Шъолъыр форумэу «Молодежь Адыгеи 2.0» зыфиIорэр тыгъуасэ Адыгэ къэралыгъо университетым къыщызэIуахыгъ. КIэлэеджэкIо, студент, студенческэ объединениехэм, ныбжьыкIэ организаци­ехэм, гуфэкIо движение­хэм ахэт, Iоф зышIэрэ ныбжьыкIэ 500-м ехъу ащ хэлэжьагъ.

Адыгэ Республикэм и ЛIышъхьэу КъумпIыл Мурат форумым икъызэIухын хэлэжьагъ. Джащ фэдэу Iофтхьабзэм щыIагъэх АР-м и Къэралыгъо Совет — Хасэм и Тхьаматэу Владимир Нарожнэр, АР-м гъэсэныгъэмрэ шIэныгъэм­рэкIэ иминистрэу Евгений Лебедевыр, АР-м ныбжьыкIэхэм яIофхэмкIэ и Комитет итхьаматэу Максим Галушкиныр, Адыгэ къэралыгъо университетым, Мые­къопэ къэралыгъо технологическэ уни­вер­ситетым япащэхэр, общественнэ организациехэм, ныбжьыкIэхэм ялIыкIохэр.
Адыгеим и ЛIышъхьэ ишIуфэс псалъэ къызэрэщыхигъэщыгъэмкIэ, республикэм иныбжьыкIэхэр чанэу шъолъырми, хэгъэгуми къащыхъурэ зэхъокIыныгъэхэм ахэлажьэх. Обществэм ыпашъхьэ ит зигъо пшъэрылъхэм язэшIохын, респуб­ликэм ихэхъоныгъэ ныбжьыкIэхэм яIахьышхо хашIыхьэ. КъумпIыл Мурат форумыр зэхэзыщагъэхэм зэрафэразэр къыIуагъ, АР-м ныбжьыкIэ IофхэмкIэ и Комитетрэ общественнэ организациехэмрэ ныбжьыкIэ политикэм ипхырыщынкIэ Iофэу ашIэрэм мэхьанэшхо зэриIэр къыхигъэщыгъ.
«Адыгеими, Урысыеми янеущрэ мафэ зыфэдэ хъущтыр шъоры зэлъытыгъэр. Джыдэдэм шъо анахьэу шъузыпылъын фаер шIэныгъэ куу зэжъугъэгъотыныр, текIоныгъакIэхэр шъушIынхэр, опытэу, къулайныгъэу шъуиIэхэм ахэжъугъэхъо­ныр ары. Тэ типшъэрылъыр — зэдиштэу ныбжьыкIэхэм хэхъоныгъэ ашIынымкIэ ищыкIэгъэ амалхэр ядгъэгъотынхэр, Адыгеим икIалэхэмрэ ипшъашъэхэмрэ хэбзэ шIагъохэр лъагъэкIотэнхэмкIэ тфэлъэкIыщтыр зэкIэ тшIэныр ары», — къыIуагъ КъумпIыл Мурат.
Мыщ фэдэ Iофтхьабзэхэм язэхэщэн мэхьанэшхо зэриIэм къытегущыIэзэ, республикэм и ЛIышъхьэ зэрэхигъэунэфыкIыгъэмкIэ, республикэм ихэбзэ къулыкъухэм тапэкIи ныбжьыкIэхэм ягукъэкIхэм адырагъэштэщт, щыIэны­гъэм яфэшъошэ чIыпIэ ахэм щаубытыным акIуачIэ рахьылIэщт.
Хэгъэгум и Президентэу Владимир Путиныр кIэщакIо зыфэхъугъэ лъэпкъ проектыкIэу «Урысыем иныбжьыкIэхэр» зыфиIорэм ныбжьыкIэхэм амалыкIэхэр къазэрафызэIуихыщтыр форумым щыхагъэунэфыкIыгъ.
МэфэкI шIыкIэм тетэу форумыр къы­зызэIуах нэуж КъумпIыл Мурат ныбжьыкIэхэм я Урысые Союз и Адыгэ шъолъыр организацие хэтхэм адэгущы­Iагъ. Адыгеим и ЛIышъхьэ республикэм щызэрахьэрэ Iофтхьэбзабэмэ чанэу зэрахэлажьэхэрэм пае ныбжьыкIэхэм зэрафэразэр къыIуагъ. Республикэм ипащэ ахэм къяджагъ шIэныгъэ куу зэрэзэрагъэгъотыщтым нахь лъэшэу пылъынхэу, Москва, Санкт-Петербург, Ростов-на-Дону, Краснодар, хэгъэгум инэмыкI къалэхэм адэт апшъэрэ еджапIэхэм ащеджэхэу Адыгеим къикIыгъэхэм зэпхыныгъэ адыряIэнэу, проектхэм ахэр ахагъэлэжьэнхэу.
НыбжьыкIэхэм я Урысые Союз и Адыгэ шъолъыр организацие итхьаматэу Мыгу Бислъан АР-м и ЛIышъхьи, респуб­ликэм ихэбзэ къулыкъухэми «тхьашъуе­гъэпсэу» ариIуагъ ягукъэкIхэм къазэрадырагъаштэрэм ыкIи Адыгеим иныбжьыкIэ политикэ ипхырыщын яIахьышхо зэрэхашIыхьэрэм афэшI. Федеральнэ программэхэмрэ шъолъыр IэпыIэгъумрэ яшIуагъэкIэ республикэм ис ныбжьыкIэхэм гъэсэныгъэ дэгъу зэрагъэгъоты­нэу, обществэмкIэ мэхьанэшхо зиIэ проектхэр пхыращынэу амал зэряIэр форумым къыщаIуагъ.
Форумэу «Молодежь Адыгеи 2.0» зыфиIорэр мэлылъфэгъум и 19-м къыщегъэжьагъэу и 21-м нэс АКъУ-мрэ МКъТУ-мрэ ащыкIощт. НыбжьыкIэхэр, студенческэ, гуфэкIо, общественнэ объединениехэр, Адыгэ Республикэм иорганизациехэр опытэу яIэхэмкIэ мыщ щызэхъожьыщтых. ЛъэныкъуиплIыкIэ форумым Iоф ышIэщт. Творческэ, спорт, культурэ Iофтхьабзэхэр, мастер-классхэр ыкIи нэмыкIхэр ащ щызэхащэщтых.
Шъолъыр программэу «Молодежь Адыгеи 2.0» зыфиIорэм къыдыхэлъытагъэу президент грантхэм яфонд яIэпыIэгъоу форумыр зэхащэ, программэм икIэух ныбжьыкIэ проектэу ар щыт.
АР-м и ЛIышъхьэ ипресс-къулыкъу