«Адыгэ макъэм» Щынджые гурыт еджапIэм икIэлэеджакIохэм ащыщхэм зэпхыныгъэ ади­шIыгъэу къытфатхэх. Мызэгъэгум зитхыгъэ къэ­зыгъахьыгъэр тиIофшIэгъу­гъэу ЕмтIылъ Нурбый ышнахьыжъэу Зубер икъо­рэлъфэу Альбин ары.

Нурбый ишIэжь зэра­гъэлъапIэрэр, ар ящысэтехыпIэу зэрэщытыр ащ итхыгъэ къыхэщы. ТызыгъэгушIорэр кIэлэеджакIом игукъэкIыкIэ къызэрэт­фэтхагъэр ары ыкIи зыпари хэтымыгъэкIэу ар къыхэтэутыжьы.
Сэ сцIэр ЕмтIылъ Альбин. Щынджые сыкъыщы­хъугъ, сыщэпсэу. Гурыт еджапIэу N 24-м ия 10-рэ класс сис. ЕджапIэр къызысыухыкIэ Мыекъопэ къэралыгъо технологическэ университетым сыщеджэнэу симурад. Си­чылэ сикIас, сырэгушхо. Ащ мафэ къэс хэхъогъэшIухэр ешIых.
ЛIакъоу Хьэбайкъомэ сащыщ. «Адыгэ макъэм» сыкъатхэ сятэжъ ышэу ЕмтIылъ Нурбый Сахьидэ ыкъом сыкъытегущы­Iэнэу.
Нурбый къуаджэу Щынджые 1950-рэ илъэсым къыщыхъугъ. Ар я 3-рэ сабыеу унагъом къихъу­хьагъ. ШынахьыжъитIу — Андзауррэ Зуберрэ (сэ сятэжъ), ахэм анэмыкIэу шынахьыкIитIу — Налбыйрэ Адамэрэ иIагъэх. Сабыйхэм ятэ жьы дэдэу чIанэгъагъ. Сахьидэ уIагъэхэр телъэу 1943-рэ илъэсым чылэм къагъэ­кIожьыгъагъ. 1956-рэ илъэ­сым ащ идунай ыхъо­жьыгъ, ишъхьэгъусэу Хъа­ният кIэлитфыр цIыкIухэу къыфэнагъэх. Ау ыгу ыгъэ­кIодыгъэп, ыши, ышыпхъухэри, кIалэхэри зэдеIэжьыхэзэ сабыйхэр алъэ тырагъэуцуагъэх. Ан­дзауррэ Нурбыйрэ институтхэр къаухыгъэх, Зу­бер, Адам, Налбый техникумым щеджагъэх.
Непэ Нурбый ары зигугъу къэсшIы сшIоигъор. Щынджые гурыт еджапIэр къызеухым ыуж дзэм къулыкъур щихьыгъ. Ащ ыуж Мыекъуапэ дэт мебелышI фабрикэу «Зэ­къошныгъэм» щылэжьэнэу регъажьэ. Iоф ышIэзэ итхыгъэхэр гъэзетым къы­щыхеутых, ащ дакIоу Мыекъопэ кIэлэегъэджэ институтым филогиемкIэ ифакультет щеджэ. Апшъэ­рэ еджапIэр къызеухым, гъэзетэу «Адыгэ макъэм» журналистэу Iухьагъ. ­Илъэс 40-м нахьыбэрэ ащ щылэжьагъ, къэбархэм ыкIи спортым афэгъэхьыгъэ тхыгъэхэм афэгъэзэгъагъ.
Нурбый иIофшIэн лъэшэу шIу ылъэгъущтыгъ. Чэщ-зымафэр сыхьат 24-рэ мэхъумэ, 23-м тхэ­щтыгъ. Чылэм къызыкIо­рэм ышIуабэ шIэщтыгъ, «псынкIэ, псынкIэ, сыкIон фае, зэIукIэ горэм къыщысажэх» ыIозэ, къызэплъэ­кIыжьызэ, ыгу мыщ зэрэщыIэр къызыхимыгъэщэу игъогу техьажьыщтыгъ. Iоф ешIэфэ тын зэфэшъхьафыбэ къыфагъэшъошагъ, ау зэкIэми анахьэу зи­гугъу ышIыщтыгъэр Адыге­им изаслуженнэ журналист зэрэхъугъэр ары.
Сыхьатым, ом изытет ямылъытыгъэу иIофшIэн ыгъэцакIэщтыгъ. Арэущтэу зисэнэхьат шIу ылъэгъоу, ыгу хилъхьэу лэжьэрэ цIыф зырыз джы щыIэр.
Нурбый цIыф гукIэгъоу, цIыф псынкIэу, къы­зэрыкIоу, шъырытэу ыкIи укIытапхэу зэрэщытыгъэм пае игугъу пшIыныр, укъы­щытхъуныр къыри­гъэкIу­щтыгъэп.
Орэд пчъагъэмэ ягущыIэхэр ытхыгъэх. Ахэм ащыщых: «Щынджые иорэд», «Адыгэ шъуаш», «Адыгэ быракъ», «Фатим», «Зара» ыкIи нэ­мыкIхэри.
Сэ Нурбый сятэжъ шъып­къэу слъытэщтыгъ. Ащ щысэ тесхынэу, ежь фэдэу сиIофшIэн згъэцэкIэнэу, шIу слъэгъунэу сыфай. Нурбый игъонэмысэу идунай ыхъожьыгъ мэлылъфэгъум и 6-м 2023-рэ илъэсым.
Нурбый тикъэралыгъо, тиреспубликэ щытхъу хэлъэу зэрафэлэжьагъэр цIыфмэ ащымыгъупшэнэу сыфай.