Тхьаумэфэ мафэм Урысые зэнэкъокъоу «Ар тиунэгъо шэн» зыфи­Iорэм ишъолъыр уцугъо къалэу Ростов-на-Дону щаухыгъ. Ар президент платформэу «Урысыер — амалхэм якъэрал!» зыфиIорэм къыдыхэлъытагъ.

Мэфищым Къыблэ ыкIи Темыр Кавказ шъолъырхэм, Урысыем ишъолъырыкIэхэм къа­рыкIыгъэ унэгъо 40, нэбгырэ 1074-рэ кIэух едзыгъом хэхьанхэмкIэ зэнэкъокъугъэх.
Унэгъо зэнэкъокъум икIэ­уххэмкIэ Дорошенкэхэр пхы­рыкIыгъэх, Адыгеир ахэм къагъэлъэгъощт. Нытыхэу Еленэрэ Петррэ, ахэм ялъфыгъэхэу Надежда, Илья, Иван, Павел, мыхэм янэжъэу Наталье зыч­зыпчэгъоу зэхэтхэу текIоныгъэр къагъэблэгъагъ.
Мы унагъом ибаиныгъэ анахь иныр якIалэхэр ары. Анахьы­жъым къэралыгъом иныбжьыкIэхэм апае гъэсэныгъэ программэхэр зэхегъэуцох, гурытыр музыкэм фэщагъ ыкIи студент чанхэм ащыщ, кIэлэ анахьыкIэм «Кванториумым» дронхэр ще­шIых, пшъэшъэжъыер къэшъоным фэщагъ, бзэхэр зэрегъашIэх.
«АкъылышIуагъэр, зэгурыIоныгъэр, зэдеIэжьыныгъэр, унэгъо хабзэхэр ыкIи баиныгъэхэр — зэнэкъокъур унэгъо пытэм илъэныкъуабэхэм яушэтыпIэ хъугъэ ыкIи Адыгеим илIыкIохэм а лъэныкъохэр икъу фэдизэу къагъэлъэгъошъугъэх», — къащитхыгъ Адыгеим и ЛIышъхьэу КъумпIыл Мурат исоциальнэ нэкIубгъохэм. Адыгеим икIыгъэ унагъом зэрэфэгумэкIырэр ыкIи ицыхьэ зэ­рэтелъыр ащ къыхигъэщыгъ.
Гъэмафэм зэнэкъокъум Моск­ва зэфэхьысыжьхэр щыфашIыщтых, кIэухым Урысыем иунэгъо 300 хэлэжьэщт. ТекIо­хэ­рэм япсэу­пIэ амалхэр нахьышIу ашIыным пае сомэ миллиони 5 зэрылъ сертификатхэр аратыщт, Урысыем ичIыпIэ зэфэшъхьаф­хэр къарагъэплъыхьащтых. Къэ­ралыгъом иунэгъо анахь дэгъу­хэм ацIэ бэдзэогъум и 8-м, унагъом, шIулъэгъуныгъэм ыкIи зэфэшъыпкъэныгъэм я Ма­фэ, къыраIощт, ахэр агъэшIощтых.