Мэлылъфэгъум и 20-м Дунэе гъэсэныгъэ Iофтхьабзэу «Тотальный диктант» зыфи­Iорэр я 20-у зэхащагъ. Адыге­им ар я 11-у щыкIуагъ, нэбгыри 150-м ехъу хэлэ­жьагъ.

Мы илъэсым зэкIэмкIи чIыпIи 8-мэ диктантыр ащатхыгъ, ащ щыщэу Мыекъуапэ чIыпIи 6-мэ урысыбзэр зикIасэхэр къякIолIагъэх. КъэIогъэн фае Адыгэкъалэ я 6-у Iофтхьабзэм чанэу зэрэхэлажьэрэр, мыгъэ Хьа­лъэкъуае апэрэу ар щатхыгъ.
УрысыбзэмкIэ шIэныгъэу яIэр зыуплъэкIугъэхэм ащыщэу классиче­скэ диктантыр нэбгырэ 60-м ехъумэ — Мыекъуапэ, 65-м Адыгэ­къалэ ыкIи Хьалъэкъуае ащатхыгъ. IэкIыб къэралыгъохэм къарыкIыгъэ нэбгырэ 45-м тест шIыкIэм тетэу Адыгэ къэралыгъо университетым зыщау­шэтыгъ. Мыщ фэдэ шIыкIэр ятIонэрэу агъэфедэ. Урысыбзэр зимыныдэлъфыбзэу, IэкIыб къэралыгъохэм къа­рыкIыгъэхэу Iофтхьабзэм хэлажьэ зышIоигъохэу, ау дик­тантыр зыфэмытхыщтхэм хэу­шъхьафыкIыгъэу IофшIэн афызэхагъэуцуагъ.
— Хабзэ зэрэхъугъэу, урысы­бзэмкIэ зишIэныгъэ зыуплъэкIу зы­шIоигъохэмкIэ диктантыр Iофтхьэбзэ шъхьаIэу щыт.
Iофтхьабзэр зэрифэшъуашэу рес­публикэм щыкIуагъ. Ар зытхы зы­шIоигъохэм япчъагъэ зэрэхахъорэр тигуап. Илъэс къэс хэлажьэхэу, дэгъу дэдэу зытхыхэрэри мымакIэу тиIэх. Мыгъэ текстыр зыгъэхьазырыгъэр журналистэу, тхакIоу Анна Матвеевар ары. 2024-рэ илъэсыр унагъом и Илъэсэу зэрэщытыр къы­дэтлъытэзэ, чIыпIэ пэпчъ унагъом щыщхэр къеджагъэх, — къыIуагъ АдыгеимкIэ Iофтхьабзэр зэхэзыщэу, филологие шIэныгъэхэмкIэ кандидатэу Нэшъулъэщэ Индирэ.
КIэрэщэ Тембот ыцIэ зыхьырэ музеим нэбгыриплIымэ зыщаушэ­тыгъ. КIэрэщэ Тембот икIалэ икъо­рэлъфэу Алинэ текстым къеджагъ.
Диктантхэр зыуплъэкIурэ комиссием IофшIэныр ыублагъ, мэлылъфэ­гъум и 26-м «Тотальнэ диктантым» исайт зэфэхьысыжьхэр къырагъэхьащтых. Дэгъоу ар зытхыгъэхэр жъоныгъуакIэм и 4-м агъэшIощтых.
ДЕЛЭКЪО Анет.