Адыгеим и ЛIышъхьэу КъумпIыл Мурат Урысыем хэгъэгу кIоцI IофхэмкIэ и Мини­стерствэ Джэджэ районымкIэ икъутамэ икъулыкъушIэ унакIэ икъызэIухын хэлэжьагъ.

АР-м и Къэралыгъо Совет – Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м хэгъэгу кIоцI IофхэмкIэ иминистрэу Олег Безсмельницыныр, щынэгъончъэнымкIэ федеральнэ къулыкъум и ГъэIорышIапIэу АР-м щыIэм, АР-м и Прокуратурэ, Урысые Федерацием и Следственнэ комитет иследственнэ Гъэ­IорышIапIэу АР-м щыIэм, АР-м и Апшъэ­рэ хьыкум, УФ-м ошIэ-дэмышIэ IофхэмкIэ и Министерствэ и ГъэIорышIапIэу АР-м щыIэм, Росгвардием и ГъэIорышIапIэ, Джэджэ районым япащэхэр, хэгъэгу кIоцI IофхэмкIэ Министерствэм иветеран организациехэм ялIыкIохэр ыкIи нэмыкIхэр Iофтхьабзэм къекIолIагъэх.
Адыгеим и ЛIышъхьэ къызэрэхигъэщыгъэмкIэ, непэрэ Iофтхьабзэр министерствэмкIэ мэхьанэшхо зиIэ хъугъэ- шIагъэу щыт. Полицием мылъку-техникэ лъэныкъомкIэ иIофхэм язытет нахьышIу зэрэхъугъэр къулыкъур шIуагъэ къытэу хьыгъэнымкIэ анахь ищыкIагъэу щытыгъэ лъэныкъохэм зыкIэ ащыщ.

«Хэгъэгу кIоцI IофхэмкIэ Министерствэм иIофшIэн Iофыгъуабэ ыкIи пшъэ­рылъыбэ къызэлъеубыты. Ахэр зэпхыгъэ­хэр хэбзэгъэуцугъэу щыIэр мыукъогъэныр, цIыфхэм хабзэм ишапхъэхэр икъоу къыдалъытэнхэмкIэ Iофтхьэбзэ зэфэ­шъхьафхэр зэшIохыгъэнхэр ары. Ащ елъытыгъэу, Iо хэлъэп, полицием иIофы­шIэхэм япшъэрылъ зыщагъэцэкIэщт чIыпIэм изытет зыфэдэми мэхьанэ иI. БзэджэшIагъэхэр зэрамыхьанхэмкIэ, ахэм якъыхэгъэщынкIэ къэуцурэ Iофыгъохэр игъом ыкIи тэрэзэу зэшIохыгъэнхэм нахь лъэшэу анаIэ атырагъэтынымкIи ащ ишIуагъэ къэкIощт», — къыIуагъ КъумпIыл Мурат.
Полицием ирайон къутамэ зычIэт унакIэу къатищэу зэтетыр псэупIэу Джаджэм иурамэу Лениным ыцIэкIэ щытым къытетэджагъ. ПсэолъэшIыным иподрядчикыр компаниеу «Краснодарстройпроект» зыфиIорэр ары. IофшIэнхэм сомэ миллион 301-м ехъу апэIухьагъ. 2021-рэ илъэсым шэкIогъум рагъажьи, 2023-м тыгъэгъазэм нэс пIалъэу ащ ишIын ыхьыгъэр. Федеральнэ бюджетым къыхэкIыгъэ мылъкумкIэ ар агъэпсыгъ.

Квадрат метрэ мини 4 фэдиз зыубытыгъэ къулыкъушIэ унэм хэтых дежурнэ частыр, чIыпIэ инспекторхэм яотделхэр, зыныбжь имыкъухэрэм зэрахьэрэ бзэджэшIагъэхэм защыхаплъхьэхэрэр, экономикэм ылъэныкъокIэ хабзэр зыукъохэрэм япхыгъэ Iофхэр зыщызэхафыхэрэр. КадрэхэмкIэ, къэбарым икъэухъумэнкIэ, лицензие ятыгъэным епхыгъэ IофшIэнымкIэ, финанс лъэныкъомкIэ Iофтхьабзэхэм язэшIохынкIэ, цIыфхэм япсауныгъэ изытет лъыплъэгъэнымкIэ кабинетхэр ащ хэтых. Общественнэ щынэгъончъэнымкIэ полицием, къэгъэгъунэн Iофхэм япхыгъэ унэхэри ащ хэхьэх. ПIэлъэ гъэ­нэфагъэкIэ зыщаIыгъхэрэ унэм зытхьакIыпIи, гъэпскIыпIи, Iоф щызышIэхэрэм апае кабинетхэри, санитарием епхыгъэ чIыпIэхэри иIэх. Унэмрэ изоляторымрэ КъумпIыл Мурат къызеплъыхьэхэ лъэхъа­ным мыщ щылажьэхэрэм Iоф ашIэнымкIэ амалэу яIэхэр нахьышIу хъунхэмкIэ яшIуагъэ къызэрэкIощтым ицыхьэ зэрэтелъыр къыIуагъ, следствием епхыгъэ Iофыгъоу къэуцухэрэри нахь псынкIэу зэшIохыгъэ хъунхэмкIэ ащ ишIуа­гъэ къэ­кIощт.
Джэджэ райотделым ипащэрэ иIофышIэхэмрэ шIуфэс гущыIэхэмкIэ закъы­фагъэзагъ АР-м и Къэралыгъо Совет – Хасэм и Тхьаматэу Владимир Нарожнэмрэ АР-м хэгъэгу кIоцI IофхэмкIэ иминистрэу Олег Безсмельницынымрэ. Ахэм къыхагъэщыгъ МВД-м иподразделениехэм мылъку-техникэ лъэныкъомкIэ яIофхэм язытет нахьышIу зэрэхъугъэр, тапэкIи пащэхэми Iоф щызышIэхэрэми гъэхъагъэ хэлъэу япшъэрылъхэр агъэцэкIэнхэу афэлъэIуагъэх.
Мы Iофтхьабзэм илъэхъан АР-м и ЛIышъхьэ, АР-м и Къэралыгъо Совет – Хасэм ярэзэныгъэ тхылъхэр, АР-м хэгъэгу кIоцI IофхэмкIэ и Министерствэ идипломхэр аратыжьыгъэх зиIофшIэнкIэ анахь гъэхъэгъэ дэгъухэр зиIэхэм. Ащ нэфэшъхьафэу ведомствэм ирэзэныгъэ тхылъхэр афагъэшъошагъэх компание- подрядчикым ипащэхэмрэ иIофышIэ­хэмрэ.
АР-м и ЛIышъхьэ ипресс-къулыкъу