СамбэмкIэ зэнэкъокъухэр къалэу Кемеровэ щыкIуагъэх.

Кузбасс икъэлэ шъхьаIэ щызэIукIагъэх спортсмен анахь лъэшхэр. Турнирым и Гран-при икъыдэхын фэбэнагъэх Урысыем, Казахстан, Узбекистан, Армением, Белоруссием, Таджикистан, Кыргызстан ялIыкIохэр.
Зэнэкъокъум ишIухьафтын фонд сомэ миллионым ехъущтыгъ. Хабзэ зэрэхъугъэу мыщ фэдэ турнирхэм Адыгэ Республикэм исамбистхэр чанэу ахэлажьэх, гъэхъэгъэшIу­хэр ашIых. Мызэгъэгуми арэущтэу щытыгъ. Тишъолъыр къэзыгъэлъэгъуагъэхэр Тэхъутэмыкъое районым щыщ Наш Расулрэ (тренер­хэр Р. Джарымэкъу, А. Джарымэкъу) Мые­къуапэ илIыкIоу Гъомлэшк Анзоррэ (зыгъа­сэхэрэр А. Делэкъу, А. Гъомлэшк). Финалым Расул тикъэралыгъо щыщ Али Турсуновым щыIукIагъ, тиспортсмен текIоныгъэр къыдихыгъ, дышъэ медаль къыфагъэшъошагъ. Анзори финалым ихьагъ, ау ар зыIукIэгъэ Денис Яковлевыр нахь лъэшэу къычIэкIыгъ, тикIалэ ятIонэрэ чIыпIэр къыдихыгъ.
Адыгеим илIыкIохэм хагъэунэфыкIырэ чIыпIэхэр къызэрэдахыгъэхэм ишIуагъэкIэ Гран-прим ифиналэу тыгъэгъазэм къалэу Казань щыкIощтым хэлэжьэнхэу фитыныгъэ къыдахыгъ.
ЗэхэщакIохэм къызэраIуагъэмкIэ, дунэе мэхьанэ зиIэ мыщ фэдэ зэнэкъокъу инхэм язэхэщэн Кемеровэ дэгъоу зыфигъэхьазырыгъ. Мы илъэсым турнирым ишIухьафтын фонд хэпшIыкIэу хагъэхъуагъ ыкIи зызыушэтыгъэхэр хъулъфыгъэхэр ары. Ащ фэдэ екIолIакIэр спортсменхэми, цIыфхэми нахь ашIогъэшIэгъоныгъ.