ТекIоныгъэм и Мафэ ехъулIэу ыкIи патриотическэ пIуныгъэ ныбжьыкIэхэм ягъэгъотыгъэным епхыгъэу Мыекъуапэ дэт гурыт еджапIэу N 17-м ия 9-рэ классхэм арысхэм «ЛIыхъужъныгъэм исыхьат» афызэхащагъ.

Iофтхьабзэм хэлэжьагъэх хэгъэгу кIоцI IофхэмкIэ къулыкъум ыкIи IэкIоцIыдзэхэм яветеранхэм я Совет и Адыгэ шъолъыр къутамэ илIыкIоу ШъэуапцIэкъо Сэфэр, Адыгэ Республикэм и МВД экстремизмэм пэшIуекIогъэнымкIэ и Гупчэ илIыкIохэу Вадим Огарковымрэ ГутIэ Рэмэзанрэ, кIэлэегъэджэ ыкIи кIэлэеджэкIо 70-м ехъу.
ХьакIэу зэхахьэм хэлажьэрэмэ къа­Iотагъ Адыгеир советскэ дзэхэм шъхьафит зэрашIыжьыгъагъэр. Джащ фэдэу Хэгъэгу зэошхом илъэхъан хэку милицием иIофышIэхэр пыим псэемыблэжьэу зэребэныщтыгъэхэм, партизанскэ движением зэрэхэтыгъэхэм ягугъу къа­шIыгъ.
Адыгэ хэку милициер шъолъырым зэрэщагъэпсыгъагъэм, ащ игъэуцун зыфэдагъэм кIэлэеджакIохэм анаIэ тыраригъэдзагъ милицием иполковникэу отставкэм щыIэ ШъэуапцIэкъо Сэфэр, ар шъхьафэу къатегущыIагъ илъэс зэфэшъхьафхэм шъолъыр къулыкъум пащэу иIагъэхэм, ахэм агъэхъагъэхэм, джащ фэдэу бзэджэшIагъэу блэкIыгъэ илъэсхэм зэрахьагъэхэр зэрэзэхафыгъэхэм.
Экстремизмэм пэуцужьыгъэнымкIэ МВД-м и Гупчэ илIыкIоу ГутIэ Рэмэзан Интернетыр щынэгъончъэу зэрэбгъэпсэолъэщтыр къафиIотагъ, къэбар нэпцIэу ащ къихьэхэрэр ашIошъ амыгъэхъунэу, ахэр ауплъэкIужьынхэу ар кIэлэеджа­кIомэ къяджагъ.
Полицием имайорэу Вадим Огарковым кIэлэеджакIомэ агу къыгъэкIы­жьыгъ информационнэ щынэгъончъэныр къыдалъытэн зэрэфаер, анахьэу мобильнэ телефонхэр агъэфедэхэ хъумэ. АмышIэрэ цIыфхэр къафытеохэмэ, адэмыгущыIэ­хэмэ, джэуап арамытыжьмэ зэрэнахьы­шIур къариIуагъ. Ащ фэдэ шапхъэхэр МВД-м ыгъэнэфагъэх ыкIи ухъумэкIо къулыкъухэм агъэлэжьэрэ сайтхэр, аккаунтхэр, социальнэ хъытыухэр къызфагъэфедэзэ цIыфхэм алъагъэIэсых.
МВД-м информациемкIэ ыкIи общественнэ зэпхыныгъэхэмкIэ иотдел.
Сурэтыр: МВД-м ипресс-къулыкъу