Лъэныкъо шъхьаIэхэм ащыщ
Республикэм ихэхъоныгъэ тапэкIэ зыфэдэщтыр бэкIэ елъытыгъ гъогу хъызмэтым, ар шъолъыр экономикэм изы Iахь.
ТоварышIхэми, инвесторхэми яIофшIэн зэрэгъэпсыгъэщтыр, зэрэлъыкIотэщтыр, зекIоным епхыгъэ Iофтхьабзэхэр ыкIи фэIо-фашIэхэр зэшIохыгъэ зэрэхъущтхэр зэтегъэпсыхьэгъэ гъогухэм ялъытыгъ. Ащ нэмыкIэу автомобиль гъогу дэгъухэм цIыфхэм ящынэгъончъагъэкIи, язекIон нахь Iэрыфэгъоу щытынымкIи мэхьанэшхо яI.
«Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм ишIуагъэкIэ транспорт инфраструктурэм ихэхъоныгъэ епхыгъэ пшъэрылъ заулэ зэшIотхын тлъэкIыгъ. Федеральнэ гупчэм къытырэ амалхэри нахь шIуагъэ хэлъэу гъэфедагъэ хъунхэм республикэм ренэу ынаIэ тырегъэты», — хигъэунэфыкIыгъ АР-м и ЛIышъхьэу КъумпIыл Мурат.
Илъэсэу икIыгъэм лъэпкъ проектым диштэу республикэ мэхьанэ зиIэ автомобиль гъогу километри 100 фэдиз Адыгеим щагъэцэкIэжьыгъ, 2025-рэ илъэсым играфик къыщыдэлъытэгъэ IофшIэнхэр ипIалъэм къыпэу агъэцакIэх. Гъогу Iахь 28-у километрэ 50 фэдиз зикIыхьагъэр агъэцэкIэжьынэу рахъухьагъ.
Непэ республикэм игъогушIхэм лъэпкъ проектым къыдыхэлъытэгъэ псэуалъэм игъэцэкIэжьын аухы. Ар къалэу Мыекъуапэ къыщызыухьэрэ гъогум изы Iахьэу Гавердовскэмрэ Краснооктябрьскэмрэ азыфагу илъыр ары. А автомобиль гъогум мэхьанэшхо зиIэ шъолъыр гъогухэр зэрепхых ыкIи хы ШIуцIэ Iушъом екIурэ зэлъашIэрэ гъогухэм язы Iахьэу щыт. Гъогур хьазыр, псэолъэшIхэр джы зыуж итхэр гъогубгъухэм ягъэпытэн. Ащ нэужым тамыгъакIэу гъогухэм атетыщтхэр агъэуцущтых ыкIи гъогухэр агъэтхъыщтых.