Федеральнэ проектэу «Iэрыфэгъу къэлэ щыIакIэ гъэпсыгъэныр» зыфиIорэм къыдыхэлъытагъэу зэтыра­гъэпсыхьащт чIыпIэхэм якъыхэхынкIэ зэха­щэгъэ мэкъэтыныр зэфа­шIы­жьынкIэ къэнагъэр мэфищ.

Урысыем ишъолъырхэм зэкIэми онлайн шIыкIэм тетэу ар ащэкIо. АдыгеимкIэ къалэу Мыекъуапэ, поселкэхэу Инэм, Яблоновскэр ары чIыпIэу агъэкIэжьыщтхэр къызщыхахыгъэхэр.
Адыгеим икъэлэ шъхьаIэ исаугъэт зэхэтэу «Памяти павших» зыфиIорэр, Лениным ыцIэ зыхьырэ гупчэр ыкIи Свято-Успенскэ чылысым къыпэIулъ чIыпIэр зэнэкъокъум хагъэлэжьэнэу къырагъэуцуагъэхэр.
Поселкэу Яблоновскэм иурамэу Кочубей ыцIэ зыхьырэм тет спортивнэ площадкэр, урамэу Космическэм общественнэ чIыпIэу иIэр, мы урам дэдэм тет кIэлэцIыкIу спортплощадкэр ары къыхахыгъэхэр.
Къэлэ гъэпсыкIэ зиIэ Инэм псэупIэ коимкIэ поселкэу Дружнэм иурамэу Крестьянскэм тет гупчэр, къуаджэу БжыхьэкъоякIэм культурэм и Унэу дэтым къыпэIулъ чIыпIэр ары амакъэ­хэр зыфатыхэрэр.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ мэлылъфэгъум и 25-м къызэриты­гъэмкIэ, МыекъуапэкIэ Лениным ыцIэ зыхьырэ гупчэр апэ ит. Ащ нэбгырэ мин 21,6-м ехъумэ амакъэхэр фатыгъэх. ЯтIонэрэр Свято-Успенскэ чылысым къыпэIулъ чIыпIэр ары, мэкъэ ми­ни 4,1-рэ «къыугъоигъ», саугъэт зэ­хэтэу «Памяти павших» зыфиIорэр нэбгырэ мини 3,5-м ехъумэ къыхахыгъ.
Къэлэ гъэпсыкIэ зиIэ Инэм псэупIэ коимкIэ поселкэу Дружнэм икIэлэ­цIыкIу джэгупIэ апэ ит, мэкъэ мини 3,5-м ехъу фатыгъ, БжыхьэкъоякIэм культурэмкIэ и Унэ дэжь зэтырагъэ­псыхьэмэ нахьышIоу зылъытагъэхэр нэбгырэ мини 2 икъупэрэп.
Поселкэу Яблоновскэр пштэмэ, ащ иурамэу Кочубей ыцIэ зыхьырэм тет кIэлэцIыкIу ыкIи спорт площадкэр ­
мини 4,3-мэ къыхахыгъ, ар ыпэ ит, ура­мэу Космическэм иобщественнэ чIыпIэу къырагъэуцуагъэхэм зым мэкъэ мини 2,5-м ехъу, адрэм миным ехъу­мэ афатыгъ.
ЗэкIэмкIи мы псэупIэхэм адэсэу нэбгырэ мин 42,2-м ехъу мэкъэтыным хэлэжьэгъах. Мэлылъфэгъум и 30-м зэнэкъокъур зэфашIыжьыщт.