«Кавказым иналмэс-налкъут» зыфиIорэ зекIо мэшIокум иIофшIэн мыгъи лъегъэкIуатэ. Мы илъэсымкIэ апэрэ дэкIыгъор иIагъ ыкIи игъогууанэ къыдыхэлъытагъэу Мыекъуапэ къыщыуцугъ.

Шъугу къэдгъэкIыжьын, зекIо мэшIокум ящэнэрэ илъэс хъугъэу Iоф ешIэ. Москва къыщеублэшъ, Ростов-на-Дону, Мыекъуа­пэ, Владикавказ, Грознэм, Дербент, Махачкала, Налщык къащэуцу, шъолъырым илъэгъупхъэ чIыпIэхэм, чIыопсым, тарихъым ыкIи культурэм зы мафэм къыкIоцI зекIохэм нэIуасэ зыфашIы. КIоцI зекIоным зегъэушъомбгъу­гъэныр ыкIи шъолъырхэм цIыфхэр на­хьыбэу къящэлIэгъэнхэр пшъэрылъ шъхьаI.
Мыгъэрэ апэрэ мэшIокум зекIо нэбгыришъэ фэдиз Адыгеим къыщагъ. Хабзэ зэрэхъугъэу адыгэ мэкъамэхэмкIэ ыкIи лъэпкъ шхыныгъохэмкIэ Мыекъуапэ имэшIоку уцупIэ хьакIэхэм щапэгъокIыгъэх.
— Типшъэрылъыр зекIонымкIэ шъолъы­рым амалэу иIэр, культурэр, чIыопсыр хьакIэхэм ядгъэлъэгъуныр ары. Зы ма­фэм ар къиными, программэ гъэшIэгъон афызэхэдгъэуцагъ. БлэкIыгъэ илъэсхэм къызэрагъэлъэгъуагъэмкIэ, зекIохэм ар агу рехьы. Бэхэм ятIонэрэуи Адыгеим къагъэзэжьынэу фай, — къыддэгощагъ шъолъыр общественнэ организациеу «Туристическая Адыгея» зыфиIорэм исовет хэтэу Ольга Ивановар.
Адыгеим инэIосэныгъэ зекIохэм Мые­къуапэ щаублагъ. КъокIыпIэ лъэпкъхэм яискусствэкIэ Къэралыгъо музеим икъу­тамэу Адыгеим щыIэм, АР-м и Лъэпкъ музей ахэр рагъэблэгъагъэх. Ахэм ащызэIухыгъэ къэгъэлъэгъонхэм яамалкIэ лъэпкъым итыгъуасэрэ инепэрэ нэIуасэ фашIыгъэх. Ащ ыуж Мыекъопэ районым ащагъэх. ЧIыопсым исаугъэт цIэрыIоу шъолъырым иIэхэм ащыщэу Хьаджыкъо къушъхьэ тIуакIэр арагъэлъэгъугъ, Сырыф псыкъефэххэм анэсыгъэх, къушъхьэтхэу Азэщ ичыжьэплъапIэхэм атыращагъэх. Адыгеим идэхагъэ зэралъэгъугъэм имыза­къоу ишхыныгъохэм яIэшIугъи зэхашIагъ, республикэм ыцIэ чыжьэу зыгъэIугъэ адыгэ къуаер ауплъэкIугъ. А пстэумэ лъэпкъ къашъохэр къяшIэкIыгъагъэх.
— Адыгеим ичIыопс, илъэгъупхъэ чIыпIэхэм, имузейхэм афэгъэхьыгъэ тхыгъабэмэ сяджагъ. Джы а зэкIэ сынэкIэ слъэгъунэу амал згъотыгъэ. ЗекIо мэшIокум апэрэу сыкъифагъ ыкIи сыкIэгъо­жьырэп. Шым сытесынэу, къэлэ паркым сыдэхьанэу, Мыекъуапэ дэт мэщытыр зэзгъэлъэгъунэу сакIэхъопсыщтыгъ, — къыIуагъ Москва щыщ зекIоу Мария Бондаренкэм.
«Кавказым иналмэс-налкъут» зыфиIорэ мэшIокум икъакIо Адыгеим изекIонкIэ хъугъэ-шIэгъэ инхэм яз. АР-м и ЛIышъхьэ ителеграм-нэкIубгъо ар къыщыхигъэ­щыгъ ыкIи шIуагъэрэ тхъагъорэ хэлъэу шъолъырым къеблагъэхэрэм мафэр республикэм щагъэкIонэу афэлъэIуагъ.
Чъэпыогъум и 20-м нэс мыщ фэдэ мэшIоку 20 Адыгеим къеблэгъэщт. Ахэм яшIуагъэкIэ зекIо нэбгырэ минитIу фэдизмэ тишъолъыр нэIуасэ зыфашIыщт ыкIи икIэрыкIэу зэрагъэлъэгъущт.
Анцокъо Ирин.
Сурэтыр: А. Гусев