Федеральнэ къэралыгъо унитар предприятиеу «Охрана» зыфиIорэм щылажьэщтыгъэ хъулъфыгъэу Мыекъуапэ ипочтэ Iоф щызышIэрэ кIалэр зыукIыгъэу зэгуцафэхэрэм иIоф Мыекъопэ къэлэ хьыкумыр хэплъагъ ыкIи следствиер окIофэ мэзитIу хьапс тырилъхьагъ. Хъулъфы­гъэм мыщ ыпэкIи хьапс телъыгъ.
— Лажьэ зиIэу зэгуцафэхэрэм ыкIи ар къэзыухъумэхэрэм хьыкум зэхэсы­гъор окIофэ бзэджашIэм хьапс зэрэтыралъхьагъэм рымыразэхэу кIэдэугъэхэп, —къеты Мыекъопэ хьыкумым ипресс-къу­лыкъу.
Мыщ ыпэкIэ 2023-рэ илъэсым бэдзэогъум и 25-м УФ-м и Уголовнэ кодекс ия 158-рэ статья ия 3-рэ Iахь зигугъу къышIырэ бзэджэшIагъэмкIэ, зыгорэм имылъкоу бэ хъурэр икартэ зэрэритыгъукIыгъэм фэшI, Мыекъопэ къэлэ хьыкумым иунашъокIэ хъулъфыгъэр агъэмысагъэу щытыгъ.
Ащыгъум зэрагъэунэфыгъэмкIэ, Iоф къыдэзышIэрэ хъулъфыгъэм илъэIукIэ ащ ителефон банкым иприложение фытыригъэуцуагъ ыкIи ар къызэрелъэIугъэм тетэу ителефон вирус къытемыхьанэу ренэу фигъэкъабзэщтыгъ. Телефоным узэрихьащт паролыр зэришIэрэр къызфигъэфедэзэ хъулъфыгъэм тIэкIу-тIэкIузэ Iоф къыдэзышIэрэм иахъщэ ритыгъу­кIыгъ. Илъэсым къыкIоцI сомэ мин 43-рэ фэдиз ытыгъугъэу агъэунэфыгъ, ау хьапс тыралъ­хьэгъагъэп. Мэзэ 20-м телъытагъэу сомэ мини 100 къыпщыныжьынэу, мазэ къэс мини 5, тазыр хьыкумым тырилъхьагъ.
Ащ тазырэу тыралъхьагъэр мы ма­фэхэм яхъулIэу ыпщыныжьыгъэп.
Шъугу къэдгъэкIыжьын, 2024-рэ илъэ­сым мэлылъфэгъум и 14-м ипчыхьэ Федеральнэ къэралыгъо унитар предприятиеу «Охрана» зыфиIорэм иIофышIэ Урысыем и Почтэ икъутамэу Мыекъуапэ дэтым щылэжьэрэ кIалэу илъэс 22-рэ зыныбжьыр къулыкъум иеу ыIыгъыгъэ кIэрахъомкIэ ыукIыгъ. БзэджэшIагъэ зэрэзэрихьагъэр къамышIэным фэшI иныбджэгъу игъусэу хьадэр пкъырып­къэу зэпкъырахыгъ ыкIи почтэм ищагу дэт хэкIитэкъупIэм радзагъ.
УФ-м и Следственнэ комитет иследственнэ ГъэIорышIапIэу АР-м щыIэм уголовнэ Iоф къызэIуихыгъ. Мы уахътэм следствиер макIо.