Мы илъэсым къыщегъэжьагъэу АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет Адыгэ республикэ общественнэ организациеу «ШIэныгъ» зыфиIорэм зэзэгъыныгъэ дишIыгъэу зэдэлажьэх. Къэралыгъо программэу «Лъэпкъ зэфэшъхьафхэм зэгурыIоныгъэу азыфагу илъыр гъэпытэгъэным ыкIи патриотическэ пIуныгъэ тэрэз къыткIэхъухьэрэ лIэужхэм яIэным афэшI» зыфиIорэм къыдыхэлъытагъэу Iофтхьэбзэ зэфэшъхьафхэр зэхащэх, гурыт ыкIи апшъэрэ еджапIэхэм ащеджэхэрэм гущыIэгъу афэхъух.

Мы мафэхэм Мыекъопэ гурыт еджапIэу N 11-м ихьэкIагъэх зэлъашIэрэ шIэныгъэлэжьэу, гуманитар ушэтынхэмкIэ Адыгэ республикэ институтым тарихъымкIэ иотдел ипащэу, тарихъ шIэныгъэхэмкIэ докторэу Ацумыжъ Казбекрэ Адыгэ Республикэм иветеранхэм я Совет итхьаматэ игуадзэу Иван Бормотовымрэ.
Хэгъэгу зэошхом илъэхъан фашистхэм якIочIэ анахь лъэшхэм тидзэкIолIхэр зэрапэуцужьыгъагъэхэр, лIыхъужъныгъэ­шхо хэлъэу Мыекъуапэ къызэрагъэгъунагъэр, япшъэрылъ щытхъу хэлъэу зэрагъэцэкIагъэр кIэлэеджакIохэм къафаIотагъ.
— НыбжьыкIэхэм яхэгъэгу шIу алъэгъуныр, ятарихъ, тинахьыжъхэм лIыхъужъныгъэу зэрахьагъэр ашIэныр, къэбар нэпцIэу Интернетым къихьэ­хэрэр ашIошI мыхъуныр ары пшъэрылъ шъхьаIэу тиIэр. Ахэм къэбар шъыпкъэр ашIэн фае. Мы илъэсым лекции 100-м ехъу зэхэтщэнэу тэгъэнафэ, — къыIуагъ Ацумыжъ Казбек.
— ТиеджапIэ патриотизмэм чIыпIэшхо щеубыты, джащ фэдэу терроризмэм ыкIи экстремизмэм апэшIуекIогъэнымкIэ Iофтхьэбзэ зэфэшъхьафхэр зэхэтэщэх. Хэгъэгу зэошхом партизанхэм афэгъэхьыгъэ къэбарэу къаIотагъэхэр тикIэлэ­еджакIохэм ашIогъэшIэгъоныгъ. НыбжьыкIэхэм ятарихъ дэгъоу ашIэнымкIэ мыщ фэдэ зэдэгущыIэгъухэм мэхьанэшхо яI. ШIэныгъэ дэгъу зиIэм къэбар нэпцI­хэр ышIошI хъущтэп. Илъэс еджэгъум къыкIоцI мазэ къэс пIомэ хъунэу патриотизмэм фэгъэхьыгъэ Iофтхьабзэхэр зэхэтэщэх. Мыгъэ гъэтхэпэ мазэм къыщегъэжьагъэу хэушъхьафыкIыгъэ дзэ операцием хэлажьэ­хэрэм афэгъэхьыгъэ музей цIыкIоу «ЛIыхъужъэу къэхъухэрэп» зыфиIорэр къызэIутхыгъ. ТикIэлэеджакIохэм ащыщым ятэу хэкIодагъэм ыкIи тиIофшIэгъу икIалэу джырэкIэ ащ щыIэм яIэмэ-псымэхэр ащ чIэлъых, джыри ахэм ахэдгъэхъощт, — къыIуагъ еджапIэм ипащэ игуа­дзэу Ирина Яковенкэм.
ДЕЛЭКЪО Анет.