Нэбгыри 176-рэ хэлэжьагъ
Апшъэрэ категорие зиIэ тренерэу Алексей Минаевым ишIэжь фэгъэхьыгъэ зэIухыгъэ турнир къалэу Новочеркасскэ щызэхащагъ. Ростов хэкум, Краснодар краим, Адыгеим, Донецкэ ыкIи Луганскэ народнэ республикэхэм, джащ фэдэу Республикэу Беларусь яспортсменхэр зэнэкъокъугъэх, зэкIэмкIи нэбгыри 176-рэ ащ хэлэжьагъ.
Адыгэ Республикэр къэзыгъэлъэгъуагъэхэр олимпийскэ резервым испорт еджапIэу Кобл Якъубэ ыцIэ зыхьырэм зыщызыгъэсэхэрэ ЛIыбзыу Заур, Хьаджэкъо Дамиррэ Чыназрэ. ТикIалэхэм гъэхъэгъэшIухэр ашIыгъэх, ЛIыбзыу Заур текIоныгъэр къыдихыгъ ыкIи техникэ анахь дэгъу къэзыгъэлъэгъогъэ спортсменэу къыхахыгъ. Зэшхэу Дамиррэ Чыназрэ апэрэ чIыпIэр зэдагощыгъ. Тиспортсменхэм ятренерыр Бастэ Салим.