Культурэм епхыгъэ IофтхьабзэхэмкIэ УФ-м и Президент ифонд иIэпыIэгъукIэ АР-м лъэпкъ IэпэщысэхэмкIэ и Ассоциацие хэтэу Гумэ Ларисэ Адыгеим проект щегъэцакIэ. КъекIокIырэ къэгъэлъэгъонэу агъэхьазырыгъэм ыцIэр — «Iэпэщысэхэу искусствэ хъугъэхэр».

Пшъэрылъ шъхьаIэу проектым иIэр илъэсибл-пшIы зыныбжь сабыйхэм адыгэ культурэм ибаиныгъэ алъэгъэIэсыгъэныр, зэхягъэшIэгъэныр ары. Урысые этнографическэ ыкIи АР-м и Лъэпкъ музейхэм, Къэбэртэе-­Бэлъкъар Республикэм унэе хъарзынэщэу щыухъумагъэхэм япкъыгъо хьалэмэтхэм якопиехэр ыкIи Адыгеим иIэпэIэсэ хэхыгъэхэм яIэшIагъэхэм япкъы­гъохэр къэгъэлъэгъонэу къыращэкIырэм хэхьагъэх.
— Мэзэ заулэ хъугъэ проектым тызыдэлажьэрэр. Респуб­ликэм имуниципалитетхэр къыд­деIэхэзэ ар зэшIотэхы. Джэджэ, Кощхьэблэ, Шэуджэн, Красногвардейскэ, Теуцожь, Тэхъутэмыкъое районхэм япсэу­пIэхэм ыкIи Адыгэкъалэ къэгъэ­лъэгъонхэр ащыкIуагъэх, — къы­Iуагъ Гумэ Ларисэ.
АР-м культурэмкIэ и Министерствэрэ Лъэпкъ культурэм и Гупчэрэ проектым игъэцэкIэнкIэ Гумэ Ларисэ иIэпыIэгъух. Пкъыгъохэм язещэнкIэ, культурэм игъэIорышIапIэхэу, иунэхэу районхэм ащыIэхэм къэгъэлъэгъонхэр зыщыкIощт мафэхэм ягъэнэфэнкIэ яшIуагъэ къагъакIо. Адыгеим и ЛIышъхьэу КъумпIыл Мурат къыгъэуцугъэ пшъэрылъэу культурэр цIыфхэм алъыгъэIэсыгъэным фэгъэхьыгъэм игъэцэкIэн занкIэу фэIорышIэрэ проект.

— Культурэм иунакIэхэу къоджэ псэупIэхэм къащызэIуа­хыгъэхэр нахь къыхэтэхых, сыда пIомэ, ахэм цIыфыбэ къяуалIэ, — къы­хигъэщыгъ Гумэ Ларисэ. — Анахьэу къыхэзгъэщымэ сшIоигъор Хьакурынэ­хьэблэ еджэпIэ-интернатым щы­зэ­хэт­щэгъэ къэгъэлъэгъоныр ары. Ны-тыхэр зимыIэжь сабыйхэу унагъом кIэрызыгъэ хъугъэхэм нахь уафэсакъын, шэн-хабзэхэр, лъэпкъ культурэр ябгъэшIэн, алъыбгъэIэсын фае. Iофтхьабзэм изэхэщэнкIэ ренэу Iэпы­Iэгъу къысфэхъухэрэ сиIоф­шIэгъухэу, зэлъашIэрэ IэпэIа­сэхэу Нэгъуцу Аслъан, ТIэшъу Нурбый, Сет Сафиет, Мыгу Рузанэ, Джарымэкъо Зурет, Битэ Азэ, Хъубые Пщымаф, Хьасаныкъо Хьамед лъэшэу са­фэраз. Проектым къыдыхэлъытагъэу ахэм зэхащэрэ мас­тер-классхэм къэгъэлъэгъонхэр нахь гъэшIэгъон къашIых.
ЖъоныгъуакIэм и 6-м Мые­къопэ районым ит псэупIэу Абдзэхэхьаблэ культурэм и Унэу дэтым къыкIэлъыкIорэ къэгъэлъэгъоныр щыкIощт. Ащ иаужырэ едзыгъо АР-м и ­Лъэпкъ музей мэкъуогъум и 1-м щыублагъэу и 23-м нэс щырагъэкIокIыщт. «Iэпэщысэхэу искусствэ хъугъэхэр» зыфиIорэ проектым диштэу кIэлэцIыкIу IэшIагъэхэм якъэгъэлъэгъонрэ язэнэкъокъурэ ащ хэтыщт. Зэнэ­къокъум хэлажьэ зышIои­гъо­хэм жъоныгъуакIэм и 10-м нэс зэ­хэщакIохэм зарагъэтхын фае.
Тэу Замир.