Урысые зэнэкъокъоу «Аграрий» зыфиIорэм иаужырэ уцугъо мы мафэхэм Мыекъопэ къэралыгъо технологическэ университетым щыкIуагъ.

Мэкъу-мэщым ылъэныкъокIэ гурыт сэнэхьат зэзыгъэгъотырэ студентхэм ягухэлъхэр ыкIи япроектхэр мыщ къыщыраIотыкIыгъэх.
Мы илъэсым Адыгэ Республикэм имызакъоу, шъолъыри 9-мэ ащыщ нэбгырэ 56-рэ апэрэ уцугъом хэлэжьагъэх. ПэIудзыгъэ шIыкIэр къызфагъэфедэзэ Дагъыстаным, Краснодар, Ставропольскэ, Красноярскэ крайхэм, Ростовскэ, Белгородскэ, Иркутскэ, Оренбургскэ шъолъырхэм ащыщхэм яшIэныгъэхэр къагъэлъэгъуагъ. Анахь дэгъоу къыхахыгъэ нэбгырэ 28-р финалым ихьагъэх ыкIи очнэ шIыкIэм тетэу япроектхэр къыраIотыкIыгъэх.
— Мыгъэ ятфэнэрэу мы зэнэкъокъур зэхэтэщэ, къыхэгъэщыгъэн фае илъэс къэс хэлажьэхэрэм япчъагъэ зэхапшIэу зэрэхахъорэр. Лъэныкъуи 5-кIэ зэтеутыгъэу зэнэкъокъур кIуагъэ. Проект пэпчъ мэкъу-мэщым ылъэныкъокIэ зигъо къэсыгъэ Iофыгъохэр, гумэкIыгъохэр къыщыраIотыкIыгъэх, хэхъоныгъэхэр ышIынхэмкIэ хэкIыпIэу алъэгъухэрэр къаIуагъ. Нэбгырэ пэпчъ зэрифэшъуашэу зыкъыгъэлъэгъуагъ, — къыIуагъ Мыекъопэ къэралыгъо технологическэ универси­тетым мэкъу-мэщымкIэ кафедрэм ипащэу Мамсыр Нурбый.
ТекIоныгъэ ыкIи хагъэунэфыкIырэ чIыпIэ къыдэзыхыгъэхэр мы университетым чIэхьанхэмкIэ балл тедзэу 10-рэ, 8-рэ къафыхагъэхъощт.
ДЕЛЭКЪО Анет.
Сурэтыр: МКъТУ-м ипресс-къулыкъу.