АР-м игъэцэкIэкIо хэбзэ къулыкъу­хэмрэ ошIэ-дэмышIэ тхьамыкIагъо­хэм ыкIи радиационнэ авариехэм шъобж ахэзыхы­гъэхэм яобщест­веннэ организациехэмрэ я Межведомственнэ координационнэ совет зичэзыу зэхэсыгъо иIагъ. Ар зэрищагъ АР-м финансхэмкIэ ­ими­нистрэу Виктор Орловым.

Ащ ипэублэ псалъэ къызэрэщиIуагъэмкIэ, Чернобыль атом электростанцием къыщыхъугъэ тхьамыкIагъом идэгъэзыжьын хэлэжьагъэхэм яфэIо-фашIэхэр афэгъэцэкIэгъэным къэралыгъо хабзэм зэрэфэлъэкIэу ынаIэ тырегъэты.
— ТхьамыкIагъор зыщыхъугъэ мафэм епхыгъэ шIэжь Iофтхьабзэу республикэм щызэха­ща­гъэхэм, радиацием шъобж зэри­хыгъэхэм зэтыгъо ахъщэ ты­нэу аратыхэрэм, япсауныгъэ­кIэ ящыкIэгъэ медицинэ уплъэ­кIунхэр игъом афашIынхэм, нэмыкI Iофыгъоу зыгъэгумэкIыхэрэм татегущыIэнэу тызэрэугъоигъ. Мы тхьамыкIагъом къызыдихьыгъэ гумэкIыгъохэм ядэгъэзыжьын хэлэжьагъэхэм ягумэкIыгъохэр, яIофыгъохэр къэралыгъо гъэцэкIэкIо къулыкъухэм янэплъэгъу рагъэкIы­хэрэп нахь мышIэми, щыкIа­гъэу джыри щыIэхэм тахэплъэщт, — къыIуагъ ащ.
Радиацием зэрар зэрихыгъэ­хэм зэтыгъо ахъщэ IэпыIэгъоу аратырэм къытегущыIагъ АР-м IофшIэнымкIэ ыкIи социальнэ хэхъоныгъэмкIэ и Министерствэ иотдел ипащэу Браукъо Валерий. Хабзэ зэрэхъугъэу, а зэты­гъо ахъщэ IэпыIэгъур тхьамыкIагъом идэгъэзыжьын хэлэжьагъэхэм, сэкъатныгъэ хэзыхыгъэ­хэм, зидунай зыхъожьыгъэхэм яшъхьэгъусэхэм, янэ-ятэхэм, яса­быйхэм афатIупщы. Браукъо Валерий къызэриIуагъэмкIэ, а купым хэхьэрэ нэбгырэ 516-у республикэм щыпсэухэрэм зэтыгъо ахъщэ IэпыIэгъоу аратырэм мы илъэсым хагъэхъуагъ. ЫпэкIэ ар сомэ мини 2 зырыз хъущтыгъэмэ, джы сомэ мини 3-м нэсыгъ. Джащ фэдэу икIыгъэ илъэсым гумэкIыгъоу дагъэ­зыжьын фэягъэхэм ащыщхэу зэшIохыгъэ хъугъэхэм минис­терствэм илIыкIо къатегущыIагъ.
Адыгэ республикэ общественнэ организациеу «Чернобыль иинвалидхэр» зыфиIорэм итхьаматэ игуадзэу Александр Молотовым чернобыльцэхэм ягу­мэ­кIыгъохэр зэхэсыгъом къыщиIэтыгъэх. Мыхэм япсауныгъэ изытет елъытыгъэу чыжьэу кIонхэ зэрамылъэкIырэм къыхэ­кIэу яавтомобильхэр зычIагъэу­цонхэ алъэкIыщт гъучI гаражхэр зыщыпсэухэрэм апэмычыжьэу агъэуцунхэу чIыпIэхэр къафыхэгъэкIыгъэнхэу къыкIэлъэIугъэх. Джащ фэдэу общественнэ организацием унэ зэрищыкIагъэри къаIуагъ. ФинансхэмкIэ ми­нистрэм а Iофыгъохэм язэшIо­хын Мыекъопэ къэлэ администрациемрэ мылъку зэфыщытыкIэхэмкIэ Комитетым афигъэзагъ. Ащ нэмыкIэу, Чернобыль тхьамыкIагъом идэгъэзыжьын хэлэжьагъэхэм ясаугъэтэу Мые­къуапэ дэтым игъэцэкIэжьын зэрифэшъуашэм тетэу лъыгъэ­кIотэгъэнэу ариIуагъ.
— Чернобыльцэхэм ящэнэрэ лIэужэу къакIэхъухьэгъэ сабый­хэр хэбзэгъэуцугъэкIэ зэрэмыухъумагъэхэр федеральнэ шапхъэм тетэу къэIэтыгъэн фае. Джащ фэд, сэкъатныгъэ зиIэхэм Iэзэгъу уцхэр зэраратыхэрэм илъэс зэкIэлъыкIохэм зэхъо­кIыныгъэ фэхъурэп. А шапхъэр зэ­рэ Урысыеу арэущтэу щыгъэ­псыгъ, игъом ящыкIагъэр агъотырэп, — къыхигъэщыгъ Александр Молотовым.
Радиацием епхыгъэ тхьамыкIагъохэм къыздахьыгъэхэм ядэгъэзыжьын хэлэжьагъэхэм ямафэ ипэгъокIэу зэхащэщт Iофтхьабзэхэм зэхэсыгъом щатегущыIагъэх. Агъэ­нэфагъэхэр зэкIэ гъэцэкIэгъэнхэ зэрэфаер министрэу Виктор Орловым къыIуагъ, ащкIэ пшъэ­дэкIыжь зыхьырэ къулыкъухэм ялIыкIохэм анаIэ тыраригъэ­дзагъ.
Iэшъынэ Сусан.