АР-м исурэт къэгъэлъэгъуапIэ Хэгъэгу зэошхом фэгъэхьыгъэ къэгъэлъэгъон къыщызэIуахыгъ.

Урысые Федерацием культурэмкIэ изаслуженнэ IофышIэу, Адыгеим ыкIи Къэрэщэе-Черкесым язаслуженнэ сурэтышIэу Бырсыр Абдулахь ащ фэгъэхьыгъэ зэхахьэм пэублэ псалъэ къыщи­шIыгъ.
— Хэгъэгу зэошхом илъэхъан фашистхэм якIочIэ анахь лъэшхэм тидзэ­кIолIхэр зэрапэуцужьыгъэхэр, лIыхъужъныгъэшхо хэлъэу тигъунапкъэхэр къызэрагъэгъунагъэхэр, япшъэрылъхэр щытхъу хэлъэу зэрагъэцэкIагъэхэр сурэтышIхэм яIофшIагъэхэмкIэ къы­рагъэлъэ­гъукIыгъ. Мыщ фэдэ сурэтхэр тиныбжьыкIэхэм ядгъэлъэгъумэ, тихэгъэгу итарихъ щыгъозэщтых, ТекIоныгъэ­шхом имэхьанэ зэхашIэщт. Сурэт пэпчъ фэбагъэ горэ къыбгъодэкIы, чIыопсым идэхагъэ, уашъом икъэргъуа­гъэ нэры­лъэгъу къыпфешIы, зэошхом ихьазаб къыплъагъэIэсы, — къыIуагъ Бырсыр Абдулахь.
Iофтхьабзэр лъигъэкIотагъ Адыгеим исурэтышIхэм я Союз итхьаматэу Елена Абакумовам.
— НыбжьыкIэхэм яхэгъэгу шIу алъэ­гъуныр, ятарихъ, тинахьыжъхэм лIыхъужъ­ныгъэу зэрахьагъэр ашIэныр ары пшъэ­рылъ шъхьаIэу тиIэр. Хэгъэгу зэошхом тихэгъэгу ищыIакIи, итарихъи зэрихъокIыгъэх, унагъо пэпчъ лъыIэсыгъ. Хьазабышхоу тицIыфхэм ащэчыгъэр сурэт пэпчъ щыпхырыщыгъ, — къыIуагъ Е. Аба­кумовам.
Iофтхьабзэр Адыгэ Республикэм исурэт къэгъэлъэгъуапIэ жъоныгъуакIэм и 12-м нэс щыкIощт. Пушкинскэ картэмкIэ ащ учIэхьан плъэкIыщт.
Лъэпшъыкъо Фатим.
Сурэтыр: Iэшъынэ Аслъан.