ЖъоныгъуакIэм и 1-р — Гъатхэмрэ IофшIэнымрэ ямэфэкI
Адыгэ Республикэм щыпсэухэу лъытэныгъэ зыфэтшIыхэрэр!
ТичIыпIэгъу лъапIэхэр!
Мы мэфэкIыр Урысыем щыпсэурэ пстэуми зэфэдэу агъэлъапIэ. Ар ренэу шIум фэIорышIэ ыкIи къэгъэгъэ дахэхэм зэлъаштэгъэ гъэтхэ фабэм итамыгъэу щыт. Адыгеимрэ Урысыемрэ арылъ щыIакIэр нахьышIу шIыгъэным пае тичIыгу гупсэ мамырэу тыщыпсэунэу зэкIэми тызэрэфаер джыри зэ ащ къеушыхьаты.
Непэ тихэгъэгу ыпашъхьэ пшъэрылъышхохэр итых. Ахэм зэшIохыкIэу афэхъущтым бэкIэ елъытыгъэх тиэкономикэ изытетыщтри, тикъэралыгъо инеущырэ мафэ зыфэдэщтри. Урысые обществэм изыкIыныгъэрэ изэкъотныгъэрэ къэтыухъумэхэзэ, тицыхьэ зытелъыжьэу ыпэкIэ тылъыкIотэн, гухэлъэу тиIэхэм такъыфэкIон фае.
IофшIэнымкIэ хэбзэ шIагъоу тиIэ хъугъэхэр къэтыухъумэхэзэ, пшъэдэкIыжьэу тхьырэр зыфэдэр къыдгурыIозэ, ти Хэгъэгу тыфэшъыпкъэу Адыгеимрэ зэдытие Хэгъэгушхоу Урысыемрэ яфедэ зыхэлъ гъэхъагъэхэм тыкъызэрафэкIощтым тицыхьэ телъ.
IофшIэным иветеранхэм, непэ чанэу республикэм фэлажьэхэрэм, ащ ыкIуачIэрэ иамалхэмрэ зыгъэпытэхэрэм лъэшэу тызэрафэразэр къэтэIо.
ТичIыпIэгъу лъапIэхэр, зэкIэми тышъуфэлъаIо псауныгъэ пытэ, щыIэкIэшIу шъуиIэнэу, гъэхъэгъакIэхэр шъушIынхэу, шIоу щыIэр зэкIэ къыжъудэхъунэу!
Адыгэ Республикэм и ЛIышъхьэу, Урысые политическэ партиеу “Единэ Россием” и Адыгэ шъолъыр къутамэ и Секретарэу
КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр