«ЦIыфым игугъу ашIыфэ псэущт» аIо сыдигъокIи. Шъхьэлэхъо Абу непэ ­къытхэмытыжьми, ащ иIофшIагъэу къыгъэна­гъэхэм осэшхо яI. Икъо­джэгъухэм, Iоф дэзы­шIа­­гъэхэм, ригъэджагъэ­хэм ар ащыгъупшэрэп.

Теуцожь районым ит къуа­джэу Очэпщые мэлылъфэгъум и 19-м, 1929-рэ илъэсым ар къыщыхъугъ. Мы мафэм ехъу­лIэу икъоджэ гупсэ дэт культурэм и Унэ ыкIи модельнэ къоджэ тхылъеджапIэм Iоф­тхьэ­бзэ гъэшIэгъон щызэхащагъ. Осэшхо зыфашIырэ якъоджэ­гъоу, зэлъашIэрэ адыгэ литературоведэу, филологие шIэны­гъэхэмкIэ докторэу, профессо­рэу, академикэу ыкIи Урысые Федерациемрэ Адыгэ Респуб­ликэмрэ шIэныгъэмкIэ язаслуженнэ IофышIэу Шъхьэлэхъо Абу ар фэгъэхьыгъагъ.
Iофтхьабзэм къырагъэблэ­гъагъэх гурыт еджапIэм икIэлэ­еджакIохэр. Абу ищыIэныгъэ гъогу, игъэхъагъэхэр ахэм къа­фаIотагъ. Илэгъухэм иакъылкIи, игупшысэкIи, ицIыфыгъэкIи къа­хэщэу зэрэщытыгъэмкIэ зэдэгущыIэгъур аублагъ. Шъхьэлэхъо Абу тхыгъэ 400-м ехъу иI, тхылъ 30 къыдигъэкIыгъ. Адыгабзэм ыкIи адыгэ литературэм язэ­гъэшIэн иIахьышхо хилъхьагъ. Гурыт еджапIэхэм апае тхылъхэр, егъэджэн программэхэр зэхигъэуцуагъэх.
Общественнэ-политическэ организациеу «Адыгэ Хасэм» изэхэщакIохэм ар ащыщыгъ, илъэси 7-рэ итхьамэтагъ. Общественнэ движениеу «Комитет 40» зыфиIорэм ипэщагъ, джащ фэдэу абхъазхэм IэпыIэгъу афэхъугъэнымкIэ комитетми иIэ­шъхьэтетыгъ. «Адыгеим и Щытхъузехь» зыфиIорэ медалыр къыфагъэшъошагъ. Адыгэкъалэ ыкIи къуаджэхэу Очэпщые, Щынджые, Аскъэлае яцIыф гъэ­шIогъагъ.
— Шъхьэлэхъо Абу зымы­шIэрэ е ыцIэ зэхэзымыхыгъэрэ республикэм исэп пIоми ухэу­къощтэп, дахэкIэ, дэгъукIэ ащ игугъу ашIы. Тикъуаджэ мыщ фэдэ цIыф къызэрэдэкIыгъэм тырэгушхо, ащ ишIэжь дгъэлъэ­пIэныр, къыткIэхъухьэрэ лIэ­уж­хэм ядгъэшIэныр ары тэ типшъэ­рылъыр. Еджэгъу программэм къыдыхэлъытагъэу литерату­рэмкIэ проектхэр агъэхьазыры хъумэ, Шъхьэлэхъо Абу итхыгъэхэр IэпыIэгъушIу мэхъух. Мы мафэм ехъулIэу итхыгъэхэр ыкIи гъэзетэу къызэрыхьагъэхэр зыхэт къэгъэлъэгъони зэхэт­щагъ. КIэлэеджакIохэм ашIо­гъэшIэгъонэу къыхэлэжьагъэх, — къыIуагъ Очэпщые тхылъеджапIэм ипащэу Бэшкэкъо Заремэ.
Iофтхьабзэм къыдыхэлъытагъэу видеотехыгъэхэр ныбжьыкIэхэм къафагъэлъэгъуагъэх. Культурэм и Унэ ипащэу Апэзэо Нуриет агъэлъэпIэрэ якъоджэгъу фигъэхьыгъэ усэмкIэ зэхахьэр зэфашIыжьыгъ.
ДЕЛЭКЪО Анет.