2025-рэ илъэсым зэтырагъэпсыхьащт общественнэ чIыпIэхэм якъыхэхын фытегъэпсыхьэгъэ Урысые мэкъэтынхэм япэшIорыгъэшъ кIэуххэр къэнэфагъэх.

Адыгеим и ЛIышъхьэ и Телеграм-нэкIубгъо къызэрэщитхыгъэмкIэ, республикэм щыпсэухэрэр хэдагъэх ыкIи чIыпIищмэ амакъэ афатыгъ. МыекъуапэкIэ текIоныгъэр къыдихыгъ площадэу Лениным ыцIэ зыхьырэм. Инэм къэлэ псэупIэм щыпсэу­хэрэм амакъэхэр зыфатыгъэр псэупIэу Дружнэм дэт кIэлэцIыкIу площадкэр ары. Поселкэу Яблоновскэм дэсхэм къыха­хыгъ урамэу Кочубей ыцIэ зыхьырэм тет кIэ­лэцIыкIу-спорт площадкэр.
— Рейтинг мэкъэтыным Адыгеим щыпсэурэ нэбгырэ 42 433-рэ хэлэжьагъ. Ахэм чанэу зыкъызэрагъэлъэгъуагъэмкIэ инэу сафэраз. ШэпхъэшIухэм адиштэу зэтырагъэпсыхьащт общественнэ чIыпIэхэм типсэупIэхэр нахь Iэрыфэгъу зэ­рашIыщтхэм, тицIыфхэм яунагъохэр ыкIи яныбджэгъухэр ягъусэхэу жьы къаб­зэм хэтхэу загъэпсэфын амал зэряIэщтым сицыхьэ телъ. Площадэу Лениным ыцIэ зыхьырэм шъхьафэу сыкъыщыуцумэ сшIоигъу. Мыр общественнэ чIыпIэ шъхьа­Iэу тиI, Мыекъуапэ имызакъоу Адыгеим зэрэпсаоу ынап. Тикъэлэ шъхьаIэ щыпсэухэрэр ыкIи ихьакIэхэр зэрэщызэрэугъо­ихэрэм дакIоу, Iофтхьабзэхэр ыкIи мэфэкIхэр щырагъэкIокIых, — къыхигъэщыгъ республикэм ипащэ.
Лъэпкъ проектэу «ПсэупIэр ыкIи къэ­лэ щыIакIэр» зыфиIорэм къыдыхэлъытагъэу мыр щыIэныгъэм щыпхыращы.