Мы мафэхэм Адыгэ къэралыгъо университетым республикэ олимпиадэу «Я — ГРАЖДАНИН» зыфиIорэм иаужырэ уцугъо щыкIуагъ.

Ащ кIэщакIо фэхъугъэх АР-м хэдзынхэмкIэ и Комиссиерэ АР-м гъэсэныгъэм­рэ шIэныгъэмрэкIэ и Министерствэрэ. Хэдзын фитыныгъэм епхыгъэ шапхъэхэр ныбжьыкIэхэм ягъэшIэгъэныр ары пшъэ­рылъ шъхьаIэу ащ иIэр.
Я 9-рэ классым къыщегъэжьагъэу я 11-м нэс арыс кIэлэеджэкIо 500 фэдиз муниципальнэ уцугъом хэлэжьагъ, ахэм ащыщэу анахь дэгъоу зыкъэзыгъэлъэгъогъэ нэбгырэ 60-р республикэ уцу­гъом къекIолIагъэх.
СыхьатитIурэ кIэлэеджакIохэр зэнэ­къокъугъэх, тест шIыкIэм тетэу заушэтыгъ ыкIи хэдзыныр зэрэкIорэм, хэдзын фитыныгъэм епхыгъэ хъугъэ-шIагъэхэр къыраIотыкIыгъэх.
Зэфэхьысыжьхэм къызэрагъэнэфагъэм­кIэ, анахь къэгъэлъэгъон дэгъухэр зиIэ­хэр Тэхъутэмыкъое районымкIэ гурыт еджапIэхэу N 5-м, 15-м, 25-м, 27-м, МыекъуапэкIэ гурыт еджапIэхэу N 7-м, 15-м, лицееу N 8-у Женя Поповым ыцIэ зыхьырэм, Джэджэ районымкIэ гурыт еджапIэу N 4-м ыкIи Красногвардейскэ районымкIэ гимназиеу N 1-м якIэлэ­еджакIохэр ары.
Я 9-рэ классхэмкIэ — Марина Пак, Мария Годовниковам ыкIи Анастасия Стрижановам, я 10-рэ классхэмкIэ — Татьяна Дорошенкэм, Марат Цогоевым ыкIи Екатерина Пономаревам, я 11-рэ классымкIэ — Дарья Жолтиковам, Алина Оздоевам ыкIи Анна Волковам текIоныгъэ ыкIи хагъэунэфыкIырэ чIыпIэхэр къахьыгъэх. Мы мафэхэм щытхъу тхылъхэмрэ ахъщэ шIухьафтынхэмрэ ахэм афагъэшъошэщтых.
ДЕЛЭКЪО Анет.
Сурэтыр авторым тырихыгъ.