Лъэпкъ, дин зэгурыIоныгъэр гъэпытэгъэн, ныбжьыкIэхэр экстремизмэм щыухъумэгъэнхэ зэрэфаем иIофыгъохэр къызыщаIэтыгъэ зэхэсыгъор культурэм и Унэу Красногвардейскэ районымкIэ селоу Белэм дэтым джырэблагъэ щыкIуагъ.

Iэнэ хъураем хэлэжьагъэх муниципальнэ образованиеу «Красногвардейскэ районым» ипащэу Т. Гъубжьэкъор, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу А. Шъхьэлахъор, АР-м хэгъэгу кIоцI Iоф­хэмкIэ и Министерствэ эстремизмэм пэуцужьыгъэнымкIэ и Гупчэ иотдел ипащэу Р. ГутIэр, Мыекъопэ къэзэкъ отделым иатаманэу С. Захаровыр, Адыгэ Хасэм итхьаматэ игуадзэу Ю. Хъо­тыр, Адыгэ Республикэмрэ Пшызэ шъолъыррэ ащыпсэурэ быслъымэнхэм я ДиндэлэжьапIэ имуфтий игуадзэу И. Шъхьэлахъор, районым икъоджэ псэупIэхэм, иобщественнэ движениехэм япащэхэр.
Лъэпкъ, дин зэгурыIоныгъэр Красногвардейскэ районым щыгъэпытэгъэнымкIэ къэралыгъо, муниципальнэ хабзэм икъулыкъухэм, хэбзэухъумэкIо къулыкъухэм, обществэм язэдэлэжьэныгъэ нахь зегъэушъомбгъугъэн зэрэфаер Iэнэ хъураем къыщаIуагъ.
Красногвардейскэ районым ипащэу Гъубжьэкъо Темуррэ АР-м лъэпкъ Iоф­хэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэ­хэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэррэ къэзэрэугъоигъэхэм араIуагъ Урысыер зыгъэпыутрэ къэбар нэпцIэу зэрахьэхэрэм зарамыгъэгъэплъэхъунэу. НыбжьыкIэхэм къягоон зылъэкIыщт къэбар щынагъохэр Интернетым къызэрихьэхэрэми ягугъу ахэм къашIыгъ.
Адыгэ Республикэм хэгъэгу кIоцI IофхэмкIэ и Министерствэ экстремизмэм пэуцужьыгъэнымкIэ и Гупчэ иотдел ипащэу ГутIэ Рэмэзан зэщыгъэкъон Iофхэм апылъ интернет-психологхэм яфэмэ-бжьымэ зытехьэгъэ ныбжьыкIэхэр къызэрэпшIэщт шIыкIэм, экстремизмэ нэшанэ зиIэ бзэджэшIагъэхэм ягъогупэ зэрэпабзыкIырэм къатегущыIагъ.
Муниципальнэ образованиеу «Красногвардейскэ районым» ипащэ игуадзэу Александр Ершовыр муниципалитетым исоциальнэ отделхэм Iоф зэрашIэрэм къытегущыIагъ, еджапIэм мыкIорэ кIэлэеджакIохэм къазэракIичыгъэм, гъогу­рыкIонымкIэ шапхъэхэр зыукъохэрэм фыщытыкIэу афыряIэр зэрэзэхъокIы­гъэм, зыныбжь имыкъугъэхэр унагъо ашIэнэу рамыгъэзынхэмкIэ амалэу зэрахьэхэрэм ягугъу къышIыгъ.
Iэнэ хъураем хэлэжьагъэхэм яшIошI­кIэ, тиныбжьыкIэхэр экстремизмэми, терроризмэми ащаухъумэнхэ залъэкIыщтыр лъэпкъ движениехэмрэ хэбзэ къулыкъухэмрэ япащэхэм аIэ зэкIэдзагъэу Iоф зэдашIэ зыхъукIэ ары.