Мэфэ фабэу къызэкIэ­лъыкIохэрэм яшIуагъэ­кIэ АР-м и Концерт объединение зикIэщэкIо зэIу­хыгъэ къэгъэлъэгъонхэр АР-м и Къэра­лыгъо филармоние дэжь щызэхащэхэу рагъэжьэжьыгъ.

Адыгеим и Камернэ музыкальнэ театрэ, Къэралыгъо академическэ ансамблэу «Налмэсым» иоркестрэ, Къэралыгъо симфоническэ оркестрэм, ­лъэпкъ орэдымкIэ АР-м и Къэ­ралыгъо ансамблэу «Ислъамыем» якъэгъэлъэгъонхэр зэкIэлъыкIоу мыщ къыщатыгъэх. Ахэм цIыфыбэ зэращалIэ. Къэ­лэдэсхэм ямызакъоу, Мыекъуа­пэ къеблэгъэгъэ хьакIэхэри ягуа­пэу къякIуалIэх.
Шъолъырым икультурэ Iэпы­Iэгъу ин рагъэгъоты: культурэм иунэхэр псэупIэхэм ащагъэпсых, агъэкIэжьых, кинотеатрэхэр, концерт гупчэхэр зэтырагъэ­псыхьэх, искусствэм иеджапIэхэм ящыкIэгъэ Iэмэ-псымэхэр арагъэгъоты.
АР-м и ЛIышъхьэ иунашъокIэ культурнэ Iофтхьабзэу чIыпIэхэм ащыкIохэрэм цIыфыбэ ахэщагъэ мэхъу. ЦIыф псэупIэхэр гу­IэтыпIэ хъунхэм пае ащызэшIуахырэ гъэцэкIэжьынхэм ар­тистхэм зэIухыгъэ къэгъэлъэ­гъонхэр къызщатын алъэкIыщт пчэгухэм яшIын къыщыдалъытэ. Мыекъопэ пчэгу шъыпкъэу Къэ­ралыгъэ филармонием пэIулъ скверыр ащкIэ щысэшIу.
АР-м и Концерт объединение концертхэм язэхэщэнкIэ ипащэ игуадзэу Кукэнэ Алий къызэрэтиIуагъэмкIэ, Iоныгъом ыгузэгухэм анэс Мыекъуапэ изэIухыгъэ пчэгухэм къэгъэлъэгъон 47-рэ ащыкIонэу агъэнэфагъ. КъэшъокIо, орэдыIо купхэм, театрэхэм якъэгъэлъэгъонхэр ахэм къадыхэлъытагъэх. «Мые­къуапэ щыпсэухэрэм ыкIи ихьа­кIэхэм культурэр зэхашIэным пстэури фытегъэпсыхьагъ. Зэ­Iухыгъэ концертхэр зыгъэхьазы­рырэ купыр техническэ Iэмэ-­псымэхэм тэрэзэу Iоф ашIэным, макъэр пчэгухэм ащыIуным ишъыпкъэу пылъ. Филармонием пэIулъ скверым нэмыкIэу Лениным ыцIэ зыхьырэ пчэгум, къэлэ паркым иконцерт пчэгоу «Ракушка» зыфаIорэм, Шъхьэгощэ нэпкъэу Мыекъуапэ итамыгъэу мыIэрысэр зытыра­гъэуцуагъэм зэIухыгъэ концертхэр къащыттыщтых», — хигъэу­нэфыкIыгъ Кукэнэ Алий.
Къэгъэлъэгъонхэм культурэм ижанрэ зэфэшъхьафхэр къащылъэгъонхэу, кIэлэцIыкIухэм апае спектаклэхэр ахэтынхэу зэхэщакIохэм рахъухьагъ. Рес­публикэм икъэлэ шъхьаIэ щы­псэухэрэми, ихьакIэхэми ахэм гухахъо ахагъотэщт.
Мэлылъфэгъум ыкIэ нэс къэ­гъэлъэгъонхэр зэрэзэкIэлъыкIощтхэр къыхэтэуты.
Тэу Замир.

Адыгэ Республикэм и Концерт объединение ­хэ­хьэрэ творческэ купхэу Къэралыгъо филармонием дэжь мазэм ыкIэм нэс зы­къыщызыгъэлъэ­гъощтхэр:
— мэлылъфэгъум и 24-м пчыхьэм сыхьатыр 6-м ыныкъом — эстраднэ ансамблэу «Ошъутенэр»;
— мэлылъфэгъум и 26-м пчыхьэм сыхьатыр 6-м ыныкъом — АР-м и Камернэ музыкальнэ театрэу
А. А. Хьанэхъум ыцIэ зыхьырэр;
— мэлылъфэгъум и 29-м пчыхьэм сыхьатыр 6-м ыныкъом — Адыгеим лъэпкъ орэдымкIэ и Къэралыгъо ансамблэу «Ис­лъамыер»;
— мэлылъфэгъум и 30-м пчыхьэм сыхьатыр 6-м ыныкъом — Адыгеим лъэпкъ къашъомкIэ и Къэралыгъо академическэ ансамблэу «Налмэсыр» (оркестрэр).
Концертхэр къызатыщтхэр ошIу зыхъукIэ ары.