Гъатхэмрэ IофшIэнымрэ я Мафэ фэгъэхьыгъэ Iофтхьэбзэ зэфэшъхьафхэр Адыгеим икъэлэ шъхьаIэ щыкIуагъэх. Урамэу Краснооктябрьскэм (культурэм и Унэу «Гигантымрэ» къэлэ паркым идэхьэгъурэ азыфагу) къэгъэлъэгъонэу «IэпэIасэхэм якъал» зыфиIорэр къыщызэIуахыгъагъ. Мыекъуапэ иIэпэIасэхэм яIэшIагъэхэр мыщ къыщагъэлъэгъон алъэкIыгъ.

ШIоигъоныгъэ зиIэ пстэури зыхэлэжьэгъэ мастер-классхэр культурэм и Унэ къыпэIулъ чIыпIэм щызэхащагъэх. Сурэт­шIынымкIэ, нэпэеплъ шIухьафтынхэм ягъэхьазырынкIэ къекIолIагъэхэм заушэтын амал яIагъ, джащ фэдэу ахэр викторинэм хэлэжьагъэх.
Къэлэ зэнэкъокъум къыдыхэлъыта­гъэу, «ТекIоныгъэр кIэлэцIыкIухэм ясурэтшIыгъэхэмкIэ» зыфиIорэ къэгъэлъэгъоныр «Гигантым» къыщызэIуахыгъ.
ЖъоныгъуакIэм и 1-р игъэкIотыгъэу къэлэ паркым щыхагъэунэфыкIыгъ. ЗэлъашIэрэ меценатэу Шъэумэн Хьазрэт ишIушIэ Iофтхьабзэ къыдыхэлъытагъэу, ыпкIэ хэмылъэу зэкIэ аттракционхэм кIэлэцIыкIухэр арысынхэ амал яIагъ.
Творческэ купхэм эстрадэ чIыпIэу «Ракушка» зыфиIорэм къыщатыгъэ концертхэм цIыфхэр ягуапэу еплъыгъэх.
ТидзэкIолIхэм адыра­гъаштэу
Гъатхэмрэ IофшIэнымрэ я Мафэ тефэу хэушъхьафыкIыгъэ дзэ операцием хэлажьэхэрэм зэрадырагъаштэрэр, зэра­къот­хэр къизыIотыкIырэ автопробег Мыекъуапэ щыкIуагъ.
Дзэ-патриотическэ клубэу «Новобранец» зыфиIорэм общественнэ организациеу «Боевое братство», къэзэкъхэр, десантникхэр, нэмыкIхэр иIэпыIэгъухэу зэхищэгъэ Iофтхьабзэм нэбгырэ 70-рэ фэдиз хэлэжьагъ.
Урысыем, Адыгеим, ТекIоныгъэм ябыракъхэр агъэбыбатэхэзэ, машинэхэр зэхэтхэу къалэм иурам шъхьаIэхэм къарыкIуагъэх.
Мыекъуапэ и Темыр лъэныкъокIэ щыIэ зэхэт саугъэтхэм адэжь аужырэ чIыпIэу къыщыуцугъэх. Iофтхьабзэм хэлажьэхэрэм щымыIэжь тилIыхъужъхэм яшIэжь агъэлъапIэзэ, егъэшIэрэ машIом къэгъагъэхэр кIэралъхьагъэх.