IэпыIэгъу хъущт
Адыгеим икIэлэегъаджэ лъэпкъ премиеу «Россия — мои горизонты» зыфиIорэм икъыдэхынкIэ зэнэкъокъум хэлэжьагъ ыкIи финалныкъом ихьагъ.
Сэнэхьат къыхэхынымкIэ апэрэ лъэпкъ Премием икъыдэхын фэбэнэнхэм пае кIэлэегъаджэхэм гухэлъ гъэшIэгъонэу яIэхэр онлайн шIыкIэр къызфагъэфедэзэ къыраIотыкIыгъэх, кIэлэеджакIохэм апае агъэхьазырыгъэ проект зэфэшъхьафэу зэхагъэуцуагъэхэр къагъэлъэгъуагъэх.
Теуцожь районымкIэ гурыт еджапIэу N 6-м пIуныгъэ IофымкIэ пащэм игуадзэу Тхьаркъохъо Саидэ проектэу «Живая лаборатория биоинновации» зыфиIорэмкIэ финалныкъом зэрихьагъэм имызакъоу, Урысые проектэу «Билет в будущее» зыфиIорэм игъэсэныгъэ программэ гъэрекIо хэлэжьагъ. Ар зыхэхьэгъэ купыр анахь дэгъуитфымэ ащыщ хъугъэ.
Тхьаркъохъо Саидэ мы мафэхэм гущыIэгъу тыфэхъугъ. Ащ къызэрэтиIуагъэмкIэ, проектэу «Виртуальнэ IэпыIэгъоу Бил-Бот «Сэнэхьатэу къыхэпхыщтымкIэ IэпыIэгъу» зыфиIорэр пэIудзыгъэ шIыкIэм тетэу ахэм агъэхьазырыгъ ыкIи анахь дэгъухэм ащыщ хъугъэ. ТекIоныгъэ къыдэзыхыгъэ купхэм ахэтхэр лъэпкъ премием илауреат хъугъэх ыкIи мэфэкI Iофтхьабзэм рагъэблэгъагъэх.
— ТиеджапIэ «Билет в будущее» зыфиIорэ проектым хэлажьэ, кIэлэеджэкIо 50-м ехъу ащ хэт. Ахэм сэ Iоф адэсшIэнэу сагъэнэфагъ. ХэушъхьафыкIыгъэ егъэджэнэу ткIугъэхэмкIэ балл 350-м ехъу къисхыгъ ыкIи УрысыемкIэ проектнэ модулым сыхэхьагъ. Интернет шIыкIэу «Zооm» зыфиIорэр къызфэдгъэфедэзэ сэнэхьат къыхэхынымкIэ (профориентациемкIэ) чат-бот зэхэдгъэуцогъагъ. Урысыем ишъолъыр зэфэшъхьафхэм ялIыкIохэр ащ хэлэжьагъэх. Сэ сызхэхьэгъэ купым Москва, Санкт-Петербург, Дагъыстан ыкIи нэмыкI чIыпIэхэм ащыщхэр хэтыгъэх, тызэнэIосагъэп. Тхьамафэм къыкIоцI виртуальнэ проектыр зэхэдгъэуцуагъ, кIэлэеджакIохэм ящыIэныгъэ гъогу зэрапхыщт сэнэхьатыр къыхахынымкIэ зишIуагъэ къэкIощт проектыр дгъэхьазырыгъ. Мы лъэныкъор нахь зигъо къэсыгъэу тлъытагъэ, — къытиIуагъ Саидэ.
Сэнэхьат къыхэхынымкIэ лъэпкъ премиеу «Россия — мои горизонты» зыфиIорэм икIэща-
кIор гуманитар проектхэмкIэ Фондэу, программэу «Билет в будущее» зыфиIорэм ифедеральнэ оператор ары. УФ-м просвещениемкIэ и Министерствэ яIэпыIэгъоу ар зэхащагъ. МэфэкI Iофтхьабзэр мэлылъфэгъум и 23-м ВДНХ-м щыкIощт. УФ-м просвещениемкIэ и Министерствэ ищытхъу тхылъхэр ащ щаратыщтых.
МэфэкI Iофтхьабзэм къыдыхэлъытагъэу проект анахь дэгъуитфыр зыгъэхьазырыгъэхэр зэIуагъэкIэщтых, яIофшIагъэхэм джыри нахь куоу атегущыIэщтых, ищыкIагъэмэ, зэхъокIыныгъэхэр фашIыщтых.
ДЕЛЭКЪО Анет.