Мэлылъфэгъум и 28-м IофшIэныр къэухъумэгъэным и Дунэе мафэ хагъэунэфыкIы.

Ащ ипэгъокIэу «IофшIэным ищынэ­гъончъагъэ ыкIи икъэбзэныгъэ чIыопсым изытет зэрэзэхъокIырэм зэрепхыгъэр» зыфиIорэ темэм фэгъэхьыгъэ конфе­ренциер АР-м IофшIэнымкIэ ыкIи соци­альнэ хэхъоныгъэмкIэ и Министерствэ зэхищагъ.
Ащ пшъэрылъ шъхьаIэу иIэр IофшIэпIэ чIыпIэхэм тхьамыкIагъохэр ыкIи сэнэхьатхэм ахахырэ узхэр къащымы­гъэхъугъэнхэр ары.
Iофтхьабзэм хэлэжьагъэх IофшIэнымкIэ ыкIи социальнэ хэхъоныгъэмкIэ министрэу Мырзэ Джанбэч, Пшызэ къэралыгъо аграрнэ университетым IофшIэныр къэухъумэгъэнымкIэ иегъэ­джэн-методическэ гупчэ ипащэу Надежда Мельник, IофшIэныр къэухъумэгъэнымкIэ Союзэу «Краснодар краим и Сатыу-промышленнэ палатэ» зыфиIорэм ипащэу КIэныбэ Айдэмыр, шъолъыр министерствэм иэкспертэу Елена Баховар, республикэм ит IофшIапIэхэм ялIыкIохэр.
Конференцием хэлажьэхэрэм шIуфэс гущыIэхэмкIэ закъыфигъэзагъ министрэу Мырзэ Джанбэч. IофшIэныр шIуагъэ къытэу зэхэщэгъэнымкIэ IофшIапIэ языгъэгъотыхэрэмрэ IофышIэхэмрэ азы-­
фагу илъ зэфыщытыкIэм мэхьанэ зэриIэр ащ къыхигъэщыгъ.
— Тызхэт лъэхъаным псынкIэу зэ­хъокIыныгъэхэр щэхъух. Джащ фэд Iоф­шIэным ищынэгъончъагъэ ыкIи икъэ­бзэныгъэ къытехьэрэ фэмэ-бжьымакIэ­хэри. Тэ типшъэрылъыр IофшIэныр щы­нэгъончъэу зэхэщэгъэным пылъ шап­хъэхэр шIокI имыIэу агъэцэкIэнхэу зэрэщытыр IофшIэн языгъэгъотыхэрэм анаIэ тырядгъэдзэныр ары. Сыда пIомэ мыщ цIыфым ищыIэныгъи, ипсауныгъи, иIофшIакIи елъытыгъ, — хигъэунэфыкIыгъ Мырзэ Джанбэч.
2023 — 2024-рэ илъэсхэм IофшIэным ылъэныкъокIэ хэбзэгъэуцугъэу щыIэхэм зэхъокIыныгъэу афэхъугъэхэм къатегущыIагъ шъолъыр министерствэм иIофышIэу Елена Баховар. Джащ фэдэу IофшIэныр къэухъумэгъэным фегъэджэгъэнхэм изэхэщэнкIэ джырэ екIолIакIэу щыIэхэм къэзэрэугъоигъэхэр нэIуасэ фишIыгъэх.
ЗыкъэухъумэжьынымкIэ дермато­логическэ ыкIи зызэратхьакIыхэрэ
амалхэм якъэтынкIэ ЗыкI шапхъэм ­
зэрэтехьэхэрэр къыIотагъ Надежда Мельник.
Тыкъэзыуцухьэрэ чIыопсым изытет зэрэзэхъокIырэм елъытыгъэу IофшIэныр щынэгъончъэу зэхэщэгъэным иIофыгъо­хэм, ошIэ-дэмышIагъэу IофшIэпIэ чIыпIэ­хэм къащыхъун ылъэкIыщтхэм, Iофы­шIэхэм зыкъаухъумэжьынымкIэ агъэфе­дэн фэе амалхэм, нэмыкIхэми Iофтхьабзэм хэлажьэхэрэр къытегущыIагъэх.
Iэшъынэ Сусан.