Урысые Федерацием ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу Адыгеим щыIэм цIыфхэм якъэгъэнэжьын фэгъэзэгъэ икъулыкъу иIофышIэхэр IэпыIэгъу зищыкIагъэхэм апэу алъэIэсых. Ахэм яIофшIэн изэфэхьысыжь шъхьаIэр щыIэныгъэ мин пчъагъэу къагъэнэжьыгъэхэр ары.
2009-рэ илъэсым къыщегъэжьыгъэу ищытхъу аригъаIозэ мы къулыкъум Iоф щешIэ Мыекъуапэ дэт мэшIогъэкIосэ-къэ­гъэнэжьэкIо частэу N 1-м иотряд ипащэ игуадзэу, хэгъэгу кIоцI къулыкъум имайорэу ДышъэкI Мурадин. 2023-рэ илъэсым Урысыем ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу Адыгэ Республикэм щыIэм иIофышIэ анахь дэгъоу ар алъытагъ.
ЧIыпIэ зэжъу ифагъэхэм IэпыIэгъу афэхъунхэм ренэу фэхьазыр, ма­шIом, псыкъиуным, чIыопс, техногеннэ нэшанэ зиIэ тхьамыкIагъохэм къыздахьыхэрэм ядэгъэзыжьынкIэ ипшъэрылъ щытхъу хэлъэу егъэцакIэ.
Мурадин къуаджэу Блащэпсынэ щыщ. Гурыт еджапIэр къызеухым, УФ-м ошIэ-дэмышIэ IофхэмкIэ и Министерствэ икъэралыгъо мэшIогъэ­кIосэ къулыкъу и Академие чIэ­хьагъ. Ащ учIэхьаным ыкIи ущеджэным пае шIэныгъэу пIэкIэлъым имызакъоу, физическэ ухьазырыныгъэ дэгъу уиIэн фае. Ащ Мурадин къыгъэщтагъэп, мафэ къэс еджапIэм истадион кIозэ зигъэхьазырыгъ, ушэтынхэр дэгъу дэдэу ытыгъэх.
ИцIыкIугъом къыщыублагъэу Iэпы­Iэгъу цIыфхэм аригъэкIыныр шэнышIу зэрэфэхъугъэм ишыхьатэу мы сэнэхьатыр къызэрэхихыщтымкIэ джэнджэш ыгу къихьагъэп. ЕджапIэм чIэсызэ ныо хэкIотагъэр хьэшхом риутыгъэу, ецакъэу ылъэгъуи, ащ лъакъокIэ еозэ къытырихыжьыгъ. Ныом лъы бэкIае ащыгъум чIинэгъагъ, Мурадин ихьатыркIэ ар къа­гъэнэжьыгъ.
— Бэ мыщ фэдэ чIыпIэу сызэрихьы­лIагъэр, арэу щытми, зыпарэкIи щынэ зыфаIорэр сыгу къихьагъэп. Ащыгъум мы сэнэхьатыр къызэрэхэсхыщтыр нафэ сфэхъугъэу щытыгъ. Ренэу сиIэпыIэгъу зыгорэм езгъэкIыным сыфэхьазырыгъ, ащ кIуачIэ къыситыщтыгъ, — еIо Мурадин.
Илъэси 5 Москва къыщеджи Мые­къуапэ къызегъэзэжьым, мэшIогъэ­кIосэ-къэгъэнэжьэкIо частым иухъумэн ипащэу Инэм IофшIэныр щыригъэжьагъ. Нэужым Мыекъуапэ дэт мэшIогъэкIосэ-къэгъэ­нэжьэкIо частэу N 1-м а IэнатIэр иIэу къащэжьыгъ. Мурадин ныбжьыкI нахь мышIэми, пшъэдэкIыжь ин пылъэу иIоф­шIэн зэригъэцакIэрэм гу лъати, 2021-рэ илъэсым отрядэу къулыкъур зыщихьырэм ипащэ игуадзэу агъэнэфагъ, непи а IэнатIэр ыIыгъ.
Илъэс зэкIэлъыкIохэм иIэпэIэсэныгъэ хигъахъозэ къырыкIуагъ, пащэм игуадзэу зэрагъэнэфагъэмкIэ цыхьэу къыфашIыгъэр къыгъэшъыпкъэжьыгъ, иIофшIэн хэшIыкIышхо фыриIэу егъэцакIэ. Ищытхъу чыжьэу зэрэIугъэм къыхэкIэу ипIалъэ къэмысыгъэу майор званиер къыфагъэшъошагъ. МэшIогъэкIосэ-къэгъэнэжьэкIо гарнизоным иотрядэу Мурадин пэщэныгъэ зыдызэрихьэрэм части 10 ыкIи зыщеджэхэрэ зы пункт къыхеубытэ.
2017-рэ илъэсым псыхъоу Фарзэ инэпкъ къыIуиути, псыкъиунэу щыIагъэм, джащ фэдэу 2012-рэ илъэсым Краснодар краим ит къалэу Крымскэ щыIэгъэ псыкъи­уным ягумэкIыгъохэм ядэгъэзы­жьын хэлэжьагъ. 2018-рэ илъэсым гъэтхапэм поселкэу Яблоновскэм дэт унэ зэтетхэм ащыщ машIор къызыкIанэм, Мурадин япащэу псэупIэм чIэс нэбгырэ 13-р, кIэлэцIыкIухэр ахэтэу, машIом къы­хащыгъэх.
Илъэс 15-м мы къулыкъум щытхъу хэлъэу иIофшIэн зэрэщигъэцэкIагъэм фэшI щытхъу тхылъхэмкIэ мызэу, мытIоу къыхагъэщыгъ, Урысыем и МЧС имедаль пчъагъэ къыфагъэшъошагъ.
Игъэхъагъэхэм афэгъэхьыгъэу Мурадин къыIотэныр икIасэп, иIофшIэн щынагъоу зэрэщытым, псэемыблэжьыныгъэ зэрэхэ­лъым ямылъытыгъэу, ащ лIыхъужъэу зилъытэжьырэп. Къыхигъэщырэ закъор иIофшIэн шIу зэрилъэгъурэр ыкIи обществэмкIэ ащ мэхьанэшхо зэриIэр ары.
Мурадин гуетыныгъэшхо фыриIэу къэ­гъэнэжьэкIо сэнэхьатыр къыхэзыхыгъэ ныбжьыкIэхэм яшIэныгъэхэм ыкIи яIэпэIэсэныгъэ ахэгъэхъогъэнымкIэ Iоф­тхьабзэу зэхащэхэрэм ахэлажьэ, узыгъэ­гъозэрэ зэдэгущыIэгъухэр адешIых.
— Мы къулыкъум хэтхэр мэшIогъэ­кIосэ-къэгъэнэжьыным пылъ Iофыгъохэм дэгъоу ащыгъозэнхэ фае, — еIо Мурадин, — Анахьэу медицинэм ылъэныкъо пштэмэ. Апэрэ медицинэ IэпыIэгъур арагъэкIы­шъун, цIыфым изытет зыфэдэр агъэунэфышъун фае.
— ЦIыфхэм IэпыIэгъу афэхъуныр пстэуми апшъэу зылъытэхэрэм ащыщ Мурадин, — аIо иIофшIэгъухэм, — ащкIэ шъхьэкIэфэныгъэр къылэжьыгъ.
КъэгъэнэжьэкIо сэнэхьатым урылэжьэным фэшI теубытагъэ ыкIи пытагъэ пхэ­лъынхэ, ащ дакIоу физическэу уипкъынэ­лынэ ащ фэхьазырын фае. А нэшанэхэр зэкIэ хэлъых М. ДышъэкIым.
ЛIыхъужъныгъэ зищыкIэгъэ сэнэхьатым зищыIэныгъэ езыпхыгъэхэм мы мафэм гущыIэ фабэхэр апэтэгъохых, псауныгъэ пытэрэ щыIэкIэ-псэукIэ дэгъурэ яIэнэу, япшъэрылъхэм ягъэцэкIэнкIэ гъэхъэгъэшхохэр ашIынэу, шIоу щыIэр къадэхъунэу, мамырэу псэунхэу тафэлъаIо!
КIАРЭ Фатим.