Адыгэ Республикэм ичемпионатрэ ипервенствэрэ рагъэжьагъэх. БлэкIыгъэ зыгъэпсэфыгъо мафэхэм ахэм ахэлэжьэрэ командэхэм ешIэгъуи 5 яIагъ.

Къуаджэу Кощхьаблэрэ Адыгэ къэралыгъо университетымрэ якомандэхэм язэIукIэгъукIэ зэ­нэкъокъур аублагъ. Студентхэр нахь лъэшыгъэх, 2:0-у текIоныгъэр къыдахыгъ. Чемпионатым республикэм икъэлэ шъхьаIэ икомандитIу, Кощхьэблэ, Красногвардейскэ, Мыекъопэ ыкIи Теуцожь районхэр хэлажьэх. Первенствэм команди 8 къы­щыгъэлъэгъуагъ. Адыгеим имуниципалитетхэм ащыщэу зэнэкъо­къухэм ахэмылэжьэрэ закъор Шэуджэн районыр ары.
Апэрэ ешIэгъоу щыIагъэхэм къагъэлъэгъуагъ хагъэунэфыкIырэ чIыпIэхэр къыдэзыхыщтхэр мызэгъэгум къызэрэшIэгъуаер. БлэкIыгъэ первенствэм текIоныгъэр къыщыдэзыхыгъэ «Мыекъуа­пэм» Теуцожь районым икомандэу «Чэчэнаим» 2:0-у къышIуихьыгъ. Джащ фэдэу «Кощхьаблэмрэ» «Кавказымрэ» текIоныгъэхэр къыдахыгъэх. Тэхъутэ­мыкъое районыр «Адыгэкъалэ» нахь лъэшыгъ, пчъагъэр 2:0-у зэIукIэгъур аухыгъ.
Апэрэ турым
изэфэхьысыжьхэр:
«Кавказ» — «Урожай» — 4:2.
«Адыгэкъал» — «Тэхъутэмыкъое районыр» — 0:2.
«Кощхьабл» — «Джаджэ» — 3:2.
«Мыекъуапэ» — «Чэчэнай» — 2:0.