ЗэлъашIэрэ цIыф гъэсагъэу, филологие шIэныгъэхэмкIэ докторэу, профессорэу, АР-м игъэсэныгъэшIэныгъэ лъапсэ гъэпытэгъэным зиIахьышIу хэлъэу, АКъУ-м икIэлэегъэджагъэу, гуманитар ушэтын­хэм­кIэ Адыгэ республикэ институтэу Т. КIэращэм ыцIэ зыхьырэм илъэсыбэрэ литературэмкIэ иотдел ипэщагъэу, иадыгэ лъэпкъ фишIэрэр шIомакIэу щыIэгъэ Шъхьэлэхъо Абу къызыхъугъэр илъэс 95-рэ хъугъэ.

ЛIы гъэсагъэм ищыIэныгъэ ыкIи итворческэ гъогу зэфэдэкIэ бай. Абу икIэлэгъу-ныбжьыкIэгъу къыздиштагъэу иадыгэ лъэпкъыкIэ гукIэгъушIэ дэдагъ, игуапэу ежь ышъхьэкIэ гъэсэныгъэм, шIэныгъэм афэкIуагъ, IэкIэлъ хъугъэ-шIэны­гъабэр лъэпкъэу илъапIэм зэ­рэлъигъэIэсыщтым сыдигъуи пылъыгъ, лIэужыкIэм зэфэдэкIэ лIы гъэсагъэр готыгъ, дэгощагъ шIэныгъэрэ акъыл-Iушы­гъэрэкIэ.
Шъхьэлэхъо Абу ыпсэ ифабэ, ишIэныгъэ мэшIуащэ ныбжьыкIэхэм алъигъэIэсыныр, зылъищэнхэр, гъогу нэф тырищэнхэр фызэшIокIыгъ.
«Илъэпкъ пае щыIагъ» зыфа­Iохэрэм яапэрэ сатыр хэтыгъ Шъхьэлэхъо Абу. Шъхьафитныгъэр, мамырныгъэр ыкIи шIэныгъэ-гъэсэныгъэр щыIэны­гъэмкIэ зэрэлъапIэхэр зэхишIапэу щэIэфэ лъэныкъуабэкIэ гушъхьэлэжьыгъэ зэIуигъэкIагъ.
АР-м и Лъэпкъ тхылъеджапIэ шIэныгъэлэжьышхоу, акъылы­шIоу, губзыгъэу, щыIэныгъэр икIасэу псэугъэ Шъхьэлэхъо Абу къызыхъугъэр илъэс 95-рэ зэ­рэхъугъэм фэгъэхьыгъэ къэгъэ­лъэгъонэу «Огонь души Абу Схаляхо» ыIоу къыщызэIуахыгъ. ЦIыф гъэсэгъэшхо Iэдэбым ищыIакIэ ыкIи иIофшIэкIагъэр къыриIотыкIэу ар гъэпсыгъэ. Ежь Абу фэгъэхьыгъэ тхылъхэу, статьяхэу, гупшысэхэу нэмыкI­хэм къаIэкIэкIыгъэхэр бэу мыщ хэлъых. Джащ фэдэу ежь икъэ­лэм къыпыкIыгъэхэри мэкIайхэм атетых. Къызэгопхырэ тхылъ, гъэзет е журнал нэкIубгъо пэпчъ Шъхьэлэхъо Абу ыпсэ ифабэ, иакъыл чаныгъэ, ицIыфыгъэ ин ащэIорышIэ, тхыгъэхэр зэпы­рыбгъазэзэ, лIыр псаум фэдэу, хьалэл нэплъэгъу фабэр къы­Iутэкъоу уапашъхьэ къеуцо.
Иадыгэ лъэпкъ ыгу факIоу, ыпсэ хэлъэу, шIэныгъэр икIасэу, гъэсэныгъэр илъапIэу щыIагъ Абу. Ар зыфэдэгъэ шъыпкъэр адыгэхэм зымышIэрэ ахэтэп, къэхъугъагъ иадыгэ лъэпкъ фэ­шъыпкъэнэу. МэфэкI къэгъэ­лъэгъоныр Лъэпкъ тхылъеджапIэм литературэмрэ крае­ве­дением­рэкIэ иотдел къы­ща­гъэ­хьазы­рыгъ, тхьамэфитIо щы­зэIухы­гъэщт.
Дзэукъожь Нуриет.