Медали 8 къахьыгъ
Адыгеим идзюдоистхэм къалэу Хъыдыжъ щыкIогъэ зэнэкъокъухэм хагъэунэфыкIырэ чIыпIий къащахьыгъ. Краснодар краим и Апшеронскэ район изэIухыгъэ первенствэ пшъэшъэ ыкIи кIэлэ ныбжьыкIэхэр хэлэжьагъэх.
Къэралыгъом къыфигъэуцугъэ дзэ пшъэрылъыр ыгъэцакIэзэ фэхыгъэ Сергей Шмаковым ишIэжь фэгъэхьыгъэ Iофтхьабзэм спортсмени 150-рэ фэдиз зэфищагъ. Ахэр Апшеронскэ, Шытхьалэ, Псыфабэ, Лабинскэ, Краснодар, Курганинскэ, Шъачэ ыкIи Хъыдыжъ къарыкIыгъэх. Адыгеир къэзыгъэлъэгъуагъэхэр Джэджэ районым ыкIи Мыекъуапэ ябэнакIохэр ары. Олимпийскэ резервым испорт еджапIэу Кобл Якъубэ ыцIэ зыхьырэм зыщызыгъэсэрэ нэбгыриймэ медальхэр къафагъэшъошагъэх. ТекIоныгъэр къыдахыгъ Къэрэбэт Джантэмир, ЛIыбзыу Заур ыкIи Арсений Хачатурян. Джащ фэдэу республикэм илIыкIохэм тыжьын ыкIи джэрз медалитф къахьыгъ. Техникэ анахь дэгъу къэзыгъэлъэгъуагъэу зэхэщакIохэм къыхахыгъэр Арсений Хачатурян. БэнакIохэм ятренерых Бастэ Салимрэ Нэпсэу Бислъанрэ.