Урысыем ичемпионат и Суперлигэ хэлэжьэрэ «АГУ-Адыифым» зэнэкъокъум ифинал едзыгъо иапэрэ тур къыдыхэлъытагъэу къалэу Ижевскэ къэзыгъэлъэгъорэ «Университетым» зэIукIэгъу дыриIагъ. Командэхэр я 9 – 12-рэ чIыпIэхэм афэбанэх.

«АГУ-Адыиф» – «Университет» – 29:28 (15:16).
Командэхэм ахэт ешIакIохэм якъэгъэлъэгъонхэр:
«АГУ-Адыиф»: Миловар – 6, Болоба – 5, Томилинар – 4, Терлецкаяр – 4, Селиверстовар – 2, Коваленкэр – 2, Кавера – 2, Алексеевар – 2, Бондаренкэр – 1, Краснокутскаяр – 1.
«Университет»: Бересневар – 8, Вахрушевар – 7, Низовцевар – 6, Минабутдиновар – 3, Кондратюк – 3, Басанговар – 1.
Командэхэр я 9 – 12-рэ чIыпIэхэм афэбанэх нахь мышIэми, ешIэкIэ дахэ къагъэлъэгъуагъ, текIоныгъэр къыдэзыхыщтыр къэ­шIэгъоягъ. Пэублэм хьакIэхэр нахь лъэшыгъэх, апэрэ таймым Iэгоуи 4-кIэ ыпэ итхэу къыхэ­кIыгъ. Ау бысымхэр ащ къезэгъыщтыгъэхэп, пчъагъэр зэфэдиз ашIыщтыгъ. Апэрэ таймыр 15:16-у аухыгъ. ЯтIонэрэм ипэублэ тигандболисткэхэм зэлъыпытэу Iэгоуи 3 къэлапчъэм дадзагъ. Ау ешIэгъум иаужырэ такъикъипшIым «Университетым» пчъагъэр зэфэдиз ышIын ыкIи нэужым ыпэ ишъын ылъэкIыгъ. Арэу щытми, аужырэ такъикъым типшъашъэхэм тIогъогогъо Iэгуор къэлапчъэм дадзагъ ыкIи текIоныгъэр къыдахыгъ. ТикомандэкIэ ешIэкIо анахь дэгъоу къыхахыгъ Ангелина Болоба.
— Iэгуаор къэлапчъэм зэрэдэ­сыдзэщтым сегупшысэзэ сычъэщтыгъ, сыда пIомэ ешIэгъур тыухынкIэ охътэ макI къэнэгъагъэр. Исхъухьагъэр къыздэхъугъ, — къыIуагъ А.Болоба.
Купым хэт командэхэр зыдэщыт чIыпIэхэр ыкIи очко пчъа­гъэу рагъэкъугъэр:

1. «Ставрополье» — 21.
2. «АГУ-Адыиф» — 20.
3. «Луч» — 10.
4. «Университет» — 4.
   Мэлылъфэгъум и 27-м тикомандэ «Лучым» IукIэщт, ешIэгъур Москва щыкIощт.