Шъолъыр форумэу «Моло­дежь Адыгеи 2.0» зыфиIорэр Мыекъуапэ щыкIуагъ.

Республикэм ирайонхэм ыкIи икъалэхэм къарыкIыгъэ ныбжьыкIэ 500-м ехъу ащ хэлэ­жьагъ. Адыгэ къэралыгъо ыкIи Мыекъопэ къэралыгъо технологическэ университетхэм Iоф­тхьэбзэ зэфэшъхьафхэр ащыкIуагъэх: «ШIэныгъэхэм ахэгъэ­хъогъэныр», «Медиа», «НыбжьыкIэ политикэр», «Студентыгъор».
Хабзэ зэрэхъугъэу, мы аужырэ илъэсхэм шъолъыр программэм къыдыхэлъытагъэу президент грантхэм яфонд яIэпыIэгъоу форумыр зэхащэ.
Мэфищым къыкIоцI зы унагъом фэдэ хъугъэхэу ныбжьыкIэхэр егъэджэн зэфэшъхьафхэм ахэлэжьагъэх. Апэрэ мафэм кураторхэм нэIуасэ афэхъугъэх ыкIи куп пэпчъ ежь ибыракъ ышIыгъ. ЯтIонэрэ мафэм лъэны­къо зэфэшъхьафхэмкIэ гъэсэны­гъэ Iофтхьабзэхэм ахэлэжьа­гъэх, орэдхэр къаIуагъэх, къэшъуагъэх.
Хъытыоу «Смарт» зыфиIорэр къызэIузыхыгъэ Едгъулэ Зураб ныбжьыкIэхэм гущыIэгъу афэ­хъугъ, иIофшIэн зэрэзэхищэрэр, ащ шъэфэу хэлъхэр къафиIо­тагъ. Джащ фэдэу интерактивнэ площадкэхэм Iоф ащашIагъ, къэшъонымкIэ, сурэттехынымкIэ, гъэлэнымкIэ мастер-классхэр зэхащагъэх. Iофтхьабзэм къыдыхэлъытагъэу купэу «Мыст» зыфиIорэм хэтхэм ныбжьыкIэхэр гущыIэгъу афэхъугъэх.

Форумыр мэфэкI шIыкIэм тетэу зэфашIыжьыгъ. НыбжьыкIэхэм я Урысые Союз и Адыгэ шъолъыр къутамэ ныбжьыкIэ анахь чанхэр къыхигъэщыгъэх, шIухьафтынхэр аритыгъэх.
Iофтхьабзэм Краснодар, Ставрополь, Луганскэ Народнэ Республикэм ыкIи Ростов-на-­Дону къарыкIыгъэ экспертхэр хэлэжьагъэх. Ахэм ащыщхэм гущыIэгъу тафэхъугъ.
Ставрополь краим илIыкIоу Владислав Строгановым къызэ­риIуагъэмкIэ, форумым игуа­пэу хэлэжьагъ. НыбжьыкIэхэм Iоф адишIэныр икIас, ахэм нахь ашIо­гъэшIэгъоныщт, неущырэ мафэм агъэфедэжьын алъэ­кIыщт лъэны­къохэр къызэрэхихыщтхэм ынаIэ тетыгъ. Гъэсэныгъэм ишап­хъэ­хэм атекIырэ шIыкIэхэр ыкIи «soft-skils» зыфиIорэ лъэныкъо­хэр нахь игъэкIотыгъэу къафиIотагъ.
Луганскэ Народнэ Респуб­ликэм ипрограммэу «Я в деле» зыфиIорэм икураторэу Алена Родина къызэриIуагъэмкIэ, ­форумым къызэрэрагъэблэгъагъэр лъэшэу игопагъ.
— НыбжьыкIэ чанхэу, мурад гъэнэфагъэ зиIэу ыкIи ахэр щыIэныгъэм щыпхырызыщхэ-
рэм гущыIэгъу сафэхъуным сыпылъ. Мыщ фэдэ Iофтхьа­бзэхэм яшIуагъэкIэ республи-
кэм иныбжьыкIэ политикэ хэ­хъоныгъэхэр ышIыщтых, — къы­Iуагъ ащ.
ДЕЛЭКЪО Анет.