IэпыIэгъу псынкIэм емыо­лIэгъэ цIыф щыIэп сIоми сыхэукъонэп сшIошIы. Ащ щылажьэхэрэм ясатырэ хэтэу илъэсыбэ хъугъэу Iоф зышIэрэмэ ащыщых непэ нэIуасэ шъузыфэтшIыщтхэр — Шэуджэн районымкIэ IэпыIэгъу псынкIэм щы­лэ­жьэхэрэ Дзыбэ Аминэтрэ Бислъангъур Толикрэ.

Аминэт Хьакурынэхьаблэ дэт гурыт еджапIэм ыуж Мыекъопэ медицинэ училищым медсестра сэнэхьатыр щызэригъэгъотыгъ. Илъэс 30 хъугъэу IэпыIэгъу псынкIэм Iоф щешIэ.
ЦIыф хьалэл, бэрэчэт, ренэу ынэгу щхыпэр кIэлъэу, гущыIэгъу къызыпфэхъукIэ гур къыдищаеу, сымаджэхэм ариIощт гущыIэ дахэм шъхьамысэу, гукIэгъушхо хэлъэу щыт.
Аминэт исэнэхьат шIу зылъэ­гъурэ, сымаджэхэм зыгу афэузырэ, IэпыIэгъу афэхъуным сы­дигъуи фэхьазыр цIыф.
— Зы мэфэ IофшIэгъум сымаджэу IэпыIэгъу тызыфэхъухэ­рэм япчъагъэ шэпхъэ гъэнэфагъэ хэмылъэу тэлажьэ, — еIо Аминэт. — Iэзэгъу уцхэмкIэ узэ­ряIазэрэм нахьи гущыIэ фабэ зищыкIагъэу зыдэжь тыкIорэр макIэп. НэгушIоу сымаджэм узы­кIэрыхьэкIэ, хъужьыгъэу къыз­щыхъухэрэр къахэкIых. Анахьэу ащ фэдэ чIыпIэ тызырихьылIэщтыгъэр пандемием илъэхъан. Чэщи мафи тимыIэу ахэм агу къыдэтщэеным, IэпыIэгъу тафэхъуным тыпылъыгъ. Охътэ къиныгъ, ау тэ тфэлъэ­кIыщтымкIэ цIыфхэм IэпыIэгъу тафэхъугъ.
Аминэт сымаджэхэм екIолIэкIэ гъэнэфагъэ сыдигъуи къафе­гъо­ты, Iэзэным дакIоу гущыIэ дахэм сымаджэмкIэ мэхьанэу иIэр къы­гурэIо.
Бислъангъур Толик илъэс 30 хъугъэу IэпыIэгъу псынкIэм има­шинэ ис. Ащ егъашIи ымакъэ Iэтыгъэу гущыIагъэп. Сыд фэдэрэ IофшIэн фагъэзагъэми, «хьау» ыIуагъэп. ЦIыфыгъэшхо хэлъ, гукIэгъур ишэн шъхьаI. ГумэкI одыджыным ыуж нахь псынкIэу сымаджэхэм IэпыIэгъур афынигъэсыныр ары ипшъэрылъыр.
— ЦIыфхэм япсауныгъэ къэу­хъумэгъэныр ары медицинэм Iоф щызышIэхэрэм тызфэлажьэ­рэр, — еIо Толик. — IэпыIэгъу псынкIэм ибригадэ гузэжъогъу хэфэгъэ сымаджэм ыдэжь псын­кIэу нэсыным тыпылъ, такъикъ пэпчъ сымэджэ хьылъэмкIэ мэ­хьанэшхо иI. Арышъ, слъэкI къызэрихьырэмкIэ, гъогурыкIоным ишапхъэхэр сымыукъоу, псынкIэу сызэрэнэсыщтыр ары сызэгупшысэрэр.
ШIуагъэ зыхэлъ IофшIэнэу IэпыIэгъу псынкIэм ибригадэ ыгъэцакIэрэм щытхъу къыфехьы, цIыфхэр къащэгугъых, къафэразэх.
Лъэпшъыкъо Фатим.