Адыгеим зекIоным зыщегъэу­шъомбгъугъэнымкIэ амалэу иIэхэм, ахэр гъэфедагъэ зэрэ­хъущтхэм афэгъэхьыгъагъ предпринимательхэм IэпыIэгъу ягъэгъотыгъэнымкIэ Гупчэу «Мой бизнес» зыфиIорэм щыкIогъэ Iофтхьабзэр.

Урысыем хэгъэгу кIоцI зекIоным зыщегъэушъомбгъугъэным фэшI мы лъэныкъомкIэ хъопсагъохэу ыкIи цIыфхэр бэу къызэолIэхэрэ чIыпIэ 12 (макротерритории) агъэнэфагъ. Ахэм зэу ащыщ Адыгеир, Краснодар краир ыкIи Ростов хэкур зыхахьэхэрэу «Урысыем и Къыблэ шъолъыр и КъохьэпIэ лъэныкъу» зыфиIорэр.
Лъэпкъ проектэу «ЗекIоныр ыкIи хьэкIэпэгъокIыным ииндустрий» зыфиIорэм къыдыхэлъытагъэу, УФ-м экономикэ хэхъоныгъэмкIэ и Министерствэ кIэщакIо фэхъуи, зекIоным зегъэушъомбгъугъэным фытегъэпсыхьэгъэ схемэ агъэхьазырынэу рагъэжьагъ. 2024-рэ илъэсэу тызхэтым «Урысыем и Къыблэ шъолъыр и КъохьэпIэ лъэныкъу» зыфи­Iорэ чIыпIэм пае ар агъэхьазыры. Ащ Iоф дэзышIэрэр къэралыгъо корпора­циеу ВЭБ.РФ хэхьэрэ компаниехэм ащыщэу «ПроГород» зыфиIорэр ары. Мы Iоф­тхьабзэм ары кIэщакIо фэхъу­гъэр.
Компанием илIыкIоу Алсу Фатеховам тызэрэщигъэгъозагъэмкIэ, Адыгеим зе­кIоным зыщегъэушъомбгъугъэнымкIэ амалэу иIэр, зигъэпсэфынэу зекIоу шъолъырым къакIорэр зыфэдизыр, мы лъэныкъом щылэжьэрэ хъызмэтшIапIэ­хэм, субъектым ихэбзэ къулыкъухэм шIоигъоныгъэу яIэхэр зэгъэшIэгъэныр ары япшъэрылъ шъхьаIэр.
АР-м зекIонымрэ зыгъэпсэфыпIэ­хэмрэкIэ и Комитет, мы лъэныкъом щы­лэжьэрэ хъызмэтшIапIэу нахьыбэу гугъапIэ къэзытыхэрэм, зекIоным епхыгъэ сэнэхьатхэр зыщызэрагъэгъотырэ еджапIэхэм ялIыкIохэр ащ хэлэжьагъэх.
— Непэ ятIонэрэу мыщ тетэу тызэIокIэ. Адыгэ Республикэм зекIоным зыщиушъомбгъунымкIэ амалэу иIэхэм, щыкIагъэхэм, анахьэу тынаIэ зытед­гъэ­тын фаехэм игъэкIотыгъэу татегущы­Iэнэу, мы лъэныкъом щылажьэхэрэм япредложениехэм тядэIунэу, шIуагъэ къэзытынэу ахэтхэм япхырыщын дгъэ­нэфэнэу мы Iофтхьабзэм амал къытеты, — къыIуагъ АР-м зекIонымрэ зыгъэпсэфыпIэхэмрэкIэ и Комитет ипащэ игуадзэу Джарымэ Бэллэ гущыIэгъу тызыфэхъум.
ХЪУТ Нэфсэт.