АР-м и Къэралыгъо Совет — Хасэм я XXXV-рэ зичэзыу зэхэсыгъоу иIа­гъэм федеральнэ Гупчэм фэгъэзэгъэ джэпсалъэхэр щаштагъэх, цIыфхэм яфитыныгъэхэр къэухъумэгъэн­хэмкIэ АР-м и Уполномоченнэ блэкIыгъэ илъэсым Iофэу ышIагъэр щызэфа­хьысыжьыгъ, АР-м и Общественнэ палатэ хэтыщтхэр хадзыгъэх, хьыкумышI­хэр щагъэнэфагъэх.

Шъолъыр Парламентым иIофшIэн хэлэжьагъэх АР-м и ЛIышъхьэу КъумпIыл Мурат, министрэхэм я Кабинет хэтхэр, народнэ депутатхэм я Советхэм ятхьаматэхэр, федеральнэ ыкIи шъолъыр къулыкъухэм япащэхэр, нэмыкIхэр. Зэхэсыгъор зэри­щагъ Къэралыгъо Советым — Хасэм и Тхьаматэу Владимир Нарожнэм.
Пстэумэ апэу Бзэджэжъыкъо Азамат Мыекъуапэ ихьыкум участкэу N 3-м, Татьяна Шавлинскаяр N 2-м язэгъэшIужь хьыкумышIхэу гъэнэфэгъэнхэм депутатхэр тегущыIагъэх. АР-м и Апшъэрэ Хьыкум и Тхьаматэу Шумэн Байзэт кандидатурэхэм нэIуасэ афишIыгъэх.
— Шъолъырым хэбзэгъэуцугъэхэр зэрэщагъэцакIэхэрэр, зэрэщаухъумэхэрэр зэгъэшIужь хьыкумышIхэм ясистемэ Iоф зэришIэрэм бэкIэ епхыгъ. ХьыкумышIхэм хэбзэгъэуцугъэхэр пстэумэ апшъэ зэрашIырэм правовой системэм зыпкъитыныгъэ къыхелъхьэ. Зэфагъэ зы­­хэлъ хьыкумышIхэм яфитыныгъэхэр къызэраухъумэхэрэр цIыфхэм зэхашIэн фае. ЦIыфхэм, хэбзэихъухьэ ыкIи хьыкум къулыкъоу къотэгъу къафэхъугъэхэм апашъхьэ пшъэдэкIыжьэу ахьырэр хьыкумышIхэм къагурыIоным мэхьанэшхо иI, — къы­Iуагъ КъумпIыл Мурат.
Федеральнэ къэралыгъо хэ­бзэ къулыкъухэм афэгъэзэгъэ джэпсэлъи 3-мэ Адыгеим идепутатхэр кIэщакIо афэхъугъэх. УФ-м и Правительствэ и Тхьаматэ игуадзэу Татьяна Голиковамрэ УФ-м и Къэралыгъо Думэ унагъом икъэухъумэнкIэ, тым, ным ыкIи кIэлэцIыкIугъом яIоф­хэмкIэ и Комитет ипащэу Нина Останиновамрэ афэгъэзагъэр ны-тыхэм ясабыйхэр зэраIыгъхэм, зэрапIухэрэм япхыгъэ Iоф­­хэм афэгъэхьыгъ. Нымрэ тымрэ зэхэкIыжьыгъэхэмэ, яса­быйхэр очнэ шIыкIэм тетэу еджэхэмэ, аныбжь илъэс 23-м нэсыфэкIэ кIэлэпIукIэр ятыгъэн фаеу тидепутатхэм алъытагъ.
ЦIыфэу IофшIапIэ Iутым ­илъэс къэс къыратырэ зыгъэпсэфыгъо уахътэм (отпускым) пIалъэу иIэр лъыгъэкIотэгъэным лъапсэ фэ­хъун ылъэкIыщтхэм алъэныкъо­кIэ УФ-м IофшIэнымкIэ и Кодекс зэхъокIыныгъэхэр фэшIыгъэнхэм фэгъэхьыгъ УФ-м Iоф­шIэнымкIэ ыкIи цIыфхэр со­циальнэу къэу­хъумэгъэнхэмкIэ ими­нистрэу Ан­тон Котяковым фагъэзэгъэ джэпсалъэр.
УФ-м мэкъумэщ хъызмэтымкIэ иминистрэу Дмитрий Патрушевым фагъэхьыгъэр былым гъорыкIохэм япхыгъ. былымхэр зиехэм шапхъэу агъэцэкIэн фаехэр шъолъырхэм агъэнэфэнхэу фитыныгъэ къязытырэ гъэ­тэрэзыжьынхэр хабзэм изэ­хэщэн фэгъэхьыгъэ я 414-рэ Федеральнэ хэбзэгъэуцугъэм фэшIыгъэнэу тхылъым къы­щеIо. Мы джэпсалъэм дакIоу бы­лымхэм алъымыплъэхэрэм тазырэу ара­гъэтыщтыр зыфэдизыр адми­нистративнэ хэукъоныгъэ­хэм афэ­гъэхьыгъэ шъолъыр хэ­бзэгъэуцугъэм щагъэнэфагъ.
ЦIыфхэм яфитыныгъэхэр къэухъумэгъэнхэмкIэ АР-м и Уполномоченнэу Анатолий Осокиным 2023-рэ илъэсым Iофэу ашIагъэм щигъэгъозагъэх. Ащ къызэриIуагъэмкIэ, гъогогъу 367-рэ а уахътэм цIыфхэм Iофыгъо зэфэшъхьафхэмкIэ зыкъыфагъэзагъ.
ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм лъэIу тхылъ 30 къаратыгъ. Къулыкъу зэра­хьырэм, Iэзэгъу уцхэм, ахъщэ тынхэм, «зэо-зэпэуцужьхэм яве­теран» зыфиIорэ цIэм, зыдэщыIэр амышIэу кIодыгъэ дзэ­кIолIхэм якъэгъотыжьын анахьэу цIыфхэр зыгъэгумэкIыхэрэр.
Уполномоченнэм къызэриIуа­гъэмкIэ, мы Iофыгъохэр дэгъэзыжьыгъэнхэм фэшI зыкъэу­хъумэжьынымкIэ УФ-м и Министерствэ, дзэ прокуратурэм, Къащ Плъыжьым и Дунэе комитетэу УФ-м ыкIи Республикэу Беларусь ащыIэхэм, зыдэ­хъу­гъэр амышIэу кIодыгъэхэм алъыхъугъэнымкIэ Гупчэм, зэо-­зэпэуцужьхэм яветеранхэм яфи­­тыныгъэхэр къэухъумэгъэнхэмкIэ Лигэм зафагъэзагъ.
ЦIыфхэм гумэкIыгъоу къарахьылIагъэхэм янахьыбэр дэ­гъэзыжьыгъэ хъугъэ, а чIыпIэм зэшIуамыхышъугъэхэр минис­терствэу, къулыкъоу афэгъэзагъэхэм афагъэхьыгъэх.
АР-м и Общественнэ палатэ нэбгырэ 30-у хэтым щыщэу 10-р АР-м и Къэралыгъо Совет — Хасэм ыштэн фаеу шапхъэхэм къадыхэлъытагъ. Ащ фэшI кандидатурэу шъолъыр Парламентым къыгъэлъэгъуагъэ пэпчъ хэушъхьафыкIыгъэу депутатхэм амакъэхэр фатыгъэх ыкIи зэкIэми адырагъэштагъ.
Республикэм ипащэ иеплъыкIэхэр къыриIотыкIызэ, Общест­веннэ палатэм республикэм ищыIакIэ, мамырныгъэрэ зыпкъ­итыныгъэрэ илъхэу хэхъоныгъэ­хэр зэришIыхэрэм иIахьышхо зэрэхилъхьэрэр къыхигъэщыгъ. ЦIыфхэм яIофыгъохэм ядэгъэзыжьын мафэ къэс ахэр къызэрэхэлажьэхэрэм фэшI лъэшэу зэрафэразэхэр къыIуагъ.
Адыгеим и Общественнэ па­латэ хагъэхьагъэх хэушъхьафыкIыгъэ дзэ операцием хэлажьэу, ныбжьыкIэ дзэ-патриотическэ объединениеу «ЗыкIыныгъ» зы­фиIорэм хэтэу Джарымэ Рэщыдэ, Адыгеим ибзылъфыгъэхэм я Союз ипащэу Вэрэкъо Хьалимэт, заом, IофшIэным, УIэшыгъэ КIуачIэхэм ыкIи хэбзэу­хъумэкIо къулыкъухэм яобщественнэ организацие ипащэу Къоджэ Аслъан, Адыгэ Хасэм итхьаматэу ЛIымыщэкъо Рэмэзан, медицинэм иIофышIэхэм я Ассоциацие ипащэу Валерий Ковалевыр, нэмыкIхэр.
А зэпстэумэ анэмыкIэу фэтэрыбэу зэхэт унэхэм ачIэсхэм зэдагъэфедэхэрэм ягъэкIэжьын, муниципальнэ къулыкъум, псэу­пIэхэм яшIын, лъэпкъхэм якультурнэ кIэн икъызэтегъэнэн, игъэ­федэн, икъэухъумэн, чIыпIэ зыгъэIорышIэжьыпIэхэм, сабый ибэхэм ыкIи лъыплъэн имыIэу къэнагъэхэм псэупIэхэр ягъэгъотыгъэнхэм, нэмыкIхэм афэгъэхьыгъэ хэбзэгъэуцугъэхэм зэхъокIыныгъэхэр афэшIыгъэнхэм фэгъэхьыгъэ законопроект­хэр, законхэр апэрэ ыкIи ятIо­нэрэ еджэгъухэмкIэ аштагъэх. УФ-м инэмыкI субъектхэм яхэ­­бзэихъухьэ къулыкъухэр кIэ­щакIо зыфэхъугъэхэми атегущыIэхи, адырагъэштагъ.
ХЪУТ Нэфсэт.