ГъогурыкIоным ишапхъэхэмкIэ IэпэIасэх
Урысые зэнэкъокъоу «Щынэгъончъэ щэрэхъ-2024-рэ» зыфиIорэм иреспубликэ едзыгъо джырэблагъэ Мыекъуапэ щыкIуагъ.
Ыпэрэ илъэсхэм афэдэу, зэнэкъокъум имуниципальнэ едзыгъохэм апэрэ чIыпIэр къащыдэзыхыгъэхэр шъолъыр едзыгъом хэлэжьагъэх. ПстэумкIи команди 10 хъущтыгъэх, ахэм якIэлэегъаджэхэри къадэкIуагъэх.
МэфэкI шIыкIэм тетэу къызэIуахыгъэ Iофтхьабзэм хэлэжьагъэх АР-м гъэсэныгъэмрэ шIэныгъэмрэкIэ и Министерствэ илIыкIоу Афэунэ Рэмэзан, гъогурыкIоныр щынэгъончъэнымкIэ къэралыгъо инспекцием и ГъэIорышIапIэу АР-м щыIэм пропагандэмкэ иотдел ипащэу, полицием иподполковникэу Бзэджэжъыкъо Мурат, кIэлэцIыкIухэм яфитыныгъэхэр къэухъумэгъэнхэмкIэ Уполномоченнэм иаппаратэу АР-м щыIэм илIыкIоу Татьяна Мельченкэр.
НыбжьыкIэ инспекторхэр «Автогородокым» щызэрэугъоигъэх ыкIи мы лъэныкъомкIэ яшIэныгъэхэр къагъэлъэгъуагъ. «Анахь дэгъу» цIэм зэрэфэбэнагъэхэм имызакъоу, гъогурыкIоным ишапхъэхэр зэрагъэцакIэхэрэр ялэгъухэмкIэ щысэшIу хъуным щэгугъых.
ГъогурыкIоным ишапхъэхэм хэшIыкIэу фыряIэр, пэрыохъухэр къаухьэхэзэ кушъхьэфачъэр дэгъоу зэрафэн зэралъэкIырэр, зы творческэ номер къагъэлъэгъуагъ. Ащ дакIоу гъогу хъугъэ-шIагъэхэм ахэфагъэхэм апэрэ медицинэ IэпыIэгъур зэрарагъэгъотыщт шIыкIэм зэрэфэкъулайхэр нэрылъэгъу къашIыгъ.
ТекIоныгъэр къыдахыным зэкIэ командэхэр фэбэнагъэх. Зэнэкъокъум изэхэщакIохэм къызэрэхагъэщыгъэмкIэ, ухьазырыныгъэ дэгъу кIэлэеджакIохэм къагъэлъэгъуагъ, текIоныгъэм фэбэнагъэх. Ау анахь зэкъотхэу ыкIи гъогурыкIоным ишапхъэхэмкIэ шIэныгъэ дэгъу зиIэу осэшIхэм алъытагъэр Красногвардейскэ районым игимназиеу N 1-м иныбжьыкIэ инспекторхэр ары. ЯтIонэрэ чIыпIэр къыдихыгъ къалэу Мыекъуапэ хэхьэрэ поселкэу Подгорнэм игурыт еджапIэу N 27-м, Джэджэ районым игурыт еджапIэу N 3-р ящэнэрэ хъугъэ.
Iофтхьабзэм хэлэжьэгъэ пстэуми нэпэеплъ шIухьафтынхэр аратыгъэх. Анахь дэгъухэм шIухьафтын лъапIэхэмрэ дипломхэмрэ афагъэшъошагъэх.
Бзэджэжъыкъо Мурат зэнэкъокъум зэфэхьысыжьхэр къыфишIызэ, ныбжьыкIэхэм темыкIуагъэ зэрахэмытыр къыхигъэщыгъ, шIэныгъэу ыкIи IэпэIэсэныгъэ зэрагъотыгъэхэр гъогурыкIоным щынэгъончъэу хэлэжьэнхэмкIэ къазэрашъхьапэщтхэр къариIуагъ.
Урысые зэнэкъокъоу «Щынэгъончъэ щэрэхъ-2024-рэ» зыфиIорэм ифиналэу мэкъуогъум щыIэщтым Адыгеир къыщигъэлъэгъощт поселкэу Севернэм иеджапIэ иинспектор ныбжьыкIэхэм яотряд.