Общественнэ-политикэ зыпкъ­итыныгъэр укъуагъэ мыхъунымкIэ, лъэпкъ зэфэшъхьафхэм къахэкIы­гъэхэм ыкIи дин зэмылIэужыгъохэр зылэжьхэрэм зэпэуцужьыныгъэ-зэдемыгъэштэныгъэ азыфагу къимы­тэджэным, къэралыгъо гъэпсыкIэм ылъапсэ зэрар рамыхыным, гъэстыныпхъэ-экономическэ комплексым къыхиубытэрэ псэуалъэхэр терроризмэм щыухъумэгъэнхэм, жъоныгъокIэ мэфэкIхэр щынэгъончъэу рекIокIынхэм апае Iофтхьэбзэ тедзэу зэрахьащтхэм ыкIи нэмыкIхэм щатегущыIагъэх терроризмэм пэшIуе­кIорэ Комиссиеу Адыгэ Республикэм щызэхэщагъэм иIэгъэ зэхэсыгъом.

Iофтхьабзэр зэрищагъ Адыгеим и ЛIышъхьэу КъумпIыл Мурат. Комис­сием иIофшIэн хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, АР-м иминистрэхэм я Кабинет и Тхьаматэу КIэрэщэ Анзаур, федеральнэ инспектор шъхьаIэу Сергей Дрокиныр, АР-м и Прокуратурэ, АР-м и МВД, щынэгъончъэнымкIэ федеральнэ къулыкъум и ГъэIорышIапIэу республикэм щыIэм, АР-м и МЧС япащэхэр, уплъэкIокIо-­лъыплъэкIо къулыкъухэм ялIыкIохэр, муниципалитетхэм япащэхэр.
АР-м хэгъэгу кIоцI IофхэмкIэ иминистрэу Олег Безсмельницынымрэ лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъу­гъэм иамалхэмкIэ Комитетым итхьаматэу Шъхьэлэхъо Аскэррэ къызэрэхагъэщыгъэмкIэ, къулыкъу зэфэшъхьафхэм, лъэпкъ ыкIи дин объединениехэм япа­щэхэм зэгурыIоныгъэ-зэзэгъыныгъэ не­пэкIэ азыфагу илъ.
Хэгъэгу кIоцI IофхэмкIэ Министерст­вэм илIыкIохэм республикэм щымы­псэурэ цIыфхэу къихьагъэхэр хэбзэгъэу­цугъэу щыIэм диштэу исхэмэ ауплъэкIу, Урысыем ишъолъырыкIэхэм къарыкIыгъэхэм зэIукIэхэр, джащ фэдэу Адыге­им иныбжьыкIэхэм зэдэгущыIэгъухэр адашIых. Лъэпкъ политикэм къыдыхэлъытагъэу экстремизмэ нэшанэ къахэмыфэным, общественнэ Iофхэм язытет мониторинг шIыгъэным, нэмыкIхэм анаIэ атырагъэты. Урысые обществэу «ШIэныгъэм» ишъолъыр къутамэ илекторхэм яIофшIэн лъагъэкIуатэ, IэкIыб къэрал ыкIи хэгъэгу кIоцI Iофхэм язы­тет къытегущыIэх.
Адыгеим и ЛIышъхьэ общественнэ-политикэ Iофхэм алъэныкъокIэ зэ­щыхъон мыхъо-мышIагъэу зэрахьан алъэкIыщтхэм игъом анаIэ атырадзэным, къыхагъэщынхэм мэхьанэшхо зэриIэр къыIуагъ, экономикэ, социальнэ зыпкъитыныгъэр къэухъумэгъэным пае ищыкIэгъэ Iофтхьабзэхэр зэрахьанхэ зэрэфаер къыкIигъэтхъыгъ.
«МэфэкIхэм япхыгъэ чэзыур тапэ илъ. Ахэм язэхэщэн фэгъэзэгъэ къулыкъухэр волонтерхэм ягъу­сэхэу цIыфхэмкIэ нахь гъэшIэгъонэу хъущт Iофтхьабзэхэр зэхэщагъэ зэрэхъущтхэм зафагъэхьазырын фае. Тэ типшъэ­рылъыр мэфэкI Iофтхьабзэхэр зэрищыкIагъэм тетэу зэхэтщэнхэр, щынэгъончъэным епхыгъэ Iофтхьабзэхэр зэшIотхынхэр ары. Республикэм щыпсэухэрэм ямызакъоу, хьакIэхэми япхыгъэ Iофтхьабзэу зэрахьащтхэр щы­нэгъончъэу зэшIохыгъэнхэм ты­наIэ зэкIэми тедгъэтын фае», — къыIуагъ КъумпIыл Мурат.
Гъэстыныпхъэ-энергетическэ комплексым къыхиубытэрэ псэуа­лъэхэр терроризмэм щыухъумэгъэнхэмкIэ Iофхэм язытет къытегущыIагъ Росгвардием и ГъэIорышIапIэу Адыгэ Рес­публикэм щыIэм ипащэу Олег Якушевыр. Ащ къызэрэхигъэщыгъэмкIэ, Росгвардием и Гъэ­IорышIапIэ псэуалъэхэр терроризмэм щыухъумэгъэнхэмкIэ Iофтхьабзэхэр нахьышIоу зэхэщэгъэнхэм пае игъоу алъэгъухэ­рэр къулыкъу зэфэшъхьафхэм алъегъэIэсых. Республикэм и ЛIышъхьэ анахьэу анаIэ зытыраригъэдзагъэхэм ащыщ терроризмэ ыкIи техногеннэ нэшанэ зиIэ гумэкIыгъохэр къызщыхъу­хэрэ лъэхъаным язэдэлэжьэныгъэ-зэгурыIоныгъэ анаIэ нахь тырагъэтын зэрэфаер.
ЖъоныгъокIэ мэфэкIхэр щы­нэгъончъэу зэхэщэгъэнхэм пае Iофтхьабзэхэм япхыгъэу къэ­гущыIагъэх ФСБ-м и ГъэIоры­шIапIэу АР-м щыIэм илIыкIо, хэгъэгу кIоцI IофхэмкIэ АР-м иминистрэ, къалэу Мыекъуапэ ипащэ.
Ахэм къызэрэхагъэщыгъэмкIэ, гъэсэныгъэм, культурэм, псауныгъэм икъэухъумэн, транспортым, промышленностым ыкIи энергетикэм япхыгъэ учреж­дениехэм нахь лъэшэу анаIэ атырагъэтыным пае Iофтхьэбзэ шъхьаIэу зехьэгъэн фаехэм зэкIэми акIуачIэ нахь зэдырахьылIэн фае. АР-м хэгъэгу кIоцI IофхэмкIэ и Министерствэ чэщи, мафи зэпытэу дежурствэр ахьынэу зэрэхъущтыр, мыщ­кIэ зэкIэ амалхэр къыда­мы­лъытэхэмэ зэрэмыхъущтыр къы­хигъэщыгъ. ЦIыфхэр жъугъэу зыщызэIукIэщтхэ чIыпIэхэр мэфэкI Iофтхьабзэхэр къэмысыхэзэ ауплъэкIущтых.
ЗыгорэкIэ гумэкIыгъо горэ къэхъумэ, цIыфхэм макъэ зэрарагъэIущт системэхэм язытет уплъэкIугъэн зэрэфаем КъумпIыл Мурат анаIэ тыраригъэ­дзагъ.
«ЖъоныгъокIэ мэфэкIхэм язэхэщэнкIэ Iофышхо къытпыщылъ, а хъугъэ-шIагъэу тапэ илъхэм тызэрафэхьазырым осэ икъу непэ фэтшIышъун фае», — къыIуагъ КъумпIыл Мурат.
Зэхэсыгъом икIэухым комиссием хэтхэм 2024 — 2028-рэ илъэсхэм терроризмэмрэ неонацизмэмрэ зэрапэуцужьыщтхэм иплан игъэцэкIэн зэрэкIощтыр къахалъхьагъ. Мыщ чIыпIэ шъхьаIэ щызыубытырэр къэбарыр игъом зэралъагъэIэсыщтыр ижъыкIэ къыщежьэрэ цIыфыгъэ шэпхъэ дахэхэр нахь куоу зэлъягъэшIэгъэнхэр, ныбжьыкIэ­хэм икъоу Iоф адэшIэгъэныр, терроризмэмрэ неонацизмэмрэ яидео­логие пэуцужьыгъэныр ары.