АР-м и ЛIышъхьэу КъумпIыл Мурат иунашъокIэ жъоныгъокIэ зыгъэпсэфыгъохэм яхъулIэу республикэм гъэкъэбзэн шэмбэт шIыхьафхэр щыкIуагъэх.

Ахэм ахэлэжьагъэх хэбзэ къулыкъухэр, общественнэ ыкIи сатыу организациехэр, волонтерхэр.
АР-м тыкъэзыуцухьэрэ дунаир къэухъумэгъэнымкIэ ыкIи чIыопсым икъэкIуапIэхэмкIэ и ГъэIорышIапIэ къызэрэщытаIуагъэмкIэ, нэбгырэ мин 11 фэдиз шIыхьафым хэлэжьагъ, хэушъхьафыкIыгъэ техникэу 127-рэ агъэфедагъ. Агъэкъэбзагъэр гектар 200 фэдиз. Джащ фэдэу чъыг 300 агъэтIысхьагъ, зылъапсэ аигъэхэр мин 11-м ехъу. ЗэкIэмкIи хэкIэу кубометрэ 1332-м ехъу аугъои дащыгъ.