«Адыгеим икIэлэегъэджэ анахь дэгъу» зыфиIорэ зэнэкъокъур мы мафэхэм Мыекъуапэ щэкIо.

Муниципальнэ уцугъом текIоныгъэ къыщыдэзыхыгъэ нэбгырэ 14-мэ яIоф­шIэнкIэ шIэныгъэу яIэкIэлъхэр къагъэлъэгъуагъ. КIэлэегъаджэ пэпчъ ежь фэ­гъэхьыгъэу къыIотагъ, нэужым кIэлэеджакIохэм гущыIэгъу афэхъугъэх ыкIи урок къатыгъ. Ащ текIоныгъэ къыщыдэзыхыгъэ нэбгыри 10-р ятIонэрэ уцугъом пхырыкIыгъэх.
АР-м гъэсэныгъэмрэ шIэныгъэмрэкIэ иминистрэу Евгений Лебедевым зэнэ­къокъум хэлажьэхэрэм шIуфэс къари­хыгъ, ягъэхъагъэхэм джыри ахагъэхъонэу къафэлъэIуагъ.
КIэлэегъаджэ пэпчъ еджэгъу сыхьатым икIэлэеджакIохэм упчIэ ареты, яшIэныгъэхэр еуплъэкIу, ау мы мафэм ежьхэм джэуапхэр зэратыжьышъурэр ауплъэкIугъ. КIэлэегъэджэ пэрытхэм, кIэлэеджакIохэм, кIэлэпIухэм, ны-тыхэм, журналистхэм къагъэхьазырыгъэ упчIэхэр аратыгъ. ЯIофшIэн елъытыгъэу хэхъоныгъэу ашIыхэрэр, къиныгъоу апэ къи­кIыхэрэр, мы сэнэхьатым мэхьанэу иIэр ыкIи нэмыкIхэр къаIотагъэх.
Мыщ анахь дэгъоу зыкъыщызыгъэ­лъэгъогъэ нэбгыритф къыхахыгъ, ахэр аужырэ уцугъом хэлэжьэщтых ыкIи анахь дэгъуищыр агъэнэфэщт.
Зэнэкъокъум хэлажьэхэрэм ащыщхэм гущыIэгъу тафэхъугъ:
— Илъэс 16 хъугъэ тарихъымкIэ ыкIи обществознаниемкIэ кIэлэегъаджэу Iоф зысшIэрэр. СиIофшIэнкIэ хэхъоныгъэхэр сшIынхэмкIэ мы зэнэкъокъум сызэрэхэ­лажьэрэм мэхьанэшхо есэты. Зэрифэшъуашэу зызгъэхьазырыгъэу сэлъытэ, еджэгъу сыхьатыр Хэгъэгу зэошхом еспхыгъ, къыстефэгъэ кIэлэеджакIохэр Iушых, дэгъоу тызэгурыIуагъ, ТекIоныгъэм и Мафэ фэгъэхьыгъэ орэдыр кIэ­ухым къызэдэтIуагъ, — къыIуагъ Адыгэ­къалэ дэт гурыт еджапIэу N 2-м илIы­кIоу Таус Бэллэ.
— Илъэси 6 хъугъэ обществознаниемкIэ кIэлэегъаджэу Iоф зысшIэрэр. СишIэныгъэхэр къэзгъэлъэгъонэу ыкIи нэмыкIхэм яIофшIакIэ зэзгъэлъэгъунэу мы зэнэкъокъум сыхэлажьэ. КIэлэегъа­джэр зы чIыпIэ щымысэу игъэхъагъэхэм ахигъэхъон фаеу сэлъытэ, — къы­Iуагъ Красногвардейскэ районымкIэ Бжъэ­дыгъухьаблэ дэт гурыт еджапIэу N 12-м къикIыгъэ СтIашъу Рузанэ.
ДЕЛЭКЪО Анет.