэ тафэраз, — къыIуагъ ветеранхэм Iоф адэ­шIэгъэнымкIэ АР-м идзэ комиссар иIэпыIэгъоу Валерий Боцман.
Ветеран лъапIэхэм адэжь кIохэзэ афэгушIуагъэх. Пэублэм ахэр зыщыпсэухэрэ унэ щагухэм дзэ оркестрэм имэкъэмэ жъынчхэр ащагъэIугъэх ыкIи дзэкIолIхэр зыхэт парад цIыкIу афызэхащагъ.
Апэу зэблэгъагъэхэр Иван Дзюбэ дэжь. Ар 1925-рэ илъэсым щылэ мазэм и 4-м къэ­хъугъ. Хэгъэгу зэошхор къызе­жьэм ныбжьыкIагъ нахь мы­шIэми, а мэфэ къинхэр ишIэжь пытэу къыхэнагъэх ыкIи хэз имыIэу дэгъоу къеIотэжьых. Иван Дзюбэ 1943-рэ илъэсым заом Iухьагъ, пулемет взводым ипэщагъ, апэрэ Белорусскэ фронтым Iутэу зэуагъэ. ТекIоныгъэр къызыдахым ыуж дзэм къыхэкIыжьыгъэп, 1949-рэ илъэ­сым иунагъо игъусэу ветераныр Мыекъуапэ къэкощыжьыгъ. Жъогъо Плъыжьым, Хэгъэгу зэошхом иорденхэр, нэмыкI тын лъапIэхэр къыфагъэшъошагъэх.
Ыныбжь емылъытыгъэу Иван Дзюбэ непи республикэм иобщественнэ щыIакIэ чанэу хэлажьэ, кIэлэеджакIохэм, ныбжьыкIэхэм зэIукIэгъу-зэдэгущыIэгъухэр адешIых, яхэгъэгу шIу алъэгъоу пIугъэнхэм фе­гъасэх.

Нэужым Дмитрий Кузьминым дэжь щыIагъэх. Ащ ыныбжь мыгъэ илъэси 102-рэ мэхъу. Мыр тIогъогогъо ЛIыхъужъэу алъытэрэ цIыфхэм ащыщ. Илъэ­сиплI зэо гъогухэр зэпичыгъэх, Кенигсберг ипытапIэ изэхэкъу­тэн, иштэн ахэтыгъ. Зэо илъэс­хэм я 3-рэ Белорусскэ фронтым ишхончэо полк къулыкъур щихьыгъ. Щытхъум иорденэу я III-рэ шъуашэ зиIэр, медальхэу «За взятие Будапешта», «За победу над Германией» зыфи­Iохэрэр къыфагъэшъошагъэх. Дмитрий Кузьминыр щыIэны­гъэр шIу зылъэгъурэ цIыф. Ар нэшIо-гушIоу хьакIэхэм къазэ­рапэгъокIыгъэм дакIоу, усэу ытхыгъэхэм къафеджагъ. Зэо лъэхъаныр ыкIи ащ ыуж къыкIэ­лъыкIогъэ щыIэныгъэр къизы­IотыкIырэ купкI зыхэлъ усабэ ащ ытхыгъ ыкIи ахэр зэхэугъоя­гъэхэу зыдэхьэгъэ тхылъ къыдигъэкIыгъ.
Джащ фэдэу Дмитрий Кузьминым фэгушIонэу къэкIуа­гъэхэм ащыщ я 227-рэ Мые­къопэ артиллерийскэ бригадэм ивзвод икомандир игуадзэу Андрей М. ЗэолIхэм ветераным къыфатхыгъэ письмэхэр, гъэзетэу «Правда» зыфиIорэм къихиутыгъэгъэ капитуляцием исурэт нэпэеплъ, ТекIоныгъэм ибыракъ ыкIи дзэкIолIым идзыо зэдэлъ шIухьафтынэу къыфа­хьыгъ.
— Сэ хэушъхьафыкIыгъэ дзэ операцием апэрэ мафэхэм къащегъэжьагъэу джы къызнэсыгъэм сыхэт. Шъо, тятэжъхэу пыим пэуцужьыгъэхэм афэдэу тэри непэ фашистхэм тябэны. ТекIоныгъэм ибыракъэу къытфэшъухьыгъэр пыим къыIэкIэтхыжьырэ къалэхэм ащыд­гъэуцунэу шъутэгъэгугъэ, Те­кIоныгъэр тиеу къэдгъэзэжьыщт! — хигъэунэфыкIыгъ Андрей М.
Нэужым Хэгъэгу зэошхом иветеранэу Николай Бурдун фэгушIуагъэх. Ар 1944-рэ илъэ­сым иIоныгъо мазэ къыщегъэ­жьагъэу 1945-м жъоныгъуакIэм нэс зэпэуцужьхэм ахэлэжьагъ. Апэрэ Украинэ фронтым ия 969-рэ шхончэо полк ия 273-рэ шхончэо дивизие къулыкъур щихьыгъ. Медальхэу «За боевые заслуги» ыкIи «За победу над Германией» зыфиIохэрэр къыфагъэшъошагъэх.
Iэшъынэ Сусан.