КIэлэцIыкIу театральнэ купхэм яя V-рэ фестиваль Адыгеим щыкIуагъ.

Iофтхьабзэр 2015-рэ илъэсым къыщыублагъэу республикэм икъутырэу Еленовскэм дэт культурэм и Унэ щызэхащэ. Ащ хэлажьэхэрэм япчъагъэ илъэс къэс нахьыбэ зэрэхъурэм дакIоу яIэпэIэсэныгъи хэхъо. Къэбэртэе-Бэлъкъарым, Къэ­рэщэе-Щэрджэсым, Темыр Осетием, Краснодар краим, Ростов хэкум ыкIи Адыгеим ащызэлъашIэрэ кIэлэцIыкIу театральнэ купхэр зэхахьэм къекIолIагъэх. КъэкIон зымылъэкIыгъэхэм онлайн шIыкIэм тетэу зыкъагъэлъэгъуагъ.
Адыгэ Республикэм культурэмкIэ и Министерствэрэ АР-м и Лъэпкъ культурэ и Гупчэрэ Iофтхьабзэм кIэщакIо фэхъугъэх.
— ПсэупIэу Еленовскэм дэт культурэм и Унэ щызэхащэгъэ фестивалым лъэшэу тырэгушхо. Район мэхьанэ зиIэ кIэлэцIыкIу театральнэ купхэм язэнэкъокъоу едгъэ­жьэгъэ Iофтхьабзэр шъолъыр лъэгапIэм нэсыгъ. Лъэпкъ проектэу «Культурэм» къыдыхэ­лъытагъэу къутырым дэт культурэм иучреждение агъэцэкIэжьыгъ, ащ лъэшэу тегъэгушIо. Къуаджэхэм адэт мыщ фэдэ псэуалъэхэм мэфэкI Iофтхьабзэхэр зэращыкIохэрэм, творчествэм пылъхэр зэращызэрэугъоихэрэм имызакъоу, цIыфхэр ащызэIокIэх, зэхахьэхэр ащырагъэкIокIых. ЦIыфхэм мыщ зыщагъэпсэфын, яуахътэ шIуагъэ къытэу щагъэкIон алъэкIы, — къыIуагъ Красногвардейскэ районым иадминистрацие культурэмкIэ игъэIорышIапIэ ипащэу Екатерина Макинам. КIэлэ­цIыкIу театральнэ куп­хэм яфестиваль шIуфэс гущыIэхэмкIэ къызэIуихыгъ АР-м культурэмкIэ ими­нистрэ игуадзэу Кушъу Светланэ.
— Культурэм епхыгъэ Iофтхьабзэхэм язэхэщэн Адыгеим мэхьэнэ ин щыраты. КIэлэцIыкIу фестивалым ипшъэрылъ шъхьаIэр искусствэм хэхъоныгъэхэр ышIынхэр, сэнаущыгъэ зыхэлъ режиссерхэр къыхэгъэщынхэр ары. КIэлэцIыкIумэ афытегъэпсыхьэгъэ къэгъэлъэгъон­хэр нахьыбэу зэхэщэгъэнхэр театральнэ фестивалым къыдыхэлъытагъ, — къы­Iуагъ Кушъу Светланэ.
Фестивалым ишIуагъэкIэ шъолъырыбэмэ къарыкIыгъэ кIэлэцIыкIу сэнаущхэм культурэмрэ искусствэмрэ алъэныкъокIэ гъэхъагъэу щыIэхэм нэIуасэ зафашIын амал яIагъ. Режиссерхэм ащыщхэм яIоф­шIагъэхэр къагъэлъэгъуагъэх. КIэлэцIыкIухэр театральнэ IофышIэ цIэрыIохэм аIукIагъэх, пшысэхэм, мюзикл хьалэмэт­хэм яплъынхэ алъэкIыгъ.

Фестивалым ихьакIэу, КъБР-м ыкIи Ингушетием культурэмкIэ язаслуженнэ IофышIэу, театрэу «Нарткъа­лэм» ире­жис­серэу Сапрыкина Галинэ къыIуагъ:
— Адыгеим фэбэныгъэ хэлъэу къызэрэщытпэгъо­кIы­гъэ­хэр лъэшэу тигуапэ. Непэрэ къэгъэлъэгъоныр цIыф­хэм агу рихьыгъэу, сценэм тет актермэ яжабзэ IупкIэу, зэхэугуфыкIыгъэу анэсыгъэу сэлъытэ. ТапэкIи АР-м икIэ­лэцIыкIу театрэ зэпхыныгъэ дытиIэным, Iоф зэдэтшIэным тыщэгугъы. Театрэм лъэныкъуабэ иI: спектаклэр огъэхьазыры, ролыр зэогъа­шIэ, режиссерым Iоф дэошIэ. Залым кIым-сымэу чIэтымкIэ зэхэтшIагъ цIыфэу къэкIуагъэ­хэм къэгъэлъэ­гъоным мэхьанэу иIэр зэралъыдгъэIэсын тлъэкIыгъэр. Мыщ фэдэ шъолъыр фестивальхэм язэхэщэн мэхьанэшхо зэриIэм щэч хэлъэп.
Фестивалым иосэшIхэм ахэтыгъэх: Урысыем ыкIи АР-м язаслуженнэ артистэу Зыхьэ Мэлайчэт, Польшэм изаслуженнэ артистэу Виктор Георгиевыр, театрэу А. Хьанэхъум ыцIэ зыхьырэм ирежиссерэу Нэгъой Азэмат, АР-м изаслуженнэ сурэтышIэу Сихъу Рэмэзан, АР-м изаслуженнэ артистэу Оксана Светловар.
Фестивалым и Гран-при къыфагъэшъо­шагъ Красногвардейскэ районым ит культурэм и Унэ иныбжьыкIэ театральнэ купэу «Наследие» зыфиIорэм.
Зэнэкъокъокъум илауреат хъугъэх КъБР-м ипсэупIэу Нарткъалэ итеатрэу «Волшебный мир», Ростов хэкур къэзыгъэлъэгъогъэ кIэлэцIыкIу театрэу «Бармалей» зыфиIохэрэр, къуаджэу Джэджэ­хьаблэ дэт культурэм и Унэу А.К. Нэхаим ыцIэ зыхьырэм икIэлэцIыкIу драматическэ купэу «Зэкъошныгъэм».
Джащ фэдэу фестивалым идипломхэр афагъэшъошагъэх Джэджэ районым икIэлэцIыкIу театральнэ студиеу «Театруля», Кощхьэблэ районым итеатральнэ студиеу «Лукоморье», КъЩР-м итеатрэу «Волна» зыфиIохэрэм, Шэуджэн рай­онымкIэ Пщычэу дэт культурэм и Унэ икупэу «Щыгъыжъыем».
Красногвардейскэ районым иадминистрацие ипащэу Т.И. Гъубжьэкъом ихэу­шъхьафыкIыгъэ шIухьафтын ратыгъ теат­ральнэ купэу «Волшебный мир» зыфиIорэм.
Хъулъфыгъэ ролыр анахь дэгъоу къэ­зышIыгъэу къыхахыгъэр Рустам Шхагапсовыр ары. Фестивалым анахь ныбжьыкIэу хэлэжьагъэ Мария Никитенкэм диплом фагъэшъошагъ.
Iофтхьабзэм къыщагъэлъэгъогъэ спектаклэхэм Адыгеим щыпсэухэрэр ыкIи ащ ихьакIэхэр яплъыгъэх.
Лъэпшъыкъо Фатим.