Федеральнэ проектэу «Iэрыфэгъу къэлэ щыIакIэ гъэпсыгъэныр» зыфиIорэм къыдыхэлъытагъэу зэтырагъэпсыхьащт чIыпIэхэм якъыхэ­хын­кIэ зэхащэгъэ мэкъэтынхэр аухынкIэ мэфэ заулэ къэнагъ.

Урысыем ишъолъырхэм зэкIэми онлайн шIыкIэм тетэу ар ащэкIо. АдыгеимкIэ къалэу Мыекъуапэ, поселкэхэу Инэмрэ Яблоновскэмрэ ары чIыпIэу гъэкIэжьыгъэн зищыкIагъэхэр къызщыхахыгъэхэр.
Адыгеим икъэлэ шъхьаIэ исаугъэт зэхэтэу «Памяти павших» зыфиIорэр, Лениным ыцIэ зыхьырэ площадыр ыкIи Свято-­Успенскэ чылысым къыпэIулъ чIыпIэр зэнэкъокъум хагъэлэ­жьэнхэу къырагъэуцуагъэх.
Поселкэу Яблоновскэм иура­мэу Кочубей ыцIэ зыхьырэм тет спорт площадкэр, урамэу Космическэм иобщественнэ чIыпIэ, мы урам дэдэм тет кIэ­лэцIыкIу спорт площадкэр ары къыхахыгъэхэр.
Къэлэ гъэпсыкIэ зиIэ Инэм псэупIэ коимкIэ поселкэу Дружнэм иурамэу Крестьянскэм тет площадым, къуаджэу Бжыхьэ­къоякIэм культурэм и Унэу дэ­тым апай цIыфхэм амакъэхэр зыфатыхэрэр.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, мы псэупIэхэм адэсхэу нэбгырэ мин 33,6-м ехъу мэкъэтыным хэлэжьэгъах. Мые­къуапэкIэ Лениным ыцIэ зыхьырэ гупчэр апэ ит. Ащ нэбгырэ мин 17-м ехъумэ амакъэхэр фатыгъэх. ЯтIонэрэр Свято-Ус­пенскэ чылысым къыпэIулъ чIы­пIэр ары, мэкъэ мини 3,6-рэ ащ «къыугъоигъ», саугъэт зэхэтэу «Памяти павших» зыфиIорэр нэбгырэ мини 3-мэ къыхахыгъ.
Къэлэ гъэпсыкIэ зиIэ Инэм псэупIэ коимкIэ поселкэу Дружнэм икIэлэцIыкIу джэгупIэ апэ ит, мэкъэ мини 2,9-рэ фатыгъ, Бжыхьэкъоежъым дэт культурэм и Унэ дэжь зэтырагъэпсыхьэмэ нахьышIоу зылъытагъэр нэбгырэ мини 2-м тIэкIу ехъу.
Поселкэу Яблоновскэр пштэ­мэ, ащ иурамэу Кочубей ыцIэ зыхьырэм тет кIэлэцIыкIу ыкIи спорт площадкэм мини 3,1-рэ макъэу «къыугъоигъ», ар ыпэ ит, урамэу Космическэм иобщественнэ чIыпIэу къырагъэуцуагъэхэм зым — мэкъэ минрэ 900-м ехъу, адрэм — 700 афатыгъ.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ джыри зэ агу къегъэкIыжьы, зыныбжь илъэс 14-м шIокIыгъэу мы псэупIэхэм адэсхэм амакъэ атын алъэкIыщт. Мэлылъфэгъум и 30-м нэс мэкъэтынхэр кIощтых. Нахьыбэу зыфатыхэрэр 2025-рэ илъэсым агъэкIэжьыщтых.
ЦIыфхэм ащ ихэлэжьэн нахь къафэпсынкIэным фэшI гуфа­кIохэр IэпыIэгъу афэхъух. Ахэр урамхэм атетхэу смартфонхэр агъэфедэзэ цIыфхэм адеIэх. Макъэу атыгъэм ызыныкъо на­хьыбэр, ар мин 19-м ехъу, гу­факIохэм къаугъоигъ.
Джащ фэдэу къэралыгъо фэIо-фашIэхэм япортал иамалкIэ умакъэ птын плъэкIыщт. Ащ ищыкIэгъэ ссылкэри гуфа­кIохэм къыуатыщт.
УФ-м и Президентэу Владимир Путиныр кIэщакIо зыфэхъу­гъэ лъэпкъ проектхэм ащыщэу «ПсэупIэр ыкIи къэлэ щыIакIэр» зыфиIорэм ипхырыщын къыды­хэлъытагъ федеральнэ проектэу «Iэрыфэгъу къэлэ щыIакIэ гъэ­псыгъэныр» зыфиIорэр. Ащ ишIуагъэкIэ 2017-рэ илъэсым къыщыублагъэу 2023-м нэс Адыгеим чIыпIэ 322-рэ щызэтырагъэпсыхьажьыгъ.
ХЪУТ Нэфсэт.