Мыекъопэ къэралыгъо технологическэ университетым студенческэ шIэныгъэ-практическэ конференциеу «Студенческэ шIэныгъэр: ныбжьыкIэмэ яеплъыкI» зыфиIорэр щыкIуагъ.

Университетым иныбжьыкIэ акъы­лышIохэр къэзэрэугъоигъэх яшIэныгъэ ушэтынхэмкIэ зэхъожьынхэу, зэдэгощэнхэу ыкIи лъэныкъо зэфэшъхьафхэмкIэ заушэтынэу. Конференциер гукъэкIмэ, IофыгъуакIэмэ якIыщэу хъугъэ, гукъыдэчъэу щыIэхэр щыIэныгъэм щыпхырыщыгъэнхэм фэIорышIагъ.
Къэбар щынэгъончъэнымкIэ ыкIи информатикэмкIэ кафедрэу Цундышк Вячеслав зипащэм секциеу «Киберщынэ­гъончъэныр, цифрэ тIогъазэхэр, машинэ егъэджэным итехнологиехэр» зыфиIорэр зэхищагъ. Ащ епхыгъэу студентхэр къэ­гущыIагъэх.
Ащ ыуж МКъТУ-м экологиемкIэ ифакультет щызэхащэгъэ зэхэсыгъомкIэ Iофтхьабзэхэр лъагъэкIотагъ. Шъолъырым имэзхэм ягъэфедэн гумэкIыгъоу къыпыкIыхэрэм ыкIи ахэр зэрэдагъэзыжьы­хэрэм ащ щытегущыIагъэх. Адыгэ Рес­публикэм къыщагъэкIырэ чъыг лъэпкъхэу мэхьанэ зиIэхэм якъызэтегъэнэжьын фэгъэхьыгъэ докладхэр ащ къыщашIыгъэх. Тхылъ плъыжьым дэт бзыухэр зэрэкIодыхэрэр, ахэр къэгъэнэжьыгъэнхэмкIэ шIэныгъэлэжьмэ ашIэрэр къыраIотыкIыгъ.
ШIэныгъэ-практическэ конференцием къыдыхэлъытагъэу зэхэсыгъоу «Гъомылэпхъэ системэхэр: непэрэ шIэныгъэ екIолIакIэхэр» зыфиIорэр рагъэкIокIыгъ. Инновационнэ технологиехэр агъэфедэ­хэзэ шхыныгъохэр, гъомылэпхъэ зэфэшъхьафхэр зэрагъэхьазырхэрэр, ахэм апылъ Iофыгъохэм секцием щатегущыIагъэх.

Медицинэ шIэныгъэхэмкIэ докторэу, профессорэу Виктория Попандопуло зэрищагъ зэхэсыгъоу «Актуальные вопросы женского репродуктивного здоровья» зыфиIорэр. Сабыйхэр къызщы­хъухэрэ сымэджэщым иактовэ зал щыкIогъэ Iофтхьабзэм хэлэжьагъ деканэу, медицинэ шIэныгъэхэмкIэ кандидатэу, доцентэу Беслъангъур Заремэ. Секцием я 4 — 6-рэ курсхэм ащеджэрэ студентхэм докладхэр къыщашIыгъэх.
Техническэ шIэныгъэхэмкIэ кандидатэу Гъыщ Симэ зэхэсыгъоу «Развитие ассортимента пищевых продуктов, в том числе функционального и специализированного назначения» зыфиIорэр зэхищагъ. Iофтхьабзэм ипшъэрылъыр зипсауныгъэ лъыплъэхэрэм, зищыIэкIэ- псэукIэ нахьышIу зышIынэу фаехэм ящыкIэгъэ шхыныгъохэр аIэкIэгъэхьэгъэн­хэм фэIорышIэгъэныр ары.
Секциеу «Непэрэ чIыгугъэпсынымрэ кадастрэмрэ язытет: гумэкIыгъохэр, ахэм ядэгъэзыжьын» зыфиIорэм Iоф ышIагъ. Ау хэлэжьагъэхэм чIыгум ыкIи кадастрэм япхыгъэ Iофыгъохэр къаIэтыгъэх, ахэм мэхьанэшхо яIагъ. Анахь доклад дэгъоу къыхагъэщыгъэр студенткэу ХьакIэмызэ Заринэ къыгъэхьазырыгъэр ары, ащ инаучнэ пащэр кIэлэегъаджэу БрантIэ Марзят.
Джащ фэдэу «Современный потребительский рынок: качество и безопасность во внешней и внутренней торговле» зыфиIорэ секцием Iоф ышIагъ.
Конференцием къыдыхэлъытагъэу секциеу «Психологием ыкIи педагогикэм яIофыгъо шъхьаIэхэр» зыфиIорэм Iоф ышIагъ, ар зэхищагъ МКъТУ-м философиемкIэ, социологиемкIэ, педагогикэмкIэ икафедрэ идоцентэу Пэфыф Бэлэ. УпчIэу ащ къыщаIэтыгъэхэр зэкIэ цIыфым ищыIэкIэ-псэукIэ епхыгъагъ. Ащ хэхьэх социальнэ хъытыухэм ягъэзекIон, радикализациемрэ экстремизмэмрэ апэшIуекIогъэнымкIэ психологием мэхьанэу иIэр, нэмыкIхэри.
Секциеу «Актуальные вопросы экономики и управления: теоретические и прикладные аспекты» зыфиIорэр Урысыем зэрихьэрэ къэралыгъо политикэм илъэныкъо шъхьаIэхэр организациехэм тэрэзэу агъэфедэнхэм, шъолъырхэм хэхъоныгъэхэр ягъэшIыгъэнхэм афэгъэ­хьыгъагъ. А темэмкIэ анахь дэгъоу къы­хагъэщыгъ студенткэу Хьакъунэ Азидэ къыгъэхьазырыгъэр. Ащ инаучнэ пащэр экономикэ шIэныгъэхэмкIэ докторэу, профессорэу Владимир Зарубиныр ары. Студенткэу Ирина Казаковам идокладэу «Инструменты выбора в про­цессах принятия решений» зыфиIорэри анахь дэгъухэм ахэлэжьагъ.
Iофтхьабзэм къыдыхэлъытагъэу «Парафармацевтическэ продукцием идэгъу­гъэ фэгъэхьыгъэ упчIэхэр» зыфиIорэ Iэнэ хъурае рагъэкIокIыгъ. Ащ кIэлэ­егъаджэхэр, фармациемкIэ кафедрэм истудентхэр, Урысые проектэу «Сириус. Гъэмафэр. Уипроект егъажь» зыфиIорэм хэтхэр хэлэжьагъэх. Мы лъэныкъом епхыгъэ Iофыгъохэм атегущыIагъэх, товармэ, Iэзэгъу уцмэ язытет зэха­фыгъ. Псауныгъэм икъэухъумэн лъыплъэрэ Федеральнэ къулыкъум иIофышIэу Борис Бочкаревыр Iэнэ хъураем иIоф­шIэн хэлэжьагъ.
Студенческэ шIэныгъэ-практическэ конференциер университетымкIи шIэныгъэлэжьхэмкIи мэхьанэшхо зиIэ Iоф­тхьабзэу хъугъэ.
Хэутыным фэзыгъэхьазырыгъэр Дэрбэ Тимур.
Сурэтхэр: МКъТУ-м ипресс-къулыкъу