Гу лъачIэм нэсэу, лъа­къомэ закъыригъэпхъуа­тэу, Iэгу теоныр зэпымыоу. Тэхъутэмыкъое районым итворческэ купхэу УФ-м изаслуженнэ ансамблэу, лъэпкъ Iэмэ-псымэхэмкIэ купэу «Удж», эстраднэ орэдхэмкIэ лъэпкъ студиеу «Къамыл» ыкIи лъэпкъ къашъохэмкIэ ансамб­лэу «Адыгэхэр» зыцIэхэм язэхэт концертэу «Ис­токи» зыфиIоу Мыекъуа­пэ къыщатыгъэр зы жьы­къэщэгъоу кIуагъэ.

Апэрэ такъикъым къыщегъэ­жьагъэу къэгъэлъэгъоным икIэух нэс сценэм утеплъэхъукIынэу амал иIагъэп. Ащ къытехьэрэ пэпчъ зым зыр пыгъэщагъэу, зы къэшIыгъом фэдэу къашъо­хэр, мэкъамэхэр, орэдхэр зэ­кIэлъыкIохэу сыхьатрэ ныкъорэр кIуагъэ. Драматическэ ныб­жьыкIэ театрэу М. С. Ахэджа-
гом ыцIэ зыхьырэм иартистхэм якъэшIыгъохэми программэр къагъэдэхагъ.
Мыщ фэдэу зэхэт къэгъэлъэ­гъон творческэ купищмэ къызэ­ратырэр апэрэ. Тэхъутэмыкъое районыр загъэпсыгъэр мыгъэ илъэси 100 зэрэхъурэмрэ ежь купхэр зызэхащагъэхэм ямэфэкIхэмрэ Iофтхьабзэр афэгъэ­хьыгъ. Тэхъутэмыкъое район ад­министрацием культурэмкIэ и ГъэIорышIапIэ ар игукъэкI. Купхэм ярепертуар хэтыгъэ мэ­къамэхэм, къашъохэм, орэдхэм анэмыкIэу къэгъэлъэгъоным ехъулIэу кIэхэр агъэхьазыры­гъэх.
— Абхъаз къашъор, «Зыгъэлъатэр» ыпэкIэ къэтшIыщтыгъэ­хэп. Ахэр кIэу дгъэуцугъэх. Тизэдэлэжьэныгъэ лъэшэу тыгу рихьыгъ. Илъэсыбэхэм зы унэм тыщэлажьэ, тызэпэблагъ, тызэхэт нахь мышIэми, проектыкIэм нахь тызэрипхыгъ. Пчыхьэ къэс пIоми хъунэу гъэхьазырын­хэр тиIагъэх. Ацумыжъ Рустам тирежиссер. Тимурад къызэрэддэхъугъэм тырыраз, мыщ фэдэ проектхэм джыри тахэлэжьэным тыфэхьазыр, — къыддэгощагъ лъэпкъ къашъохэмкIэ ансамблэу «Адыгэхэр» зыфиIорэм ипащэу Маремыкъо Артур.
Творческэ купхэу «Уджымрэ» «Къамылымрэ» зызэхащагъэхэр илъэс 30, «Адыгэхэр» зыщыIэр илъэси 10 хъугъэ. А уахътэм къыкIоцI республикэм иансамблэ цIэрыIохэм ясатырэ ахэр хэуцуагъэх. МэфэкI инэу шъо­лъырым щырекIокIхэрэр ренэу къагъэдахэх, лъэпкъым икульту­рэ ифэшъуашэу зэрахьэ, къызэ­тырагъанэ, лIэужыкIэхэм анагъэсы, нэмыкI цIыф лъэпкъхэм арагъашIэ.
— Тэхъутэмыкъое районым культурэмкIэ и ГъэIорышIапIэ пшъэрылъ къин непэ егъэцакIэ. Урысыем икъэлэшхоу, псынкIэу зызыушъомбгъурэ Краснодар игъунэгъу. Ащ цIыф лъэпкъ зэ­фэшъхьафыбэ къеуалIэ. Ахэм ащыщхэм Тэхъутэмыкъое районри псэупIэу къыхахы. Арышъ, проектэу «Истоки» зыфиIоу Тэхъутэмыкъое районым непэ къытпигъохыгъэр игъо дэдэу сэлъытэ. Сыда пIомэ культу-
рэм ипшъэрылъыр лъэпкъым икIэн бай къэухъумэгъэныр, ха­хъо егъэшIыгъэныр ыкIи ­адырэ лъэп­къ­мэ яшэн-хабзэхэм ахэмыгъэ­кIокIэгъэныр ары. Куп­хэм ар дэгъоу къадэхъу. Проект дэгъу дэдэу сэлъытэ. БэхэмкIэ ар щысэшIу хъун фае, — къыщиIуагъ ишIуфэс гущыIэ АР-м культурэмкIэ иминстрэу Аулъэ Юрэ.
МэфэкI пчыхьэзэхахьэм икIэ­ухэу къэгъэлъэгъон-форумэу «Уры­сыер» зыфиIоу ВДНХ-м щыкIорэм чанэу зэрэхэлэжьагъэхэм фэшI творческэ купхэу «Уджымрэ» «Адыгэхэр» зыфи­Iорэмрэ яартистхэм, яхудожест­веннэ пащэхэм ыкIи Тэхъутэмыкъое район администрацием культурэмкIэ и ГъэIорышIапIэ ипащэу Хьатит Нурдин АР-м культурэмкIэ и Министерствэ ирэзэныгъэ тхылъхэр къулы­къум ипащэ аритыжьыгъэх.
Проектэу «Истоки» зыфиIо­рэм икъэгъэлъэгъонхэр Адыгэ­къалэ, Краснодар, Налщык ыкIи Владикавказ ащыкIуагъэх. Мые­къуапэ къыщатыгъэр дэкIыгъо­хэмкIэ аужырэу хъугъэ.
Анцокъо Ирин.