Культурэм иучреждениеу «Нысхъапэхэм я Белго­родскэ Къэралыгъо театрэ» игастрольхэр къалэу Мые­къуапэ щэкIох.

Урысыем изаслуженнэ артистэу Вячеслав Семенченкэм къызэриIуагъэмкIэ, хэушъхьафыкIыгъэ программэм ишIуагъэкIэ рес­публикэм икъэлэ шъхьаIэ апэрэу гастрольхэр щызэхащагъэх.
— Мэфищым кIощт Iоф­тхьабзэм пшысэхэр къыщыдгъэлъэгъощт. ШIушIэным имэхьанэ, цIыф шэн-хабзэхэр, лIыгъэр, шIу­лъэгъур, зэо лъэхъаным ленинградцэхэм зыкIыныгъэу ахэлъыгъэр тиартистхэм къыраIотыкIы. Спек­таклэхэм кIэлэцIыкIухэр, ны-тыхэр яплъыхэмэ, цIыф­хэм язэфыщытыкIэхэмрэ пшысэмрэ зэрагъапшэхэзэ зэфэхьысыжьхэр ашIыщтых».
Апэрэ мафэм О. Берггольц ытхыгъэм техыгъэ спектаклэу «КъэзыIорэр Ленинград» зыфиIоу блокадэм илъэхъан цIыфхэм къинэу зэпачыгъэм фэ­гъэхьыгъэр къагъэлъэ­гъуагъ. Театрэм ирепертуар Хэгъэгу зэошхом текIоныгъэ къызщыдахыгъэр илъэс 75-рэ зэрэхъугъэм ыкIи урыс поэтэу, драматург цIэрыIоу Ольга Берггольц ыныбжь илъэси 110-рэ зэрэхъурэм афэгъэ­хьыгъ.
Хэгъэгу зэошхор тина­хьыжъхэмкIэ тхьамыкIэ­гъуагъ, заор зынэ кIэкIыгъэхэм, ащ хэтыгъэхэм ащыгъупшэрэп. ХэкIодэгъэ цIыфхэм япчъагъэ гъу­нэнчъ. Блокадэм илъэхъан Ленинград дэсыгъэхэм ащэ­чыгъэ хьазабыр артистхэм къырагъэлъэгъукIыгъ.
2022-рэ илъэсым ныс­хъапэхэм я Белгородскэ Къэралыгъо театрэ Урысы­ем зыкъэухъумэжьынымкIэ и Министерствэ зэхищэгъэ зэнэкъокъоу «Теат­ральное искусство» зыфиIорэм ишIу­хьафтын къы­фагъэ­шъошагъ. Ащ ыужкIэ 2023-рэ илъэсым нысхъэпэ театрэхэм яфестивалэу «Пат­риот» зыфиIорэм «Патриотическэ спектакль анахь дэгъу» зыфиIорэм апэрэ чIыпIэр къыщыдихыгъ.
Режиссер цIэрыIоу Михаил Климчук ар ыгъэу­цугъ.
ЯтIонэрэ мафэм А. И Куприным ытхыгъэм техыгъэ спектаклэу «Пылыр» зыфиIоу ны-тыхэм яшIу­лъэгъу зэхэпшIэныр зэрэнасыпыгъэм фэгъэхьыгъэр къагъэлъэгъуагъ. Режиссерыр Лъэпкъ премиеу «Золотая маска» зыфиIорэм илауреатэу Петр Васильевыр ары.
Непэ А. С. Пушкиным ипоэмэу «Русланрэ Людмилэрэ» зыфиIорэм те­хыгъэ спектаклэр къагъэлъэгъощт. Ар режиссерэу Сергей Балыковым ыгъэуцугъ.
Нысхъэпэ театрэм испек­таклэр шIулъэгъуныгъэ да­хэм игъогу къин къы­реIо­тыкIы, ем шIур зэрэтекIо­рэм ар ишыхьат.
Театрэм игастрольхэр Адыгеим щыпсэурэ цIыф­хэм шIукIэ агу къинэщт.