Абхъаз Республикэм и Лъэпкъ гъэзетэу «Апсны» илъэси I05-рэ зэрэхъугъэр тыгъуасэ хигъэу­нэфыкIыгъ. «Адыгэ макъэм» илIы­кIохэр мэфэкIым рагъэблэгъагъэх.

Москва, Татарстан, Темыр Кавказым ишъолъырхэм къарыкIыгъэ хьакIэхэр нэбгырэ 200 хъухэу мэфэкIым къыщызэфэсыгъэх. «Адыгэ макъэм» ыцIэкIэ лIыкIо купым хэтых гъэзетым иредактор шъхьаIэу МэщлIэкъо Саидэрэ журналистэу Анцокъо Иринэрэ. Джащ фэдэу усакIоу Дзыбэ Саниети рагъэблэгъагъ.
Абхъаз гъэзетэу «Апсны» мэзаем и 27-м, 1919-рэ илъэсым къыщегъэжьа­гъэу ипчъагъэкIэ 900 хъоу тхьамафэм зэ къыдэкIы, нэкIубгъуихэу къыхауты. 2023-рэ илъэсым къыщегъэжьагъэу зэкъош республикитIум ягъэзетхэр зэдэлэжьэнхэу зэдаштагъэ. «Апсны» иредактор шъхьаIэу Ахра Анкваб Адыгеим къызэкIом, «Адыгэ макъэм» иIофышIэхэм зэIукIэгъу адыриIагъ. Журналист зэдэлэжьэн шIыкIэ-амал зэфэшъхьафхэр дгъэфедэнхэу унашъо зэдэтшIыгъ.
МэфэкI Iофтхьабзэм къыдыхэлъытагъэу Щытхъум ипарк лIыхъужъхэм ясау­гъэтэу дэтым ыкIи абхъаз литературэм лъапсэ фэзышIыгъэу, «Апсны» иапэрэ редакторэу Дмитрий Гулиа имыжъосын къэгъагъэхэр акIэралъхьагъэх. Ащ иунэ-музей хьакIэхэр нэIуасэ фашIыгъэх.
Абхъаз лъэпкъ гъэзетым имэфэкI зэрэхагъэунэфыкIыгъэм фэгъэхьыгъэ къэбар игъэкIотыгъэ «Адыгэ макъэм» ишэмбэт къыдэкIыгъо къыщыхэтыутыщт.