Ныдэлъфыбзэмрэ литературэмрэкIэ кIэлэегъаджэхэм азыфагу щызэхащэгъэгъэ зэнэкъокъум бэмышIэу Краснодар зэфэхьысыжьхэр щыфашIыгъэх. Дипломхэр къэзылэжьыгъэхэр къалэу Шъачэрэ Успенскэ районымрэ ащыщ кIэлэегъаджэхэр ары.

НыдэлъфыбзэмкIэ анахь кIэлэегъэджэ дэгъухэу шъолъырым къыщыхагъэщыгъэхэр къуаджэу Хьаджыкъо дэт гурыт еджапIэу N 94-м адыгабзэмрэ литературэмрэ щязыгъэхьыхэрэ Нэпсэу Русетэрэ Шъхьащэфыжь еджапIэм Iоф щызышIэрэ Анцокъо Эммэрэ.
Мыгъэ рекIокIыгъэ край зэнэкъокъум изэхэщакIох гъэсэныгъэмкIэ, шIэныгъэмкIэ ыкIи ныбжьыкIэ политикэмкIэ шъолъыр Министерствэр, Урысыем гъэсэныгъэмкIэ и Профсоюзхэм краимкIэ икъутамэ, гъэсэныгъэм хэхъоныгъэ егъэшIыгъэнымкIэ Краснодар краим и Институт. ЗэкIэмкIи зэнэкъокъум хэлэжьагъэх Пшызэ шъолъыр икъалэхэм ыкIи ирайонхэм ащылэжьэрэ кIэлэегъэджэ 15, ахэм ащыщ нэбгырипшIымэ урысыбзэмрэ литературэмрэ еджапIэхэм щарагъэхьы, тIумэ – адыгабзэр, джыри нэбгыритIу ублэпIэ классхэм ащэлажьэх, зы нэбгырэ ассирийскэ бзэмкIэ, изобразительнэ искусствэмкIэ ыкIи музыкэмкIэ кIэлэегъадж. Творческэ ушэтынхэр едзыгъуитIоу зэтеутыгъагъэх, гъэцэкIэнищ къаратыгъагъэр – «Медиавизиткэр», «Методическэ мастерскоир», «Десэр», ятIонэрэмкIэ — «КIэлэегъаджэр — мастер» — класснэ сыхьатрэ мастер-классрэ къатынэу щы­тыгъ.
Гъэсэныгъэм хэхъоныгъэ егъэшIыгъэнымкIэ Краснодар краим и Институт ары зэнэкъокъум ифинал ихьагъэхэр къызщыхахыгъэхэр ыкIи зыщагъэшIуагъэхэр. ТекIоныгъэ къыдэзыхыгъэр Ирина Цымбал — Кавказскэ районым ит еджапIэу N 14-м урысыбзэмрэ литературэмрэкIэ икIэлэегъадж. Мы илъэсым ибжыхьэ Урысые зэнэкъокъоу «Ныдэлъфыбзэмрэ ныдэлъф литературэмрэ языгъэхьырэ кIэлэегъэджэ анахь дэгъур» зыфиIоу рагъэкIокIыщтым Краснодар краир ащ къыщигъэлъэгъощт. Нэпсэу Русетэрэ Анцокъо Эммэрэ дипломхэмкIэ къыхагъэщыгъэх.
— Мы проектым ишIуагъэкIэ гъэсэныгъэ учреждениемэ ащылэжьэрэ кIэлэегъа­джэхэмрэ кIэлэпIухэмрэ амал яIэ мэхъу яIэпэIэсэныгъэ, ныдэлъфыбзэр сабыйхэм ара­гъашIэ хъумэ инновационнэ шIыкIэу агъэ­федэхэрэр къагъэлъэгъонхэу, — къыхигъэщыгъ къалэу Шъачэ иадминистрацие гъэсэныгъэмрэ шIэныгъэмрэкIэ и ГъэIорышIапIэу ПcышIопэ районым щыIэм иотдел ипащэу Анастасия Гнусаревам.
Зэнэкъокъум ипшъэрылъыр — ныдэлъфыбзэмрэ ныдэлъф литературэмрэ языгъэхьырэ кIэлэегъаджэхэм яшIуагъэ арагъэкIыныр, акъоуцонхэр ыкIи ахэм яIэпэIэсэныгъэ ауж къикIыхэрэм щысэ афэшIыгъэныр ары. Нэпсэу Русетэ Адыгэ къэралыгъо университетым ублэпIэ классхэмкIэ ифакультет къыухыгъ, илъэс 22-рэ хъугъэу кIэлэегъаджэу мэлажьэ, ащ щыщэу илъэс 18-м еджапIэм ипащэ пIуныгъэ IофшIэнымкIэ игуадз.
ИлъэсиплIыкIэ узэкIэIэбэжьмэ, Хьаджыкъо щыщ кIэлэегъаджэр шъолъырхэм азыфагу щызэхащэгъэгъэ мастер-классэу «Урысыем илъэпкъхэм яныдэлъфыбзэхэр ягъэхьыгъэнхэмкIэ кIэлэегъэджэ анахь дэгъу» зыфиIоу къалэу Геленджик щыкIогъагъэм хэлэжьэ­гъагъ.
Шэуджэн районым ит къуаджэу Джыракъые щыщ Анцокъо Эммэ 2000-рэ илъэсым Адыгэ къэралыгъо университетыр къыухыгъ. Успенскэ районым ит къуа­джэу Шъхьащэфыжь дэт гурыт еджапIэу N 9-м Iоф­шIэныр щыригъэжьагъ. Адыгабзэмрэ литературэмрэ зэраригъэхьырэм имызакъоу, ащ культурнэ-гъэсэныгъэ ыкIи пIуныгъэ Iофтхьабзэхэр ныбжьыкIэхэм афызэхещэх.
— Апэрэ пшъэрылъэу тиIэм — кIэлэ­еджакIохэм ныдэлъфыбзэр ягъэшIэгъэным игъусэу титарихъ, тикультурэ, тилъэпкъ игушъхьэбаиныгъэ икъэухъумэн кIэлэегъа­джэхэр дэлэжьэнхэ фае, — къыкIегъэтхъы хыIушъо шапсыгъэмэ я Адыгэ Хасэ итхьаматэу КIакIыхъу Мэджыдэ. — Тятэжъ пIашъэмэ къытфыщанэгъэ адыгэ хабзэр чIэтымынэу, адыгабзэмрэ арырэ зэголъхэу къыткIэхъухьэрэ лIэужхэм шIу ядгъэ­лъэгъунхэр тиеджапIэхэри тикIэлэ­егъаджэхэри зыдэлэжьэнхэу щыт Iофыгъу. Джащ фэдэу нэмыкI лъэпкъ­мэ яшэн- хабзэхэм лъытэныгъэ афашIыным, Хэгъэгур шIу алъэгъуным, неущрэ мафэмкIэ пшъэдэкIыжьэу ахьырэр зэхашIыкIыным мэхьанэшхо яI. Тинепэрэ кIэлэегъаджэхэр ащ фэдэ пшъэрылъхэм арыгъуазэхэзэ Iоф зэрашIэрэм сицыхьэ пытэ телъ.
Ныбэ Анзор.
Сурэтым итхэр: Нэпсэу Русетэрэ Анцокъо Эммэрэ.